މަނީ ލޯންޑަރުކުރުމާގުޅޭ ދެ ދައުވާއެއް އާޒިމާގެ މައްޗަށް ވަނީ އުފުލާފައި
އާޒިމާގެ ޝަރީއަތް- މި އަޑުއެހުމުގައި ވަނީ އިސްތިއުނާފާ ގުޅޭގޮތުން ދެފަރާތުން ވާހަކަދައްކަވާފައި
ރައީސް އޮފީހުގެ ކުރީގެ ލީގަލް އެފެއަރޒް މިނިސްޓަރު އާއިޝަތު އާޒިމާ ޝަކޫރުގެ މައްޗަށް އުފުލާފައިވާ، މަނީ ލޯންޑަރުކުރުމާގުޅޭ ދެ ދައުވާއާ ގުޅިގެން ސުޕްރީމް ކޯޓަށް ހުށައެޅިފައިވާ އިސްތިއުނާފު ގަޒިއްޔާތަކުގެ އަޑުއެހުމެއް ސުޕްރީމް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ބުރާސްފަތި ދުވަހު ސުޕްރީމް ކޯޓުގައި ވަނީ މި ގަޒިއްޔާތަކުގެ އަޑުއެހުމުގެ އެއްބައި ކުރިއަށް ގެންދަވާފައެވެ. މި އަޑުއެހުމުގައި އާޒިމާގެ ވަކީލުންގެ މަންޒަރާއި އަޑު ޝަރީއަތަށް ލިބުމުގައި ދޭތެރެ ދޭތެރެއިން މައްސަލަތައް ދިމާވުމާއެކު، ޝަރީއަތުން ވަނީ އަޑުއެހުމުގެ ބާކީ ބައި ޝަރީއަތަށް ހާޒިރުވެގެން ކުރިއަށް ގެންދެވުމަށްޓަކައި އަޑުއެހުން މެދުކަނޑާލައްވާފައެވެ.
މި އަޑުއެހުމުގެ ބާކީބައި ބުރާސްފަތި ދުވަހުގެ މެންދުރު ވަނީ ކުރިއަށް ގެންދަވާފައެވެ.
މި އަޑުއެހުމުގައި ފަނޑިޔާރު ޑރ. މުއުތަސިމް އަދުނާން ވަނީ ދައުލަތުގެ އިސްތިއުނާފަކީ ސުޕްރީމް ކޯޓަށް ބަލައިގެންފައިވާ އިސްތިއުނާފެއްކަމަށްވާތީ، އާޒިމާގެ ފަރާތުން ވަކީލުންނާ ގުޅިގެން ހުށައެޅުއްވި އިޖުރާއީ ނުކުތާ ބަލައިނުގެންނެވުމަށް ނިންމަވާފައެވެ. އަދި ދައުލަތުގެ އިސްތިއުނާފަށް ޖަވާބު ދެއްވުމަށް ފަނޑިޔާރު ވަނީ ދަންނަވާފައެވެ.
މި އަޑުއެހުމުގައި އާޒިމާގެ ވަކީލު ވިދާޅުވީ، އޭނާގެ ފަރާތުން ޖަވާބު ތައްޔާރު ކުރެއްވީ ދައުލަތުން ހުށައެޅި އިސްތިއުނާފުގެ ގާނޫނީ އިއުތިރާޒެއްގެ ގޮތުގައި ކަމަށެވެ. އޭނާގެ ފަރާތުން ވަނީ ދެވަނަ ނުކުތާއާ ގުޅިގެންވެސް އިއުތިރާޒު ހުށައެޅުއްވުމަށް ފުރުސަތަކަށް އެދިވަޑައިގެންފައެވެ.
އެއަށްފަހު އާޒިމާގެ ފަރާތުން ވަނީ ދިފާއީ ވަކީލާ ގުޅޭގޮތުން ދައުލަތުން ހުށައަޅާފައިވާ އިސްތިއުނާފަށް ޖަވާބު ދެއްވާފައެވެ. އަދި ދެވަނަ ނުކުތާއާ ގުޅިގެން އާޒިމާގެ ފަރާތުން ވަނީ އިއުތިރާޒު ހުށައަޅައި، މައުޟޫއީ ގޮތުން އިސްތިއުނާފަށް ޖަވާބުވެސް ދެއްވާފައެވެ.
މި އަޑުއެހުމުގައި ވާހަކަ ދައްކަވަން ލިބިވަޑައިގެން ފުރުސަތުގައި އާޒިމާ ކީރިތި ކުރައްވަމުން ވަނީ، މި މައްސަލައިގައި ދައުލަތުން އަމަލު ކުރައްވަނީ އެންމެ ރަނގަޅަށް ނޫންކަމަށް ވިދާޅުވެފައެވެ.
އާޒިމާ ވިދާޅުވާ ގޮތުގައި ގާނޫނު އަސާސީގައި މުއްތަހަމަށް ލިބިގެންވާ ހައްގުތަކެއްވެސް ވެއެވެ. އިންސާފުން ނޫން ގޮތަކަށް މައްސަލަތައް ކުރިއަށް ގެންދިއުމުގެ ފުރުސަތު ދެވިގެން ނުވާނެކަން އާޒިމާ ފާހަގަ ކުރެއްވިއެވެ.
އާޒިމާ ވަނީ މި މައްސަލަ ދިގުލައިގެން ގޮސްފައިވާ މިންވަރަށް އަލިއަޅުވާލައްވާފައެވެ.
އާޒިމާ ވިދާޅުވާ ގޮތުގައި އޭނާގެ މައްޗަށް އުފުލާފައިވާ ދައުވާތަކާއި ގުޅިގެން އެތައް ފަހަރެއްގެ މަތިން މައްސަލަ ބައްލަވާ ގާޒީން ބަދަލުވެފައިވާއިރު، މައްސަލަ މަދަނީ މިންގަނޑުން ކުރިއަށް ގެންދެވޭނެ ކަމާމެދު ގޮތެއް ނިންމައި އެކަމުގެ ލިއުމެއް ލިބިފައިވަނީ މައްސަލައަށް 3 އަހަރު ވޭތުވެދިޔަ ފަހުންނެވެ.
އާޒިމާގެ ވާހަކައަށްފަހު ދެން ކުރިއަށް ދިޔައީ ފަނޑިޔާރުން އިތުރަށް ސާފު ކުރައްވަން ބޭނުންފުޅުވާ ކަންކަން ސާފު ކުރެއްވުމެވެ. އެއަށްފަހު ޚުލާސާ ގޮތެއްގައި ވާހަކަ ދެއްކެވުމަށް ދެފަރާތަށްވެސް ފުރުސަތު ދެއްވުމަށްފަހު ވަނީ މި ގަޒިއްޔާގެ އަޑުއެހުންތައް ނިންމާލާފައެވެ.
މި ގަޒިއްޔާގައި އިތުރަށް ސާފުކުރަން ޖެހޭ ކަމެއް ނެތްނަމަ ދެން އޮންނާނީ ހުކުމްކުރެއްވުމެވެ.
ދައުލަތުން ހުށައެޅި އިސްތިއުނާފީ ގަޒިއްޔާ ހުކުމަކާ ހިސާބަށް ގޮސްފައިވާއިރު، ދެން އޮތީ މި މައްސަލައިގައި އާޒިމާގެ ފަރާތުން ހުށައަޅާފައިވާ އިސްތިއުނާފީ ގަޒިއްޔާގެ އަޑުއެހުންތައް ފެށުމެވެ.
