ކޮންސިއުމަރ އޮމްބަޑްސްމަންގެ އޮފީހުގެ ވެބްސައިޓް އިފްތިތާހުކޮށްފި

ކޮންސިއުމަރ އޮމްބަޑްސްމަންގެ އޮފީހުގެ ވެބްސައިޓް އިފްތިތާހުކޮށްފިއެވެ.

ބުރާސްފަތި ދުވަހު ބޭއްވި ރަސްމިއްޔާތެއްގައި މި ވެބްސައިޓް އިފްތިތާހުކޮށްދެއްވީ އިކޮނޮމިކް މިނިސްޓަރ ފައްޔާޒު އިސްމާއީލެވެ. ކޮންސިއުމަރ އޮމްބަޑްސްމަން އޮފީސް އެކުލަވާލައިފައި ވަނީ މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ހިމާޔަތްކުރުމުގެ ގާނޫނުގެ ދަށުންނެވެ.

މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ހިމާޔަތްކުރުމުގެ ގާނޫނަކީ ރާއްޖޭގައި މުދާ ގަންނަ ފަރާތްތަކާއި ޚިދުމަތް ހޯދާ މީހުންގެ ހައްގުތައް ކަނޑައަޅައި، އެ ހައްގުތައް ހިމާޔަތްކުރުމާއި، ވިއްކާ މުދަލެއް ނުވަތަ ފޯރުކޮށްދޭ ޚިދުމަތެއްގައި ފުރިހަމަވާންޖެހޭނެ ޝަރުތުތަކާއި މިންގަނޑުތައް ކަނޑައެޅުމާއި، އެފަދަ ޝަރުތެއް ނުވަތަ މިންގަނޑުތަކާ ޚިލާފަށް މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުން އަމަލުކޮށްފައިވާނަމަ ފިޔަވަޅު އެޅުމުގެ އުސޫލުތައް ބަޔާންކުރުމެވެ. މި ގާނޫނު ތަސްދީގުކޮށް، އަމަލުކުރަންފަށާފައިވަނީ، 31 އޮގަސްޓް 2020ގައެވެ.

އެ ގާނޫނުގެ ދަށުން ކޮންސިއުމަރ އޮމްބަޑްސްމަންގެ މަގާމަށް ބޭފުޅަކު އައްޔަންކުރައްވާފައިވަނީ 31 އޯގަސްޓް 2021ގައެވެ. އެގޮތުން މި މަގާމަށް ރައީސުލްޖުމްހޫރިއްޔާ އައްޔަން ކުރައްވާފައިވަނީ މއ. ޕެރިސްގެ އަލްއުސްތާޒާ މަރްޔަމް ޝަމްއާ އިސްމާއީލްއެވެ.

ކޮންސިއުމަރ އޮމްބަޑްސްމަންގެ ވާޖިބަކީ، މުދާ ގަންނަ ފަރާތެއް ނުވަތަ ޚިދުމަތް ލިބިގަންނަ ފަރާތްތަކުގެ ހައްގުތައް ނިގުޅައިގެންފައިވާ ހާލަތެއްގައި އެ މައްސަލަތައް ބަލައި ޝަކުވާތައް ތަހުގީގުކުރުމާއި، އެފަދަ ހާލަތުގައި ބަދަލު ނަގައިދިނުމާއި، ގާނޫނާ ޚިލާފުވެފައިވާ ފަރާތަކާމެދު ފިޔަވަޅުއެޅުމެވެ. އަދި ގާނޫނުގެ ދަށުން ކުރާ، ގާނޫނާ ޚިލާފު އަމަލުތައް ރިޕޯޓުކުރެވޭނެ ނިޒާމެއް ގާއިމުކުރުމާއި، ހުށަހެޅޭ ޝަކުވާތަކުގެ ތަހުގީގު ރިޕޯޓު އާންމުކުރުމަކީވެސް އޮމްބަޑްސްމަންގެ ޒިންމާއެކެވެ.

ގާނޫނުގެ ދަށުން ކޮންސިއުމަރ އޮމްބަޑްސްމަނަށް ހުށަހެޅޭ މައްސަލަތަކުގައި، އެ ގާނޫނުން މަނާކޮށްފައިވާ ކަމެއް ކޮށްފައިވާ ފަރާތެއްގެ މައްޗަށް، ނުވަތަ އެ ގާނޫނާ ޚިލާފުވެފައިވާ ފަރާތެއްގެ މައްޗަށް، 250,000 ރުފިޔާއާ ހަމައަށް ޖޫރިމަނާ ކުރުމުގެ އިޚުތިޔާރުވެސް ކޮންސިއުމަރ އޮމްބަޑްސްމަނަށް ލިބިގެންވެއެވެ.

އިކޮނޮމިމް މިނިސްޓްރީން ބުނީ، ބުރާސްފަތި ދުވަހު ތައާރަފުކުރި ވެބްސައިޓުގެ މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކުގެ ހައްގުތަކާގުޅޭ މައުލޫމާތު ފޯރުކޮށްދީ، މައްސަލަތައް ފަސޭހައިން ހުށަހެޅޭނެ ކަމަށެވެ. އަދި މުދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކުގެ ޒިންމާތަކާ ގުޅޭގޮތުން ވެސް މައުލޫމާތު ފޯރުކޮށްދެވޭނެކަމަށް އެ މިނިސްޓްރީން ބުނެއެވެ.

މި ވެބްސައިޓް ފަރުމާކޮށްފައިވަނީ ވެބްސައިޓް މެދުވެރިކޮށް ކޮންސިއުމަރ އޮމްބަޑްސްމަންއަށް ހުށަހަޅާ މައްސަލަތަތަކާއި އެ މައްސަލަތަކުގެ ސްޓޭޓަސް، ކޮންމެ ވަގުތެއްގައިވެސް އާންމުންނަށް ބެލޭނެގޮތަށެވެ.