އެންމެ އެންޓެނާ ޓަވަރެއް ގުޑުވާލުމަކީ ވެސް މުޅި މުވާސަލާތީ ޚިދުމަތްތަކަށް ބޮޑު އަސަރެއް ކުރާނެ ކަމެއް – މިނިސްޓަރު ޝައުނާ
އެންޓެނާ ޓަވަރެއް ނަގައިގެން އެހެންތަނަކަށް ގެންދިއުމަކީ ގޮންޖެހުންބޮޑު ކަމެއް
މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާއާ ސުވާލުކުރެއްވުން
މުވާސަލާތީ ބޮޑެތި އެންޓެނާ ޓަވަރުތަކުގެ ތެރެއިން އެންމެ އެންޓެނާ ޓަވަރެއް ގުޑުވާލުމަކީ ވެސް މުޅި ރާއްޖޭގެ މުވާސަލާތީ ހިދުމަތްތަކަށް އެކަމުން ވަރަށް ބޮޑު އަސަރުކުރާނެ ކަމެއް ކަމަށް މިނިސްޓަރ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އައިމިނަތު ޝައުނާ ވިދާޅުވެއްޖެއެވެ.
މިނިސްޓަރު ޝައުނާ މިހެން ވިދާޅުވި ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ހަސަން ޝިޔާން، ލިޔުމުން ޖަވާބު ހޯއްދެވުމަށް މިނިސްޓަރަށް ފޮނުއްވި ސުވާލުގެ ޖަވާބުގައެވެ. މިނިސްޓަރު ވިދާޅުވީ ރާއްޖޭގެ ރަށްރަށުގައި މުވާސަލާތީ ހިދުމަތްތައް ފޯރުކޮށްދިނުމަށްޓަކައި ގާއިމްކުރެވިފައިވާ ބޮޑެތި ޓަވަރުތަކަކީ އެ ޓަވަރެއް ގާއިމްކުރެވިފައިވާ ރަށުގެ އިތުރުން، މުޅި ރާއްޖެއަށް މުވާސަލާތީ ހިދުމަތްތައް ދިނުމުގައި ބޭނުންކުރެވޭ އެންޓެނާ ތަކެއް ކަމަށެވެ. އަދި މި އެންޓެނާތައް ގާއިމްކުރިއިރު، އެ މަސައްކަތްކޮށްފައި ވަނީ ކަމާއިބެހޭ އިދާރާތަކުގެ މަޝްވަރާއާއެކު، އެކަމަށްޓަކައި ރަށު އޮފީސް ނުވަތަ ކައުންސިލުން ދޫކޮށްފައިވާ ބިންތަކުގައި ކަމަށެވެ.
އެގޮތުން ގާއިމްކޮށްފައިވާ މުވާސަލާތީ ހިދުމަތުގައި ބޭނުންކުރާ ހުރިހާ ޓަވަރުތަކަކީ ވެސް ރައްކާތެރިކަމުގެ ގޮތުން، ބައިނަލްއަގުވާމީ މިންގަޑުތަކާއި އެއްގޮތަށް ޖަހާފައިވާ ޓަވަރުތަކެއް ކަމަށެވެ. އަދި މުވާސަލާތީ ބޮޑެތި އެންޓެނާ ޓަވަރުތައް ގާއިމް ކުރެވިފައި ވަނީ މުޅި ރާއްޖޭގޭ ޖިއޮގްރަފީއަށް ރިއާޔަތްކޮށް، ކަނޑައެޅިފައިވާ ލޮކޭޝަންތަކެއްގެ މައްޗަށް ޑިޒައިން ކުރެވިގެން ކަމަށެވެ. އަދި މިފަދަ އެންމެ އެންޓެނާ ޓަވަރެއް ގުޑުވާލުމަކީ ވެސް މުޅި ރާއްޖޭގެ މުވާސަލާތީ ހިދުމަތްތަކަށް އެކަމުން ވަރަށް ބޮޑަށް އަސަރުކުރާނެ ކަމެއް ކަމަށެވެ.
މިނިސްޓަރު ވިދާޅުވެފައިވަނީ އެންޓެނާ ޓަވަރެއް މިހާރު މީހުން ދިރިއުޅޭ ސަރަހައްދާއި ދުރަށް ޖެއްސި ނަމަވެސް، ރާއްޖޭގެ ރަށްތައް ތަރައްގީވަމުންދާގޮތަށް ބަލާއިރު، އެ ސަރަހައްދު ވެސް ކައިރި މުސްތަގުބަލެއްގައި އާބާދުވުމުގެ ފުރުސަތު ވަރަށް ބޮޑު ކަމަށެވެ. އެންޓެނާ ޓަވަރުތައް އެންމެ ފުރަތަމަ ޖަހާފައިވަނީ ވެސް މީހުން ދިރިއުޅޭ ސަރަހައްދުތަކާއި ނިސްބަތުން ދުރުވާގޮތަށް ބަލައިގެން ކަމަށް މިނިސްޓަރު ވިދާޅުވިއެވެ. ނަމަވެސް ރަށްތަކުގެ އުމްރާނީ ތަރައްގީއާއިއެކު ބައެއް ޓަވަރުތައް މީހުން ދިރިއުޅޭ ސަރަހައްދުތަކާއި ކައިރިވެފައިވާ ކަމަށް މިނިސްޓަރު ވިދާޅުވިއެވެ.
އެންޓެނާ ޓަވަރުތައް ގާއިމްކުރެވިފައިވަނީ މި ކަންކަމުގެ މައްޗަށް ވަރަށް ބޮޑަށް ރިއާޔަތް ކުރެވިގެން ކަމުގައި ވީނަމަވެސް، އެންޓެނާ ޓަވަރަކުން ރައްޔިތުންނަށް އެއްވެސް ގެއްލުމެއް ލިބިދާނެ ކަމަށް ފާހަގަވެއްޖެނަމަ، އެ ޓަވަރެއް ވަގުތުން ދުރަށް ޖެއްސުމަށް މަސައްކަތް ކުރާނެ ކަމަށް މިނިސްޓަރު ވިދާޅުވިއެވެ.
އަދި އެނޫން ސަބަބަކާއި ހުރެވެސް އެންޓެނާ ޓަވަރެއް އެހެން ސަރަހައްދަކަށް ކޮންމެހެން ބަދަލުކުރަން ޖެހިއްޖެނަމަ، ކަމާއިބެހޭ ފަރާތްތަކާއިއެކު މަޝްވަރާކޮށް އެކަންކުރަން މަސައްކަތް ކުރައްވާނެ ކަމަށް މިނިސްޓަރުގެ ޖަވާބުގައި ވަނީ ވިދާޅުވެފައެވެ.
