ސަލްމާން މިސްކިތް ހުޅުވިތާ މާ ގިނަ ދުވަސް ނުވަނީސް ބައެއް ފާޚާނާތައް ބަންދުކުރަން ޖެހިއްޖެ
ބަންދު ކޮށްފައިވަނީ ދެ ފާޚާނާކަމަށް މިނިސްޓަރ ވިދާޅުވި
ކިންގް ސަލްމާން މިސްކިތް
ކިންގ ސަލްމާން މިސްކިތް ހުޅުވިތާ ދެ މަސް ދުވަސް ނުވަނީސް އެ މިސްކިތުގެ ބައެއް ފާޚާނާތަކުގައި މައްސަލަޖެހި ބަންދުކުރަން ޖެހިއްޖެއެވެ.
"ރާއްޖެ އެމްވީ"އަށް މައުލޫމާތު ދެއްވަމުން އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވީ، މައްސަލަތަކެއް ދިމާވެ މަރާމާތުކުރަން ޖެހުމުން ދެ ފާޚާނާއެއް ބަންދުކުރަން ޖެހފައިވާ ކަމަށެވެ. އަދި އެތަން ހަދާފައިވާ ގޮތުން ފާޚާނާތައް މަރާމާތުކުރާނަމަ ބައެއް ތަޅާލަންޖެހޭ ކަމަށާއި، އެއީ ވަރަށް ބޮޑު މަސައްކަތަކަށް ވާނެކަމަށް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވި ގޮތުގައި ފާޚާނާތަކުގެ ބައެއް ތަޅާލަން ޖެހެނީ އެތަން ހަދާފައި ހުރި ގޮތުން މަރާމާތުގެ މަސައްކަތް ކުރަން ދަތިވާތީ ކަމަށެވެ. އެގޮތުން، ފާޚާނާގެ ފްލަޝް ޓެންކު ހުންނަނީ ފާރު ތެރެއަށް ލާފައި ކަމަށާއި، އޭގެ ސަބަބުން ފްލަޝް ޓޭންކަށް މައްސަލައެއް ޖެހުމުން މަރާމާތު ކުރާނަމަ އެ ފާޚާނާއެއް ބަންދުކޮށް ތަޅާލައިގެން މަސައްކަތް ކުރަން ޖެހިފައިވާ ކަމަށެވެ.
އެ މައްސަލަ ވީހާވެސް އަވަހަށް ހައްލުކުރުމަށް މަސައްކަތް ކުރަމުން އަންނަ ކަމަށާއި، މަސައްކަތް ނިމުމާއެކު އަލުން ޚިދުމަތް ދޭން ފެށޭނެ ކަމަށް މިނިސްޓަރ ފާހަގަ ކުރެއްވިއެވެ.
ކިންގ ސަލްމާން މިސްކިތް ހުޅުވައި ނަމާދު ކުރަން ފަށާފައިވަނީ 1 އޭޕްރިލް 2022 ގައެވެ. އެއީ ސައޫދީއަރަބިއްޔާގެ އެހީގައި އަޅާފައިވާ މިސްކިތަކަށްވުމުން، މިސްކިތް ރަސްމީކޮށް ހުޅުވަން ނިންމާފައިވަނީ އެ ގައުމުގެ ވަފުދެއް ރާއްޖެ އައުމުންނެވެ. އެ ވަފުދު ރާއްޖެ ނައިސް ގިނަ ދުވަސްވުމުގެ ސަބަބުން މިސްކިތުގެ މަސައްކަތް ނިމުމަށްފަހު ވެސް ގިނަ ދުވަސްތަކެއް ވަންދެން އެތަން ނުހުޅުވި ހުއްޓެވެ.
ކިންގް ސަލްމާން މިސްކިތަކީ ސައޫދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތަކަށްވާއިރު, އެ މިސްކިތް ރަސްމީކޮށް ހުޅުވުމުގެ ރަސްމިއްޔާތުގައި ބައިވެރިވުމުގެ ޝައުގުވެރިކަން ސައޫދީ ސަރުކާރުން ވަނީ ފާޅުކޮށްފައެވެ.
ސަލްމާން މިސްކިތުގެ ފުރަތަމަ ފަންގިފިލާއާއި ދެވަނަ ފަންގިފިލާގައި ޖުމުލަ 4000 މީހުންނަށް ނަމާދު ކުރެވޭއިރު, ތިންވަނަ ފަންގިފިލާގައި 40 ޖާގައިގެ 4 ކްލާސްރޫމާއި، 5 ސެމިނަރ ރޫމް ހުންނާނެއެވެ. ހަތަރުވަނަ ފަންގިފިލާގައި ލައިބްރަރީއަކާއި، 350 މީހުންގެ ޖާގައިގެ އޮޑިޓޯރިއަމެއް ހުރެއެވެ.
