ފަނޑިޔާރުން ކުރައްވާ ޙުކުމްތަކާއި ގުޅިގެން އިންޒާރު ދިނުން ކުށްވެރި ކުރަން: މައުމޫން ޙަމީދު

ފަނޑިޔާރުން ކުރައްވާ ޙުކުމްތަކާއި ގުޅިގެން އިންޒާރު ދިނުން ހަރުކަށި އިބާރާތުން ކުށްވެރި ކުރައްވާކަމަށް ބާ ކައުންސިލުގެ ރައީސް މައުމޫނު ޙަމީދު ވިދާޅުވެއްޖެއެވެ.

ރާއްޖެއެމްވީއާ ވާހަކަ ދައްކަވަމުން މައުމޫން ޙަމީދު ވިދާޅުވީ، ޝަރުއީ ދާއިރާއާ ގުޅޭ މައްސަލައެއް އޮތްކަމުގައިވާނަމަ، އެ މައްސަލައެއް ބެލޭނެ ތަފާތު އެކި ނިޒާމުތައް ޤާއިމުވެފައިވާ ކަމަށެވެ.

އެހެންނަމަވެސް، އެ ނިޒާމުގެ ބޭރުން ބައެއް ކަންކަން މި ފަހަކަށްއައިސް ހިނގަމުންދާކަމަށް މައުމޫން ވިދާޅުވިއެވެ. އެގޮތަށް ކަންކަން ކުރައްވަނީ ވަކި މަޤްސަދެއް ޙާސިލު ކުރުމަށްކަމަށް އޭނާ ވިދާޅުވިއެވެ.

މައުމޫން އިތުރަށް ވިދާޅުވީ، ވަކިން ޚާއްސަކޮށް ބައެއް ފަނޑިޔާރުން ކުރައްވާ ޙުކުމްތަކާއި ގުޅިގެންވެސް އެ ފަނޑިޔާރުންނަށް އިންޒާރު ދިނުން ފަދަ ކަންކަން ހިނގާ ކަމަށެވެ. އެކަންކަން ހަރުކަށި އިބާރާތުން ކުށްވެރި ކުރައްވާކަން ފާހަގަ ކުރައްވައި އޭނާ ވިދާޅުވީ، ފާޑު ކިއުމާއި އިންޒާރު ދިނުމަކީ ވަކި ދެ ކަމެއް ކަމަށެވެ.

މައުމޫނު ޙަމީދު އެހެން ވިދާޅުވެފައިވާއިރު، ކުރީގެ ރައީސް އަބްދުﷲ ޔާމީން ފަނޑިޔާރަކަށް އިންޒާރު ދެއްވިކަމަށް ބުނާ މައްސަލައެއް ޖުޑީޝަލް ސަރވިސް ކޮމިޝަން (ޖޭއެސްސީ) އިން ވަނީ ފުލުހުންނަށް ހުށައަޅާފައެވެ.

މި މައްސަލައަކީ 10 މެއިގައި ޕީޕީއެމްއިން ބޭއްވި ކެމްޕޭން ޙަރަކާތެއްގައި ރައީސް ޔާމީނު ދެއްކެވި ވާހަކަފުޅަކާއި ގުޅިގެން ޖޭއެއްސީން ފުލުހުންނަށް ހުށައެޅި މައްސަލައެކެވެ. އެގޮތުން އެ ދުވަހު ރައީސް ޔާމީނު ވަނީ ސުޕްރީމް ކޯޓުގެ ފަނޑިޔާރުކަން ފަނޑިޔާރު އަލީ ރަޝީދު ހުސައިންއަށް ލިބިވަޑައިގަތީ ރައީސް ޔާމީނުގެ މައްޗަށް ޙުކުމް ކުރައްވަން ކެރިވަޑައިގަތުމުން ކަމަށް ވިދާޅުވެފައެވެ.

އެ ވާހަކަފުޅުތައް ދައްކަވަމުން ރައީސް ޔާމީނު ވަނީ ރާއްޖޭގެ ޖަލުތައް ބޮޑުކުރަން ޖެހޭކަމަށް ވިދާޅުވެ، އެމަނިކުފާނުގެ ވެރިކަމެއްގައި ބައެއް ފަރާތްތައް ޖަލަށް ލައްވާނެކަމުގެ އިންޒާރު ދެއްވާފައެވެ.