ކުމުންދޫ ސްކޫލްގައި 12 ކްލާސްރޫމްގެ އައު އިމާރާތް އެޅުމަށް ހަވާލުކޮށްފި
މި މަސައްކަތް އެކުންފުންޏާ ހަވާލުކޮށްފައިވަނީ 12,616,224.72 ރުފިޔާއަށް، އެއް އަހަރުން ނިންމާ ގޮތަށް
ކުމުންދޫ ސްކޫލްގައި 12 ކުލާސް ރޫމްގެ އިމާރާތް އެޅުމަށް ހަވާލުކުރި ރަސްމިއްޔާތުގެ ތެރެއިން
ހދ. ކުމުންދޫ ސްކޫލްގައި 12 ކްލާސްރޫމްގެ އައު ޢިމާރާތް އެޅުމަށް، އެޑިއުކޭޝަން މިނިސްޓްރީއިން ބަޔަކާ ހަވާލުކޮށްފިއެވެ.
އެޑިއުކޭޝަން މިނިސްޓްރީން މި މަސައްކަތް ހަވާލުކޮށްފައިވަނީ ވޭވް ލެންތް ޕްރައިވެޓް ލިމިޓެޑް އާއެވެ. އެ މިނިސްޓްރީގައި ބުދަ ދުވަހު ކުރިއަށްދިޔަ ރަސްމިއްޔާތެއްގައި އެކުންފުންޏާ އެކު މި މަސައްކަތް ހަވާލުކުރިކަމުގެ އެއްބަސްވުމެއްގައިވަނީ ސޮއިކޮށްފައެވެ.
އެޑިއުކޭޝަން މިނިސްޓްރީއިން މައުލޫމާތު ދީފައިވާ ގޮތުގައި މި މަސައްކަތާ ވޭވް ލެންތް ޕްރައިވެޓް ލިމިޓެޑުން ހަވާލުވެފައި ވަނީ އެއް އަހަރު ދުވަހުގެ ތެރޭގައި މަސައްކަތް ނިންމާ ގޮތަކަށެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ 12,616,224.72 (ބާރަ މިލިއަން ހަލައްކަ ސޯޅަހާސް ދުއިސައްތަ ސައުވީސް ރުފިޔާ ހަތްދިހަ ދެ ލާރި) އަށެވެ.
ކުމުންދޫ ސުކޫލުގައި 12 ކުލާސްރޫމްގެ އައު އިމާރާތެއް އަޅުއްވާނެ ކަމުގައި ރައީސް އިބްރާހިމް މުޙައްމަދު ޞާލިޙް މި އަހަރު އޮގަސްޓް މަހު އެ ސުކޫލަށް ކުރެއްވި ޒިޔާރަތުގައި ވަނީ ވިދާޅުވެފައެވެ.
