ވައިކަރަދޫ ދާއިރާގެ މެމްބަރު ހުސައިން ޒިޔާދުގެ ނަން އޭނާއަށް ނޭނގި މޯލްޑިވްސް ނޭޝަނަލް ޕާޓީ (އެމްއެންޕީ)ގެ ދަފްތަރުގައި 6 މަސް ދުވަސްވަންދެން އޮތް މަައްސަލަ އިލެކްޝަންސް ކޮމިޝަނުން ބަލަން ފަށާފައިވާއިރު އެ ޕާޓީ ޖަވާބުދާރީ ކުރުވުމުގެ މަސައްކަތް ކުރިއަށްދާ ކަމަށް އެކޮމިޝަނުގެ ސެކެޓްރީ ޖެނެރަލް ހަސަން ޒަކަރިއްޔާ ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ހަސަން ވިދާޅުވީ އެމްއެންޕީގެ ބައެއް އިސްފަރާތްތައް ރާއްޖެއިން ބޭރުގައި ތިއްބެވުމާއި ގުޅިގެން ލަސްވި ނަމަވެސް އެކަން ހިނގާދިޔަ ގޮތް ބެލުމަށްފަހު ޕާޓީ ޖަވާބުދާރީ ކުރުވާނެކަމަށާއި އަދި ފިޔަވަޅު އަޅާނެ ކަމަށެވެ.

މި މައްސަލަ ރައްޔިތުންގެ މަޖިލީހުން ވެސް ބަލަން ވަނީ ނިންމާފައެވެ. މެމްބަރު ޒިޔާދުއަށް އޭނާ ޕާޓީ ބަދަލުކޮށްފައިވާކަން އެނގިވަޑައިގެންނެވީ މިދިޔަ މަހުގެ 29 ގައި އޮތް އެމްޑީޕީގެ ގައުމީ މަޖިލީހުގެ ޖަލްސާގައި އީސީއަށް މެސެޖް ކުރުމުން ކަމަށް ވަނީ ވިދާޅުވެފައެވެ.

މިކަމާއި ގުޅިގެން ޖޫން މަހުގެ 7 ވަނަ ދުވަހު ރައްޔިތުންގެ މަޖިލީހަށް ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު ހުށަހެޅުއްވި މައްސަލައަށް ވާހަކަދައްކަވަމުން މެމްބަރު ޒިޔާދު ވިދާޅުވީ، އޭނާ މަޖިލިސް އިންތިޚާބުގައި ވާދަކުރެއްވީވެސް އަދި މިހާތަނަށް ދެމިހުންނެވީވެސް އެމްޑީޕީ މެމްބަރެއްގެ ގޮތުގައި ކަމަށެވެ. އެހެންނަމަވެސް ނޭނގި އެހެން ޕާޓީއެއްގެ މެމްބަރެއްގެ ގޮތުގައި މަޖިލީހުގައި ހުންނަވާތާ މިހާރު 6 މަސްވެފައިވާ ކަމަށެވެ. އަދި މަޖިލިސް މެމްބަރެއް ޕާޓީ ބަދަލުކުރަންޖެހޭ އުސޫލްތައް އޮންނައިރު، އީސީގައި އެމްއެންޕީ މެންބަރުންގެ ދަފްތަރުގައި އޮންނަތާ 6 މަސްވެފައިވާ ކަމަށެވެ. ޒިޔާދު ވިދާޅުވީ ހެދިފައިވާ އުސޫލުތަކުގެ ގޮތުން އެއް ޕާޓީން އަނެއް ޕާޓީއަށް މީހުން ބަދަލުކުރުމުގެ މަގުފަހިވަނީ ކަމަށް ގަބޫލުނުކުރެވެނީ، އޭނާއާމެދު ކަންހިގާފައިވާ ގޮތުން ކަމަށެވެ. އެކަން ތަފްސީލް ކޮށްދެއްވަމުން ޒިޔާދު ވިދާޅުވީ، އެމްއެންޕީއަށް ސޮއިކުރެއްވިކަމަށް ބުނާ ފޯމުގައި އޭނާގެ ސޮއި އަދި ފިންގަރ ޕްރިންޓްވެސް އެބައޮތް ކަމަށެވެ. އަދި ހެކިވެރިންނާއި އެމްއެންޕީގެ ރަޖިސްޓްރާވެސް ސޮއިކޮށްފައިވާކަމަށެވެ. މިއީ ޒިންމާދާރުކަން ކުޑަކޮށް ކޮށްފައިވާ ކަމެއް ކަމަށް ޒިޔާދު ވިދާޅުވިއެވެ.

ޒިޔާދު ވިދާޅުވީ ޕާޓީތަކުގެ ދަފްތަރު ބަލަހައްޓަން ޖެހޭނީ ޕާޓީތަކުން ކަމަށް ގަބޫލު ކުރައްވާ ކަމަށެވެ. އެކަން އެންމެ ރަނގަޅަށް ކުރެވޭނީވެސް ޕާޓީތަކަށް ކަމަށެވެ.

މެމްމަރު ޝަފީޤު ހުށަހެޅުއްވި މައްސަލައިގައި ބުނެފައިވަނީ، ސިޔާސީ ޕާޓީތަކަށް މީހުން ވެއްދުމާއި ބަދަލުކުރުމުގައި އެމީހުންގެ ބައިވެރިވުމެއް ނެތި އަމަލުކުރަމުން ދާކަމަށެވެ. އަދި ގާނޫނު އަސާސީގެ 30 ވަނަ މާއްދާގައި ބަޔާންކޮށްފައިވާ، ސިޔާސީ ޕާޓީތަކުގެ ހަރަކާތުގައި ބައިވެރިވުމުގެ ހައްގުގެ ބޭނުން ބައެއް ފަރާތްތަކުން ނަހަމަ ގޮތުގައި ހިފަމުންދާ ކަމަށެވެ.

އެފަދަ މީހުންގެ އަމަލުގެ ސަބަބުން ވަކި ސިޔާސީ ފިކުރެއްގައި މަސައްކަތް ކުރުމަށް ބޭނުންވާ މީހުންނަށް އެ ހައްގު ގެއްލިފައިވާ ކަމަށް ޝަފީގް ހުށައެޅުއްވި މިމައްސަލައިގައި ބުނެފައިވެއެވެ. އަދި އެ މީހުންގެ ހައްގު ނަގާލައި، ނުހައްގު މާލީ މަންފާއާ ގެއްލުން ސިޔާސީ ޕާޓީތަކަށް ލިބެމުންދާ ކަމަށެވެ. މިފަދަ ޝަކުވާތައް ބެލުމުގައި އިލެކްޝަންސް ކޮމިޝަނުން އަމަލުކުރާ ގޮތުން އިތުރު މައްސަލަތައް ކުރިމަތިވަމުން ދިޔުމާއި، ސިޔާސީ ޕާޓީގެ ނިޒާމަށް ރައްޔިތުންގެ އިތުބާރު ކުޑަވަމުންދާތީ، އެކަމުގެ ޝަކުވާ ރައްޔިތުންގެ ފަރާތުން ލިބެމުން އަންނަ ކަމަށްވެސް މިމައްސަލައިގައި ބުނެފައިވެއެވެ.

އިލެކްޝަންސް ކޮމިޝަނުންވަނީ ނުގަވާއިދުން ޕާޓީއަށް މީހުން ވެއްދުމަށް ހުށަހަޅާ ކޮންމެ ފޯމެއް 10،000 ރުފިޔާއިން ޖޫރިމަނާ ކުރުމަށްވެސް ނިންމާފައެވެ.