ކުމުންދޫގައި "ޒީރު ސްޕޯޓްސް"ގެ ނަމުގައި އެކަޑެމީއެއް ހުޅުވައިފި

ހދ. ކުމުންދޫ ކުރެވި ޖަމިއްޔާއިން އިސްނަގައިގެން އެ ޖަމިއްޔާގެ ކުޅިވަރު ވިންގުގެ ދަށުން ކުމުންދޫގައި "ޒީރު ސްޕޯޓްސް"ގެ ނަމުގައި އެކަޑެމީއެއް ހުޅުވައިފި އެވެ.

އެރަށު ކުރެވި ޖަމިއްޔާގެ ނައިބު ރައީސް ފާރިސް އަބްދުލް ގައްޔޫމް ވިދާޅުވީ މި ވަގުތު ހަމަ އެކަނި ފިރިހެން ކުދިންނަށް ފުޓުބޯޅަ ކުޅުމުގެ ފުރުޞަތު ހުޅުވާލެވިފައިވީ ނަމަވެސް ކުރިއަށް އޮތްތަނުގައި ނެޓް ބޯޅަވެސް ކުޅުންވެސް ކުރިއަށްގެންދަން ރާވާފައިވާކަމަށެވެ.

ބުދަ ދުވަހު ހަވީރު 16:30ގައި އެރަށު ފުޓްސަލް ދަނޑުގައި ކުލަގަދަ ރަސްމިއްޔާތަކާއި އެކު މި އެކަޑެމީ ހުޅުވައިދެއްވީ ރާއްޖޭގެ މަޝްހޫރު ފުޓްބޯޅަ ކުޅުންތެރިޔާ އަލީ އަޝްފާގު އަދި ލަވަކިޔުންތެރިޔާ ޝަލަބީ އިބްރާހިމެވެ. އެކަޑެމީގައި ބައިވެރިވެވޭނެ އުމުރު ފުރާތަކަކީ 7 އަހަރާ 9 އަހަރާއި ދެމެދުގެ އިތުރުން 10 އަހަރާއި 13 އަހަރާއި ދެމެދު އަދި 13 އަހަރުން މަތީގެ އުމުރު ފުރާއަށެވެ.

ކުރެވި ޖަމްއިއްޔާއިން މައުލޫމާތުދިން ގޮތުގައި މި އެކަޑެމީ ހުޅުވުމުގެ މަގްޞަދަކީ ގައުމީ ފެންވަރުގައި ފާހަގަކޮށްލެވޭ ކުޅުންތެރިންތަކެއް އުފެއްދުމެވެ. އަދި މިވަގުތު އެކަޑެމީގައި އެކި އުމުރު ފުރާތަކުން ޖުމްލަ 41 ކުދިން ދަނީ ތަމްރީނު ކުރަމުން ކަމަށެވެ.