ޑަބްލިއުޑީސީގެ ބައި އިލެކްޝަންތައް ބާއްވަން ޖެހޭތީ، ބަޖެޓް ހުސްވާން ކައިރިވަނީ: އީސީ
ކޮންމެ ބައި އިލެކްޝަނަކަށް 150،000 ރުފިޔާ ޚަރަދުވާކަމަށް ވިދާޅުވި
އިލެކްޝަންސް ކޮމިޝަންގެ މެމްބަރުން
ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑިސީ)ގެ ބައި އިލެކްޝަންތައް ގިނަވުމުގެ ސަބަބުން އިލެކްޝަންސް ކޮމިޝަނުގެ ބަޖެޓް، މިއަހަރު ނިމުމުގެ ކުރިން ހުސްވެދާނެކަމަށް އެ އިދާރާއިން ބުނެފިއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި އިލެކްޝަންސް ކޮމިޝަނުގެ ރައީސް ފުއާދު ތައުފީގު ވިދާޅުވީ، ކޮންމެ މަހަކު ވެސް ޑަބްލިއުޑީސީގެ 3 މެމްބަރުން މަދުވެގެން އިސްތިއުފާދޭ ކަން ފާހަގަ ކުރެވިފައިވާކަމަށެވެ. އަދި އެ މަގާމުތަކަށް ބައިލެކްޝަން ބާއްވަންޖެހޭއިރު ކޮންމެ ފަހަރަކު އިންތިޚާބު ބާއްވަން 150،000 ރުފިޔާ ޚަރަދުވާކަން އޭނާ ފާހަގަ ކުރެއްވިއެވެ.
ބައި އިލެކްޝަންތަކުގެ ބަޖެޓް ބޮޑުނުކުރަން ފިނޭންސް މިނިސްޓްރީން އަންގާފައިވާކަން ފާހަގަ ކުރައްވައި ފުއާދު ވިދާޅުވީ، ދޫކުރާ ބަޖެޓަށްވުރެ މަސައްކަތްތައް މިހާރު ބޮޑުވެފައިވާ ކަމަށެވެ. އަދި އެގޮތަށް ކަންކަން ކުރިއަށްދާނަމަ އަންނަ ޖުލައި ނުވަތަ އޮގަސްޓް މަހާ ހިސާބުގައި މުޅި ބަޖެޓް ހުސްވެދާނެކަމަށް ވެސް ފުއާދު ވިދާޅުވިއެވެ.
ފުއާދު ވިދާޅުވި ގޮތުގައި، އިލެކްޝަންސް ކޮމިޝަނުގެ ބަޖެޓް އެއްކޮށް ހުސްވަނީ ބައި އިލެކްޝަން ބޭއްވުމަށެވެ. އޭގެ ސަބަބުން އެ ކޮމިޝަނުގެ ތަރައްގީއަށް އެއްވެސް މަސައްކަތެއް ނުކުރެވޭކަންވެސް އޭނާ ފާހަގަކުރެއްވިއެވެ.
ފުއާދު ވިދާޅުވީ ޑަބްލިއުޑީސީގެ މެމްބަރުން އިސްތިއުފާދޭ ސަބަބުތައް ދެނެގަންނަން މަސައްކަތް ކުރަމުން އަންނަކަމަށާއި، އެގޮތުން ބައެއް ރަށްރަށުގެ ފަރާތްތަކާ ބައްދަލުކުރުމުން ގިނައިން ތިބީ އެހާ ބޮޑަށް މަގާމު ބޭނުންވެގެން އަންނަ މެމްބަރުން ނޫންކަން ފާހަގަކުރެވިފައިވާކަމަށެވެ. އަދި ބައެއް ރަށްތަކުން އެ މަގާމުތަކަށް ލާނެ މީހުން ނުވާކަންވެސް އޭނާ ފާހަގަ ކުރެއްވިއެވެ.
ޚަރަދު ކުޑަކުރުމަށް އީސީން ވަނީ މިނިވަން މުއައްސަސާތަކުގެ ކޮމިޓީގެ މެމްބަރުންގެ ލަފަޔާއެކު ދެ ގޮތަކަށް ގާނޫނު އިސްލާހުކޮށްދިނުމަށް އެދިފައެވެ. އެގޮތުން، އިސްތިއުފާދޭ ކޮންމެ ފަހަރަކު އިންތިޚާބު ބޭއްވުމުގެ ބަދަލުގައި، އަހަރަކު ދެ ފަހަރު ނުވަތަ ދައުރެއްގެ ތެރޭގައި ދެ އިންތިޚާބު ބާއްވާގޮތަށް ހަދައިދިނުމަށް ވަނީ އެދިފައެވެ.
