އައްސާމްގައި ފެންބޮޑުވުމުގެ ސަބަބުން 33,000ށްވުރެ ގިނަ މީހުން ރިލީފް ކޭމްޕްތަކަށް
18 މެއި 2022 | ބުދަ 01:49ފެންބޮޑުވުމުގެ ސަބަބުން ދެ ލައްކަ މީހުންނަށް ވަނީ އަސަރުކޮށްފައި
އައްސާމްގައި ފެންބޮޑުވުން
ވާރޭވެހި މޫސުން ގޯސްވެ، އައްސާމްގައި ފެންބޮޑުވުމުގެ ސަބަބުން 33,000ށްވުރެ ގިނަ މީހުން ރިލީފް ކޭމްޕްތަކަށް ގެންގޮސްފިއެވެ.
ބޭރުގެ މީޑިއާތަކުން ރިޕޯޓްކޮށްފައިވާ ގޮތުން އައްސާމްގައި ފެންބޮޑުވުމުގެ ސަބަބުން ދެ ލައްކަ މީހުންނަށް ވަނީ އަސަރުކޮށްފައެވެ. އަދި 72 ރިލީފް ކޭމްޕްގައި 33،300 މީހުން އުޅެމުންދާ ކަމަށް ވެސް ވަނީ ބުނެފައެވެ.
އައްސާމްގެެ އެކި އަވަށްތައް ފެންބޮޑުވެފައިވާއިރު އަސްއާމްގެ ސްޓޭޓް ޑިޒާސްޓަ މެނޭޖްމަންޓް އޮތޯރިޓީން ބުނީ ހަތް މީހަކު މަރުވެފައިވާ ކަމަށާއި 6 މީހަކު ގެއްލިގެން ހޯދަމުންދާ ކަމަށެވެ.
އަދި ފެންބޮޑުވުމުގެ ސަބަބުން 6،540 ގެއަށް އެކި ވަރުގެ ގެއްލުން ލިބިފައިވާ ކަމަށެވެ. އަދި އެއީ 811 ވިލެޖެއްގައި ހިމެނޭ ގެތަކަށް ކަމަށް ވެސް ވަނީ ބުނެފައެވެ.
ވިއްސާރައިގެ ސަބަބުން ބައެއް މަގުތައް ހަލާކުވެ، ރޭލު ލިންކްތައް ވެސް ވަނީ ހަލާކުވެފައެވެ. އަދި ކުރިއަށް އޮތް ތިން ދުވަހު ވެސް އައްސާމްއަށް ބޯކޮށް ވާރޭވެހޭނެ ކަމަށް އަސްއާމްގެ ސްޓޭޓް ޑިޒާސްޓަ މެނޭޖްމަންޓް އޮތޯރިޓީން ވަނީ ބުނެފައެވެ.
