ރައީސް ޔާމީންގެ އަމުރަށް، ބާރާއި ނުފޫޒު ބޭނުންކޮށްގެން ސިޔާސީ ވެރިން ހައްޔަރުކުރި - އަބްދުﷲ ރިޔާޒް
ރައީސް ޔާމީންވަނީ މިހާރުގެ ކޮމިޝަނަރ އޮފް ޕޮލިސް މުހައްމަދު ހަމީދަށް އިންޒާރުވެސް ދެއްވާފައި
އަބްދުﷲ ރިޔާޒު - ތިމަރަފުށީ ދާއިރާ މެމްބަރު އަދި ކުރީގެ ޕޮލިސް ކޮމިޝަނަރ
ރައީސް ޔާމީންގެ އަމުރަށް، ބާރާއި ނުފޫޒު ބޭނުން ކޮށްގެން ސިޔާސީ ވެރިން ހައްޔަރުކުރި ކަމަށް ތިމަރަފުށީ ދާއިރާ މެމްބަރު އަދި ކުރީގެ ޕޮލިސް ކޮމިޝަނަރ އަބްދުﷲ ރިޔާޒު ވިދާޅުވެއްޖެއެވެ.
ރިޔާޒު މިހެން ވިދާޅުވީ، މާލޭގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ވިލިމާލެ ދާއިރާގެ ހުސްވެފައިވާ ގޮނޑީގެ ބައިއިލެކްޝަނުގައި ޕީޕީއެމްގެ ފަރާތުން ވާދަކުރައްވާ އައިމިނަތު ނާޒިމާގެ ކެމްޕޭން ޖަލްސާގައި ރައީސް ޔާމީން ދެއްކެވި ވާހަކަފުޅާ ގުޅުވައި ކުރެއްވި ޓްވީޓެއްގައެވެ. ރިޔާޒު ވިދާޅުވީ، ރައީސް ޔާމީނުގެ ވެރިކަމުގައި ގިނަ ސިޔާސީ މީހުން ޖަލަށްލާފައި ވަނީ، އެމަނިކުފާނުގެ އަމުރަށް ގާނޫނީ ހަމަތަކުގެބޭރުން ބާރާއިނުފޫޒު ނަހަމަގޮތުގައި ބޭނުންކުރައްވައިގެން ކަމަށެވެ.
ރިޔާޒަކީ ރައީސް ޔާމީންގެ ވެރިކަމުގައި ޕޮލިސް ކޮމިޝަނަރގެ މަގާމުގައި ހުންނެވި ބޭފުޅާއެވެ. ރިޔާޒު ވިދާޅުވީ، އެގޮތަށް ހިންގާފައިހުރި ކަންކަން ބެލުމަށް ސުޕްރީމް ކޯޓުން ކޮށްފައިވާ އަމުރުތައް ތަންފީޒުނުވުމަކީ މުއައްސަސާތަކުގެވެސް އިހުމާލެއްކަމަށެވެ.
ރައީސް ޔާމީން އެ ޖަލްސާގައި ދެއްކެވި ވާހަކަފުޅުގައި ވިދާޅުވީ، ޗީފް އޮފް ޑިފެންސް މޭޖަރ ޖެނަރަލް އަބްދުﷲ ޝަމާލާމެދު ތަހުގީގު ހިންގައި، އަޅަންޖެހޭ ފިޔަވަޅު މުސްތަގުބަލުގައި އަޅުއްވާނެކަމަށެވެ. ޖެނެރަލް ޝަމާލަކީ އެމަނިކުފާނަށް ބޮޑުބޭބެ ވިދާޅުވާ ބޭފުޅަކަށްވާތީ، އޭނާއާމެދު ފިޔަވަޅުއެޅުއްވުމުން ގާތް މީހަކާމެދު ފިޔަވަޅުއަޅުއްވައިގެން އެމަނިކުފާނު ވަރުގެ ނުބައި މީހަކު ނެތްކަމަށް ވާހަކަދެކެވޭނެ ކަމަށްވެސް ވިދާޅުވިއެވެ.
އަދި ރައީސް ޔާމީންވަނީ މިހާރުގެ ކޮމިޝަނަރ އޮފް ޕޮލިސް މުހައްމަދު ހަމީދަށް އިންޒާރުވެސް ދެއްވާފައެވެ. ވިދާޅުވީ، ސީޕީ ހަމީދު ދިގު މުއްދަތެއް ވަންދެން ޖަލުގައި އޮންނަވަންޖެހޭނެ ކަމަށެވެ. ރައީސް ސާލިހު ނެރުއްވާފައިވާ ގަރާރާ އެއްގޮތަށް ސިފައިން މަސައްކަތް ކުރައްވާ ކަމަށް ވިދާޅުވެ، ފުލުހުންނަށް ރައީސް ޔާމީން ފާޑުވިދާޅުވިއެވެ. ހާލަތު ބަދަލުވާނެ ކަމަށާއި، ސީޕީ ހަމީދު ވެސް ޖެހޭނީ ގެއަށް ވަޑައިގަންނަވަން، ނުވަތަ ދިގު މުއްދަތުގައި ޖަލުގައި އޮންނަވަންކަމަށް ވިދާޅުވިއެވެ.
ފުލުހުން އާންމުކޮށްފައިވާ ތަފާސް ހިސާބުތައް ދައްކާގޮތުން، ނިމިގެން ދިޔަ ވެރިކަމުގައި, ކުއްލި ހާލަތެއް މެދުވެރި ނުވިނަމަވެސް އެތައް ބަޔަކު ހައްޔަރުކޮށްފައިވެއެވެ. އަދި އެތައް ބަޔަކު ތަހުގީގުކުރުމުގެ ނަމުގައި ބަންދުކުރިއެވެ. މީގެ ތެރޭގައި ގިނައީ ސަރުކާރު ޒިންމާދާރުކުރުމަށް އޭރުގެ އިދިކޮޅުން ބޭއްވި އެއްވުންތަކުގައި ހައްޔަރުކުރި މީހުންނެވެ.
