ތައިލަންޑުގައި ކެނަބިސްގެ ވިޔަފާރި ވަކި ހުދޫދެއްގެތެރެއިން ހުއްދަކޮށްފި

ޑްރަގްގެ ބާވަތެއްކަމަށްވާ މެރުއާނާ ނުވަތަ ދިވެހިންގެތެރޭގައި އާންމު ނަމުންނަމަ "ފަތް" އުފައްދަނީ ކެނަބިސްގަހުގެ ފަތުން ކަމަށްވާއިރު, މިގަސް ވަކި ހުދޫދެއްގެ ތެރެއިން ހައްދައި އޭގެ ވިޔަފާރިކުރުން ތައިލަންޑްގައި ހުއްދަކޮށްފިއެވެ. އަދި ކެނަބިސް ގަސް ވަނީ މަނާކޮށްފައިވާ ނާކޮޓިކް ލިސްޓުން ނަގާފައެވެ.

މިއާއެކު ތައިލަންޑްމިވަނީ މުޅި ދެކުނު އިރުމަތީ އޭޝިޔާގަވެސް ކެނަބިސް މިފަދަ ގޮތަކަށް ހުއްދަކުރި ފުރަތަމަ ގައުމަށް ވެފައެވެ. މިގެނެވުނު ބަދަލާއެކު، ބުރާސްފަތި ދުވަހުން ފެށިގެން ތައިލަންޑްގެ ރައްޔިތުންނަށް ގޭގައި ކެނަބިސް ގަސް ޕޮޓްގައި ހެއްދިދާނެއެވެ. ނަމަވެސް މިހެން ހެއްދޭނީ ގިނަވެގެން 6 ގަހެވެ. ނަމަވެސް މިކަން ކުރުމަށް ހުއްދަ ނަގަން ޖެހެއެވެ. މީގެ އިތުރުން ހުއްދަ ނަގައިގެން ފުޅާދާއިރާއެއްގައިވެސް ކެނަބިސް ހެއްދޭނެކަމަށް ބީބީސީން ރިޕޯޓްކޮށްފައިވެއެވެ.

ކެނަބިސް ހުއްދަ ކުރުމަށް ތައިލަންޑްގައި މިގެނެވުނު ބަދަލުގެ ދަށުން ހުއްދަދީފައިވަނީ، ކާބޯތަކެތި ތައްޔާރުކުމުގައި ވަކި މިންވަރަކަށް ކެނަބިސްފަތް ބޭނުންކުރުމަށް އެކަންޏެވެ. މިގޮތުން އެ ކެއުމެއްގައި ނުވަތަ ބުއިމެއްގައި މަސްތުވާ ބާވަތް 0.2 އިންސައްތަޔަށްވުރެ އިތުރުވެގެންނުވާނެއެވެ.

ތައިލަންޑްގައި އަދިވެސް މަސްތުވުމަށް މަރުވާނާ ބޭނުންކުރުމަކީ މަނާކަމެކެވެ.

ތައިލަންޑްގެ ޑެޕިއުޓީ ޕްރިމިނިސްޓަރ އަދި ހެލްތު މިނިސްޓަރ އަނޫތިން ޗާންވިރިއަކުލް ވިދާޅުވީ، ކެނަބިސް ވަކި މިންވަރަކަށް ހުއްދަކުރުމުގެ ބޭނުމަކީ އާންމުންނާއި އަދި ސަރުކާރަށްވެސް އާމްދަނީ ލިބޭނެ އިތުރު ފުރުސަތެއް ހޯދައިދިނުމެވެ. އޭނާގެ ސޯޝަލް މީޑިޔާގައި މިދިޔަމަހު ވަނީ ކެނަބިސް ބޭނުން ކޮށްގެން ތައްޔާރު ކުރާ ކުކުޅުގެ ކެއުމުގެ ބާވަތެއް ދައްކަވާލައްވާފައެވެ.

ތައިލަންޑްގެ ޑްރަގް ގަވާއިދަށް މިގެނެވުނު ބަދަލާ ގުޅިގެން ހަތަރު ހާހެއްހާ ކުށްވެރިންވެސް ދޫކުރެވޭނެ ކަމަށް ވެއެވެ. މިމީހުންނަކީ ކެނަބިހާ ގުޅުންހުރި އެކި ކުށްތަކުގައި ހައްޔަރުކޮށްފައިވާ މީހުންނެވެ.