މެއި މަހު ޑެންގޫ ކޭސްތައް ރެކޯޑު އަދަދަކަށް ގިނަ
މެއި މަހު ޑެންގީ ހުމުގެ 185 ކޭސް ރިޕޯޓުކޮށްފައިވޭ
ޑެންގޫ ހުން އިތުރުވާތީ މާލެ ފޮގްކުރަނީ
މިދިޔަ މެއި މަހު ޑެންގޫ ޖެހިގެން ރިޕޯޓުކުރި މީހުންގެ އަދަދު ރެކޯޑު އަދަދަކަށް އިތުރުވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ "ރޯގާގެ ގޮތުގައި ފެތުރެމުންދާ ބަލިތަކުގެ ހާލަތު" ގައި ވާގޮތުން ވޭތުވެދިޔަ އަހަރާ އަޅާ ބަލާއިރު މިއަހަރުގެ މިހާތަނަށް ޑެންގީ ހުން ޖެހިގެން ރިޕޯޓުކޮށްފައިވާ އަދަދުވެސް ވަނީ އިތުރުވެފައެވެ.
މިދިޔަ މެއި މަހު ޑެންގީ ހުމުގެ 185 ކޭސް ރިޕޯޓުކޮށްފައިވެއެވެ. އޭގެ ކުރިން އޭޕްރިލް މަހު ރިޕޯޓުކޮށްފައިވަނީ 92 ކޭސްއެކެވެ. މެއި މަހުގެ ފަހު ހަފްތާގައި އެކަނިވެސް 73 ކޭސް ރިޕޯޓުކޮށްފައިވާއިރު، އޭޕްރިލް މަހުގެ ފަހު ހަފްތާގައި ރިޕޯޓުކޮށްފައިވަނީ 32 ކޭސްއެކެވެ.
މީގެ އިތުރުން މިދިޔަ މަހު ރިޕޯޓުކޮށްފައިވާ އަރިދަފުސް ރޯގާގެ ކޭސްތައްވެސް ވަނީ އޭގެ ކުރީ މަހާ އަޅާ ބަލާއިރު އިތުރުވެފައެވެ. އޭޕްރިލް މަހު ރިޕޯޓުކޮށްފައިވަނީ އަރިދަފުސް ރޯގާގެ 12،978 ކޭސްއެވެ. މެއި މަހު 13،361 ކޭސް ރިޕޯޓުކޮށްފައެވެ. ވޭތުވެދިޔަ އަހަރާ އަޅާ ބަލާއިރު މިހާތަނަށް އަރިދަފުސް ރޯގާ ޖެހިގެން ރިޕޯޓުކޮށްފައިވާ ކޭސްތައްވެސް އިތުރުވެފައިވާކަމަށް އެޗްޕީއޭއިން ހާމަކޮށްފައިވެއެވެ.
މީގެ އިތުރުން ބޭރަށް ހިންގުންވެސް ނިމިދިޔަ މެއި މަހު އިތުރުވެފައިވާކަމަށް އެޗްޕީއޭއިން ހާމަކޮށްފައިވެއެވެ. މިގޮތުން މެއި މަހު ބޭރަށް ހިންގުމުގެ 1،575 ކޭސް ރިޕޯޓުކޮށްފައިވާއިރު، މެއި މަހު ރިޕޯޓުކޮށްފައިވަނީ 1،824 ކޭސް ކަމަށް އެޗްޕީއޭއިން ބުނެއެވެ. މިދިޔަ އަހަރުގެ މިހާތަނާ އަޅާ ބަލާއިރު މިއަހަރުގެ މިހާތަނަށް ބޭރަށް ހިންގުން ޖެހިގެން ރިޕޯޓުކުރި މިންވަރުވެސް ވަނީ އިތުރުވެފައެވެ.
މި ދަނޑިވަޅުގައި އާންމު ރޯގާތައް އިތުރުވަމުންދާތީ އެޗްޕިއޭއިން ވަނީ މިކަމަށް އިތުރަށް ސަމާލުވުމަށް އިލްތިމާސްކޮށްފައެވެ. މިގޮތުން ބަލިތަކުން ރައްކާތެރިވެތިބުމަށް އެޅޭނެ ފިިޔަވަޅުތައް އެޅުމަށް އިލްތިމާސްކޮށްފައިވެއެވެ.
