1443 ވަނަ އަހަރު ރާއްޖެއިން ހައްޖަށް ދާ ހައްޖުވެރިންގެ ފަހު ގްރޫޕް މިރޭ ފުރާނެއެވެ.

ހައްޖުވެރިންނަށް ފަސޭހަކަމާއެކު އެއަރޕޯޓަށް ދިއުމުގެ އިންތިޒާމު ކަމާގުޅޭ މުއައްސަސާތަކާއެކު ހަމަޖައްސާފައިވާއިރު، ހައްޖާޖީންނަށް ފަސޭހަކޮށްދިނުމުގެ ގޮތުން، ކަނޑައެޅިފައިވާ ބަސްޕޮއިންޓްތަކުގައި އެހީތެރިވެދިނުމަށް މީހުން ތިބޭނެއެވެ.

މިރޭ ހައްޖުވެރިން އެއަރޕޯޓަށް ގެންދިއުމަށް މާލޭގައި ބަސްތަކުގެ ދަތުރުތައް އޮންނާނީ މަޖީދީމަގު, ފަރީދީމަގު, އޯކިޑުމަގު, އަމީނީމަގު އަދި ބޮޑުތަކުރުފާނު މަގުގައެވެ.

މިރޭ ހައްޖުވެރިން ފުރާއިރު، މޫސުން ގޯސްވުމާގުޅިގެން ބަސް ދަތުރުކުރާ ރޫޓްތަކަށް ވަނީ ބަދަލުގެނެސްފައެވެ. އެގޮތުން ވިއްސާރަވެއްޖެނަމަ ހައްޖުވެރިންނަށް ހިޔާވެވޭނެކަހަލަ ތަންތަން ވަނީ ހަމަޖައްސާފައެވެ.

ހައްޖުވެރިން އެއަރޕޯޓަށް ގެންދިއުމަށް ހަމަޖެހިފައިވާ ޕޮއިންޓްތަކަކީ، މަޖީޖީމަގު ހިމެނޭ ސަރަހައްދުގައި މާފަންނުން، ސްޓާރ ސިނަމާ ކައިރި، ކްލިކް ކޮމްޕިއުޓަރ، ސަންފްރަންޓް ކައިރި، މައްޗަންގޮޅިން އަގޯރާ ކައިރި، އުރީދޫ މޯލްޑިވްސް، އަދި ހެންވޭރުން އިބްރާހީމީ މިސްކިތް ކައިރި، އަދި ހެންވޭރު ކެލަމް ކައިރިންނެވެ.

އަމީނީ މަގުން އެސްޓީއޯ ސްޓާފް ކުއާރޓަރސް ކައިރި، ޣިޔާސުއްދީން ސްކޫލް ކައިރި، އެމްޑަބްލިއުއެސްސީ ކައިރި އަދި ސްޓެލްކޯ ކައިރިންނެވެ.

މީގެ އިތުރުން ފަރީދީމަގު/އޯކިޑުމަގު ސީ ސްޕޯޓްސް ކައިރި އަދި އެސްޓްރާބަން މޯލްޑިވްސް ކައިރިންނެވެ.

ބޮޑުތަކުރުފާނުމަގުން ޖެޓީ ނަންބަރު 5 ކައިރި އަދި އެމްޓީސީސީ ހެންވޭރު ފެރީޓަރމިނަލް ކައިރީގައި ބަސް އޮންނާނެއެވެ.

ހުޅުމާލެ ފޭސް 1ގެ ރެޑްވޭވް ސިޓީ ސްކޮޔަރ، ހުޅުމާލޭ ހޮސްޕިޓަލް ކައިރި، މެއިން ބަސް ސްޓޮޕް، އަދި N1 ބަސް ސްޓޮޕް ކައިރިއާއި އަމީން އެވެނިއު ކުރިމަތީގައި ހުންނަ ބަސް ސްޓޮޕްގައި ހައްޖުވެރިންނަށް ޚާއްސަ ބަސް އޮންނާނެއެވެ.

ހުޅުމާލެ ފޭސް 2ގެ އެމްޓީސީސީ ބީޗް ސައިޑް ބަސް ސްޓޭޝަންގައި ބަސް އޮންނާނެއެވެ.

ހުރިހާ ބަހެއްގެ ދަތުރުވެސް މިރޭ ފަށާނީ ރޭގަނޑު 7 ޖަހާއިރުއެވެ.

ހައްޖުވެރިންނާއެކު ބަސްތައް ދަތުރުކުރަމުންދާއިރު މި ބަސްތަކަށް ދަތިނުވާނެގޮތަށް ދިވެހި ފުލުހުންގެ ޚިދުމަތުން ޓްރެފިކް ބަލަހައްޓާނެއެވެ. ހައްޖުވެރިންގެ ކަންތައްތަކުގައި މާލެއާއި ހުޅުމާލެ، އަދި އެއަރޕޯޓްތެރެއިންވެސް ކަމާގުޅޭ މުއައްސަސާތަކުން ދާނީ އެހީތެރިކަން ފޯރުކޮށްދެމުންނެވެ.

މިރޭ ހައްޖުވެރިންގެ ފްލައިޓް ފުރާނީ ރާއްޖެގަޑިން 8:30ގައެވެ. ސައޫދީ އެއާލައިންއިން ހައްޖުވެރިންގެ ދަތުރު ހަމަޖެހިފައިވާއިރު މިރޭ 115 ހައްޖާޖީން ފުރުމަށްވަނީ ހަމަޖެހިފައެވެ. މިރޭ ހައްޖުވެރިން ފުރުވަން ދާ މީހުން އަނބުރާ އައުމަށް ހުޅުލޭ ޕާކިންގ އޭރިއާގައި ރޭގަނޑު 8:00ން 9:30ށް ބަސްދަތުރުތައް އޮންނާނެއެވެ.