ހަވާނާގެ ހޮޓެއްގައި ބާރުގަދަ ގޮވުމެއް ގޮވައިފި

ހަވާނާގެ ހޮޓަލެއްގައި ބާރުގަދަ ގޮވުމެއް ގޮވައި، އެތަނުގެ ބޮޑު ބައެއް މުޅިން ހަލާކުވެއްޖެއެވެ.

އެއްޗެއް ގޮވާފައިވަނީ ކިއުބާގެ ވެރިރަށް ހަވާނާގައި ހުންނަ މަޝްހޫރު ހޮޓެލް، ސަރަޓޯގާގައެވެ. ބާރުގަދަ ގޮވުމުގެ ސަބަބުން ހޮޓަލުގެ ބައެއް ފަންގިފިލާތައް ވަނީ މުޅިން ހަލާކުވެ ބިމާ ހަމަވެފައެވެ.

ރިޕޯޓުތައް ބުނާގޮތުން އިމާރާތުގެ އެންމެ މަތީ ފަންގިފިލާގައި ބައެއް ފަތުރުވެރިން ވަނީ ތާށިވެފައެވެ. މި ހާދިސާ ހިނގަން މެދުވެރިވި ސަބަބު އަދި ދެނެގަނެވިފައި ނުވާއިރު، އިމާރާތުގެ ދަށުގައި ތާށިވެފައިވާ މީހުން ހޯދުމުގެ މަސައްކަތް ފަޔަރ އެން ރެސްކިއު ސަރވިސްއިން ވަނީ ފަށާފައެވެ. ހާދިސާގައި އަނިޔާވި މީހުން އިމާރާތުގެ ބޭރުގައި ތިބިއިރު، ރިޕޯޓުތައް ބުނާގޮތުން މީހުން ސަލާމަތް ކުރުމުގައި އާންމުންވެސް ދަނީ ހަރަކާތްތެރިވަމުންނެވެ.

އެތަނުގައި ހަރަކާތްރިވާ އާންމުންނާ ހަވާލާދީ ރިޕޯޓުކޮށްފައިވާ ގޮތުން އެވަގުތު އިވުނީ ބޮމެއް ގޮވާއިރު އިވޭފަދަ ބާދުގަދަ އަޑެކެވެ.

ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި މިގޮވުމުގެ ސަބަބަުން ހޮޓެލް އެއްކޮށްހެން ވަނީ ހަލާކުވެފައެވެ. އަދި މިކަމުގެ އަސަރު ކައިރީގައި ހުރި ބައެއް އިމާރާތްތަކަށްވެސް ވަނީ ކޮށްފައެވެ. މިއާއެކު ގިނަ އަދަދެއްގެ އާންމުން އަންނަނީ އެތަނުގައި ހަރަކާތްތެރިވަމުންނެވެެ.

ހާދިސާއާ ގުޅޭގޮތުން ކަމާ ގުޅުންހުރި ފަރާތްތަކުން އަދި ވަކި އެއްޗެއް ހާމަކޮށްފައެއް ނުވެއެވެ. އެސަރަހއްދުގައި އިމަރޖެންސީ ސަރވިސް އަދި ފުލުހުން އަންނަނީ ހަރަކާތްތެރިވަމުންނެވެ.

ކިއުބާގެ ރައީސް މިގޭލް ޑިއޭޒް ކެނޭލް ވިދާޅުވީ ހޮޓަލުގައި ގޮވާފައި ވަނީ ބޮމެއް ނޫން ކަމަށާއި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުގީގު ފަށާފައިވާ ކަަމަށެވެ. މިހާތަނަށް ހޯދިފައިވާ ހޯދުންތަކުން ހާދިސާ ހިނގާފައިވަނީ ގޭސް ލީކެއްގެ ސަބަބުން ކަމަށް ކިއުބާގެ ރައީސްގެ އޮފީހުން ބުނެެއެވެ.

މި ހާދިސާގައި 4 މީހުން މަރުވެފައިވާ ކަމަށް ރޮއިޓާރސް ގެ ފަހުގެ ޚަބަރުތައް ބުނެއެވެ.