"އައިލެންޑް ލައިފް" މެގަޒިންގެ 6 ވަނަ އެޑިޝަން ނެރެފި

ޔޫއެންޑީޕީ "އައިލެންޑް ލައިފް" މެގަޒިންގެ 6 ވަނަ އެޑިޝަން ނެރެފިއެވެ.

މި އެޑިޝަން ނެރެފައިވަނީ ވެލާނާ އިންޓަރނޭޝަނަލް އެއަރޕޯޓުގައި އާދިއްތަ ދުވަހު ބޭއްވި ރަސްމިއްޔާތެއްގައެވެ.

ޔޫއެންޑީޕީން ސިލްސިލާކޮށް ނެރެމުންދާ އައިލެންޑް ލައިފް މެގަޒިނަކީ ރާއްޖޭގެ ތަރައްގީއާއެކު ދިވެހިންނަށް ކުރިމަތިވާ ގޮންޖެހުންތަކުގެ ވާހަކަތަކުގެ މައްޗަށް ބިނާކޮށް ނެރޭ މެގަޒިނެކެވެ. އަދި މިކަންކަން ހައްލުކުރުމަށް ޔޫއެންޑީޕީން ޕާޓްނަރުންނާ ގުޅިގެން ކުރާ މަސައްކަތްތައް މި މެގަޒިންގައި ހިމަނާފައި ވެއެވެ.

މި މެގަޒިން ނެރުމަށްފަހު ޔޫއެންޑީޕީއާ ދިވެހިރާއްޖޭގެ ގައުމީ އެއަރލައިން މޯލްޑިވިއަންއިން ވަނީ މޫސުމީ ބަދަލުތަކަށް ހޭނި، އެކަންކަމުން އަރައިގަތުމަށް މަސައްކަތްކުރުމަށާއި، ސަސްޓެއިނަބަލް ޑިވެލޮޕްމެންޓް ގޯލްސް (އެސްޑީޖީ)ތައް ޕްރޮމޯޓްކުރުމަށް ގުޅިގެން މަސައްކަތްކުރުމަށް އެއްބަސްވެފައެވެ.

މި ރަސްމިއްޔާތުގައި ސްޕެޝަލް އެންވޯއީ ފޮރ ކްލައިމެޓް ޗޭންޖް ސަބްރާ އިބްރާހިމް ނޫރައްދީންއާއި، ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ޚަލީލާއި، ޔޫއެންޑީޕީގެ ފަރާތުން ރާއްޖެ ތަމްސީލުކުރައްވާ ބޭފުޅުން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ވާހަކަދައްކަވަމުން ސްޕެޝަލް އެންވޯއީ ފޮރ ކްލައިމެޓް ޗޭންޖް ސަބްރާ އިބްރާހިމް ނޫރައްދީން ވިދާޅުވީ ތަރައްގީގެ މަޝްރޫއުތައް ހިންގާއިރު ތިމާވެއްޓަށް ލިބޭ ގެއްލުންތަކާއިމެދު ވިސްނާލުން މުހިންމު ކަމަށެވެ. އެހެންނަމަވެސް ތިމާވެއްޓަށް ގެއްލުން ނުވާނެހެން މިކަންކަން ކުރުމަކީ ގޮންޖެހުން ބޮޑު ކަމެއް ކަމަށް ސަބްރާ ވިދާޅުވިއެވެ.