އައިޖީއެމްއެޗްގެ ޑޮކްޓަރުން ރީޖިނަލް ހޮސްޕިޓަލްތަކަށް ޒިޔާރަތް ކުރަނީ
16 މެއި 2022 | ހޯމަ 04:43މި ޓީމުން ރާއްޖޭގެ 6 ރީޖިނަލް ހޮސްޕިޓަލަކަށް ޒިޔާރަތް ކުރާނެ
އައިޖީއެމްއެޗް
ރީޖިނަލް ހޮސްޕިޓަލްތަކަށް އައިޖީއެމްއެޗްގެ ޑޮކްޓަރުންނާއި އެެހެނިހެން މުވައްޒަފުން ޒިޔާރަތް ކުރުމަށް ނިންމައިފިއެވެ.
އައިޖީއެމްއެޗް އިން ބުނީ މެއި 2022ން އޭޕްރިލް 2023ގެ ނިޔަލަށް އެއް އަހަރު ދުވަހުގެ މުއްދަތަކަށް ކުރިއަށްގެންދާ މިޕްރޮގްރާމްގައި އައިޖީއެމްއެޗްގެ 6 ޑިޕާޓްމަންޓު ހިމެނޭހެން ހިތުގެ ބަލިތަކަށް ޚާއްސަ، ކެންސަރު ބައްޔަށް ޚާއްސަ، ރޭޑިއޯލޮޖީ، ކަށީގެ ބަލިތަކަށް ޚާއްސަ، އެތެރެހަށީގެ ބަލިތަކަށް ޚާއްސަ އަދި ކުޑަކަމުދާ ނިޒާމާއި ބެހޭ ޑިޕާޓްމަންޓްގެ ޑޮކްޓަރުންނާއި އެހެނިހެން މުވައްޒަފުން ފޮނުވުމަށް ރޭވިފައިވާ ކަމަށެވެ.
މި ޓީމުން ޒިޔާރަތް ކުރާނީ، ރާއްޖޭގެ 6 ރީޖިނަލް ހޮސްޕިޓަލަކަށެވެ. އެއީ ކުޅުދުއްފުށީ ރީޖަނަލް ހޮސްޕިޓަލާއި އައްޑޫ އިކުއިޓޯރިއަލް ހޮސްޕިޓަލުގެ އިތުރުން އުނގޫފާރު ރީޖަނަލް ހޮސްޕިޓަލް އަދި އަބްދުއް ސަމަދު މެމޯރިއަލް ހޮސްޕިޓަލަށެވެ.
އާދިއްތަ ދުވަހުން ފެށިގެން، ހިތުގެ ބަލިތަކަށް ޚާއްޞަ ޑޮކްޓަރުން ވަނީ ކުޅުދުއްފުށީ ރީޖަނަލް ހޮސްޕިޓަލުގައި ބައްލަވަން ފައްޓަވާފައެވެ. އަދި އަންނަ ބުރާސްފަތި ދުވަހުން ފެށިގެން ކެންސަރުގެ ބަލިތަކަށް ޚާއްޞަ ޑޮކްޓަރެއް އެ ހޮސްޕިޓަލުގައި ބައްލަވާނެއެވެ.
މި މަހު ރޭޑިއޮލޮޖީގެ ޚިދުމަތް ދިނުމަށް ހަމަޖެހިފައި ވަނީ އައްޑޫއަށް ކަމަށް އައިޖީއެމްއެޗުން މައުލޫމާތުދެއެވެ. އަދި ކަށީގެ ބަލިތަކަށް ޚާއްޞަ ޑޮކްޓަރުން މި މަހު އުނގޫފާރުގައި ހަރަކާތްތެރިވުމަށް ހަމަޖެހިފައި ވާއިރު، އެތެރެހަށީގެ ބަލިތަކަށް ޚާއްޞަ ޑޮކްޓަރުން މި މަހު ބައްލަވާނީ އަބްދުއްސަމަދު މެމޯރިއަލް ހޮސްޕިޓަލުގައިކަމަށްވެސް އައިޖީއެމްއެޗުން މައުލޫމާތުދެއެވެ
