ފިރިހެން ޑިވިޝަންގެ ފައިނަލްގައި ވާދަކުރާ ޓީމުތައް ޔަޤީންވެއްޖެ

މިހާރު ކުރިޔަށްދާ 5 ވަނަ މައިލޯ ހޭންޑްބޯލް މޯލްޑިވްސް ޗެމްޕިއަންޝިޕް 2022 ފިރިހެން ފައިނަލްގައި ވާދަކުރާ ޓީމުތައް ކަށަވަރުވެއްޖެއެވެ.

ހަތަރު ޓީމް ވާދަ ކުރި ފައިނަލް ބުރުގެ އެއްވަނަ ހޯދީ ފިއުޗަރ ސްޕޯޓްސް ކްލަބް އެކެޑަމީންނެވެ. އެއީ އެ ޓީމު ކުޅުނު ތިން މެޗު ވެސް ކާމިޔާބު ކޮށްގެންނެވެ. ފައިނަލް ބުރުގެ ދެވަނަ ހޯދީ ފުލިދޫ ޔޫތް ސްޕޯޓްސް ކްލަބެވެ. ދެން މި ގުރޫޕް ގައި ހިމެނުނީ ވަރުގަދަ ދިވެހި ސިފައިންގެ ކްލަބާއި ޕޮލިސް ކްލަބެވެ. ފުލިދޫ އަދި ފިއުޗަރ ސްޕޯޓްސް ކްލަބް އެކެޑެމީ އަކީ އެންމެ ފަހުން ބޭއްވި ނެޝަނަލް ހޭންޑްބޯލް މުބާރާތުގައި ފައިނަލްގައި ވެސް ކުޅުނު ދެ ޓީމެވެ.

އަންހެން ޑިވިޝަނުން ރެޑްހޯކްސް ވަނީ ފައިނަލްގެ ފުރަތަމަ ޖާގަ ކަށަވަރުކޮށްފައެވެ. ފައިނަލްގެ ދެވަނަ ޖާގަ ކަށަވަރު ވާނީ މިރޭ ކުޅުމަށް ހަމަޖެހިފައިވާ އޮރިކްސް އަދި ކީންސް ބައްދަލު ކުރާ މެޗުންނެވެ. ފައިނަލްގެ ޖާގައެއް ބޭނުންވާނަ ކީންސް ޖެހޭނީ މެޗުން މޮޅުވާށެވެ. މެޗު އެއްވަރުކޮށްލައިގެން ވެސް އޮރިކްސް ހޭންޑްބޯލް ކުލަބަށް ފައިނަލްގެ ޖާގަ ލިބޭނެއެވެ.

ފުލިދޫ ޔޫތު ސްޕޯޓްސް، ފިއުޗަރ ސްޕޯޓްސް، ރެޑްހޯކްސް ސްޕޯޓްސް ކުލަބު އަދި މިރޭގެ މެޗުގައި ކުޅޭ ކީންސް އަކީ އެއް މެނޭޖްމަންޓެއްގެ ދަށުން ހިނގާ ހަތަރު ކުލަބެވެ. މިފަހަރު މި މެނޭޖްމެންޓްގެ ދަށުން ހަޓީމެއް ވަނީ ބައިވެރިވެފައެވެ. މިޓީމުތައް ލީޑު ކުރަނީ ރާއްޖޭގައި މިވަގުތު ހުރި އެންމެ މޮޅު އެއް ކޯޗު އަލީ ސޮފީހް ސާމިރު (ސޮފީ ކޯޗް) އެވެ. މި ޓީމުތަކަށް އެހީތެރިވުމުގެ ގޮތުގައި ހޭންޑްބޯލް ސްޕޯޓްސް އެވޯރޑް އަށް ނޯމިނޭޓްވި ތިން ޕްލެޔާރސް ވެސް މި ކޯޗިންގް ޓީމްގައި އެކި ޓީމްގެ ކޯޗުންގެ ގޮތުގައި ހިމެނެއެވެ.

މުބާރާތުގެ އަންހެން ޑިވިޝަންގެ ފައިނަލް އޮތީ ހޯމަ ދުވަހުގެ ރޭ 20:30 ގައެވެ. ފިރިހެން ޑިވިޝަންގެ ފައިނަލް އޮތީ އަންގާރަ ދުވަހުގެ ރޭ 20:30 ގައެވެ.