ކުމުންދޫ ނޭޗަރ ޕާކުގައި ރޯކޮށްލައި، އެތަނަށް ގެއްލުންދިން މައްސަލަ ފުލުހުން ތަހުގީގު ކުރަނީ

ކުމުންދޫ ކަނޑޫފަލުގައި ތަރައްގީ ކޮށްފައިވާ ނޭޗަރ ޕާކުގައި ރޯކޮށްލައި، އެތަނަށް ގެއްލުން ދިން މައްސަލަ ފުލުހުން ތަހުގީގުކުރަން ފަށައިފިއެވެ.

"ވެހިސަރާ" ގެ ނަމުން ނަން ދީފައިވާ މި ޕާކަކީ ރަށުގެ ޤުދުރަތީ ރީތިކަން މުޅި ރާއްޖެއަށް ދައްކާލައި، ކަނޑޫފަލުގެ ފުރިހަމަ ބޭނުންތެރިކަން ދުނިޔެއަށްވެސް ދައްކައިދިނުމުގެ މަޤްސަދުގައި ތައްޔާރުކޮށްފައިވާ ޕާކެކެވެ.

ރާއްޖެއެމްވީއާ ވާހަކަ ދައްކަމުން ކުމުންދޫ ކައުންސިލުން ބުނީ، މި ޕާކުގައި ރޯކޮށްލާފައިވަނީ ހޯމަ ދުވަހުގެ ރޭ ފަތިހުގެ ވަގުތެއްގައި ކަމަށެވެ. އެކަން ކުރީ ކޮން ބައެއްކަން އަދި އެމީހުންގެ މަޤްސަދެއް ނޭނގޭކަން ފާހަގަކޮށް ކައުންސިލުން ބުނީ، އެ މައްސަލަ މިހާރު ފުލުހުންވެސް ތަހުގީގު ކުރަމުންދާ ކަމަށެވެ.

އަލިފާނުގެ ސަބަބުން ޕާކުގައި ހުރި 12 ފޫޓުގެ ހަޓް ވަނީ މުޅިން އަނދާ ހުލިވެފައެވެ. އަދި ތަނުގެ ވޯކްވޭއަށްވެސް ގެއްލުންވެފައިވާއިރު، އެތަނުގައި ހުރި ބައްތިތައްވެސް ހަލާކުކޮށްލާފައިވާކަމަށް ކައުންސިލުން މައުލޫމާތު ދެއެވެ.

އޭގެ އިތުރުން، އެތަނުގައި ބޭނުންކުރި ކެނޯވެސް އަންދާލައި، ގެއްލުން ދީފައިވާކަމަށް ކައުންސިލުގެ ފަރާތުން ރާއްޖެއެމްވީއާ ވާހަކަދައްކަމުން ބުނެފައިވެއެވެ.

ކުމުންދޫ ކުުރެވި ޖަމިއްޔާއިން ހިންގާ "ޒީރް ސްޕޯޓްސް ކުލަބް"ން މި ޕާކް ހުޅުވާފައިވަނީ 5 ސެޕްޓެމްބަރު 2020 ގައެވެ. މި ނޭޗަރ ޕާކާއެކު އެރަށަށް ދަތުރުކުރާ މީހުންގެ އަދަދު އިތުރުވެފައިވާ ކަމުގެ މައުލޫމާތު ލިބެއެވެ. 

ކުމުންދޫގެ ކުޅީގައި ރައީސްގެ ދެކަނބަލުން ނެންގެވި ފޮޓޯއަށްވެސް ގިނަ ބައެއްގެ ސަމާލުކަން ލިބިގެން ގޮސްފައިވެއެވެ. އެގޮތުން އަތޮޅުތެރެއަށް ކުރެއްވި ދަތުރުފުޅުގައި ހދ. ކުމުންދޫގެ ކުޅިއަށް ރައީސްގެ ދެކަނބަލުން ވަނީ ޒިޔާރަތް ކުރައްވާފައެވެ.