ތ. ތިމަަރަފުށީ އެއަރޕޯޓުގެ ރަންވޭއަށް އުދަ އަރާތީ އެ އެއަރޕޯޓުގެ އޮޕަރޭޝަންތައް ވަގުތީގޮތުން މެދުކަނޑާލައިފިއެވެ.
ތިމަރަފުށީ އެއަރޕޯޓު ހިންގަމުން އަންނަ އައިލެންޑް އޭވިއޭޝަނުން "ރާއްޖެ އެމްވީ" އަށް ބުނީ ހުކުރު ދުވަހުގެ ރެއިން ފެށިގެން ޚިދުމަތް މެދުކަނޑާލައިފައިވާ ކަމަށެވެ. މިގޮތުން، ރޭގެ ފްލައިޓުތައް ވެސް ފަހުން ވަގުތަކަށް ރީޝެޑިއުލް ކުރި ކަމަށާއި ނަމަވެސް ރަންވޭ އަށް އުދަ އަރާތީ ދަތުރުތައް މެދުކަނޑާލަން ޖެހުނީ ކަމަށް އައިލެންޑް އޭވިއޭޝަނުން ބުނެފައިވެއެވެ.
އެ ކުންފުނިން މައުލޫމާތު ދޭ ގޮތުގައި ދެން ދަތުރުތައް އެ އެއަރޕޯޓަށް ފަށާނީ ރަންވޭއެއްކޮން ސާފުކޮށް ނިމުމުންނެވެ. އެ މަސައްކަތް މިހާރު ކުރިއަށްދާ ކަމަށް އައިލެންޑް އޭވިއޭޝަނުން ބުނެއެވެ.
ހުކުރު ދުވަހުގެ ރެއިން ފެށިގެން ހޮނިހިރު ދުވަހުގެ ހެނދުނު ވެސް ތިމަރަފުއްޓަށް ވަނީ އުދަ އަރާފައެވެ. މީގެ ސަބަބުން އެއަރޕޯޓާއި ރަށުގައި ފެންބޮޑުވެފައިވާއިރު ފެން ހިންދުމަށް އެމްއެންޑީއެފުން ދަނީ މަސައްކަތް ކުރަމުންނެވެ.
ތިމަރަފުއްޓަށް އުދަ އެރުމުގެ ސަބަބުން އެއަރޕޯޓުގެ އިތުރުން އެ ރަށުގެ ގެތަކަށްވެސް ވަނީ އެކިވަރުގެ ގެއްލުންތައް ވެފައެވެ. އެގޮތުން އެ ރަށުގެ ތިރީހެއްހާ އާއިލާއަށް ވަގުތީ ހިޔާވަހިކަން ފޯރުކޮށްދީ 1 އާއިލާ ކައުންސިލުގެ ބެލުމުގެ ދަށުގައި ތިބި ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އިން ބުނެފައިވެއެވެ،
