ޝައުނާގެ ތާއީދު ފައްޔާޒަށް - ނަޝީދު ވިދާޅުވީ އަމިއްލަ ވަޒީފާގެ އެދުމަށް ފަހިކުރައްވާ އެމްޑީޕީއަކީ ކޮބައިކަން ބަޔާން ނުކުރެއްވުމަށް
2023 ވަނަ އަހަރު އެމްޑީޕީން އިންތިޚާބު ކާމިޔާބު ކުރުމަށް ވަރަށް ގިނަ މަސައްކަތްތައް ކާމިޔާބުކުރަން އެބަހުރި
އެމްޑީޕީގެ ރައީސް މުހައްމަދު ނަޝީދު (ވ) އަދި އެންވަޔަރަމަންޓް މިނިސްޓަރު އައިމިނަތު ޝައުނާ (ކ)
މި މަހުގެ 14 ވަނަ ދުވަހު ބާއްވާ އެމްޑީޕީގެ ޗެއަރޕާސަންކަމުގެ އިންތިޚާބުގައި، އެ މަޤާމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލަށް، މިނިސްޓަރ އޮފް އެންވަޔަރަމެންޓް އެންޑް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ތާއިދުކުރައްވާކަން ހާމަކުރެއްވުމުން، ރައީސް ނަޝީދު ނުރުހުންވެ ވަޑައިގެން ޝައުނާއަށް ފާޑުވިދާޅުވެއްޖެއެވެ.
މިނިސްޓަރު ފައްޔާޒަށް ތާއިދުކުރައްވާކަން ހާމަކުރައްވާ މިނިސްޓަރު ޝައުނާގެ ވީޑިއޯ މެސެޖެއްގައި ވިދާޅުވީ އެމްޑީޕީއަކީ ރާއްޖޭގެ މުޅި ސިޔާސީ ހަޔާތް ބަދަލުކޮށްލި ޕާޓީ ކަމަށާއި އެމްޑީޕީއަކީ ރާއްޖޭގެ ރައްޔިތުންގެ އާންމު ދިރިއުޅުމުގެ ހާލަތު ވެސް ބަދަލުކުރުމަށް މުހިންމު ސިޔާސަތުތަކެއް ކަނޑައަޅައިގެން މަސައްކަތް ކުރާ ޕާޓީއެއް ކަމަށެވެ.
މިވީޑިއޯ މެސެޖެއްގައި މިނިސްޓަރު ޝައުނާ ވިދާޅުވީ، 2008 ވަނަ އަހަރު އުފެދުނު އެމްޑީޕީގެ ވެރިކަމުގައި މުހިންމު ކަންތައްތަކެއް ހާސިލްކުރެވުނު ކަމަށެވެ. އޭގެ ތެރެއިން ފާހަގަކޮށްލެވޭ ކަންކަމަކީ، ބޭސްފަރުވާއަށް ރައްޔިތުން ސަލާންޖެހުން ނިމުމަކަށް ގެނެސްދެވުނު ކަމަށާއި، އަތްފޯރާ އަގުގައި ބޯހިޔާވަހިކަން ފޯރުކޮށްދިނުމަކީ ސަރުކާރަށް ލާޒިމުކަމެއްކަމުގައި ހަދާ، އެ ފަހުން އައި ކޮންމެ ސަރުކާރަކުން އެއީ ކުރަންޖެހޭނެކަމެއް ކަމުގައި ވެގެން ދިޔުން ކަމަށެވެ. މިނިސްޓަރު ޝައުނާ ވިދާޅުވީ އެމްޑީޕީގެ އެއިރުގެ ސަރުކާރުގައި ހާސިލްކުރެވުނު އެންމެ މުހިންމު ކަމަކީ، ރާއްޖޭގެ މާލީ ފުދުންތެރިކަން އިތުރުކުރުމަށް ޓެކްސްގެ ނިޒާމެއް ޤާއިމުކުރެވުން ކަމަށެވެ. އަދި 2018 ވަނަ އަހަރު އިންތިޚާބުވި އެމްޑީޕީ ސަރުކާރާއެކީގައިވެސް، ހަމަ އެޒާތުގެ ސިޔާސަތުތައް ތަންފީޒުކުރަމުން ގެންދާ ކަމަށެވެ.
މިހާތަނަށް އެމްޑީޕީއަށް ތަންފީޒު ކުރެވުނު އެންމެ މުހިންމު ސިޔާސަތުތަކަށް ބަލާއިރު، ރާއްޖޭގައި މިހާރު ވެސް 10،000 ޒުވާނުންނަށް ހިލޭ ޑިގްރީއަށް ކިޔެވޭނެ ފުރުސަތު ސަރުކާރުން ފަހިކޮށްދީފައިވާ ކަމަށާއި، އެތައްހާސް ރިސޯޓް މުވައްޒަފުންނަށް އެމްޑީޕީން މިނިމަމް ވޭޖް ތައާރަފްކޮށް، އާމްދަނީގެ ވަސީލަތްތައް އިތުރުކޮށްދެވިފައިވާ ކަމަށެވެ.
ޝައުނާގެ މެސެޖުގައި ވިދާޅުވީ އެމްޑީޕީން ވައުދުވެ ކުރަން ހުރި ކަންކަން އަދިވެސް ވަރަށް ގިނަ ކަމަށާއި، 2023 ވަނަ އަހަރު އެމްޑީޕީން އިންތިޚާބު ކާމިޔާބު ކުރުމަށް ވަރަށް ގިނަ މަސައްކަތްތައް ކާމިޔާބުކުރަން އެބަހުރި ކަމަށެވެ.
އަދި މި މަސައްކަތްތައް ކުރަން ޖެހޭނީ ޕާޓީއާއި އެކީގައި ކަމަށާއި، އެހެންކަމުން، ޖުމްލަކޮށް ބަލާއިރު، ޗެއަރޕާސަންކަމަށް އިންތިޚާބުކުރުމަށް އެންމެ މުހިންމީ، އަދި މިކަން ކުރެވޭނެ ބޭފުޅަކީ، ޤަބޫލުކުރައްވާ ގޮތުގައި ފައްޔާޒު ކަމަށެވެ.
މިނިސްޓަރު ޝައުނާ ވިދާޅުވީ މިނިސްޓަރު ފައްޔާޒާއި އެކީގައި އެއްބަސްވެވަޑައިގަންނަވާ ކަންކަން ވަރަށް މަދުވާނެ ކަމަށާއި، ގިނަވާނީ ދެބަސްވެވަޑައިގަންނަވާ ކަންކަން ކަމަށެވެ. އެހެންނަމަވެސް ދެބަސްވެ، ޒުވާބުކޮށް ވާހަކަ ބަދަލުކޮށް ކަންކަން ނިންމަވާ ދެއްވާ ބޭފުޅެއްގެ ގޮތުގައި ފައްޔާޒު ފާހަގަކުރެއްވޭ ކަމަށާއި، ކަންކަން ކޮޅެއްގައި ޖައްސަވާ ބޭފުޅެއްގެ ގޮތުގައި ފައްޔާޒު ފާހަގަކުރެއްވޭ ކަމަށެވެ.
ޝައުނާގެ މި މެސެޖް އާންމު ކުރުމާއެކު، އެމްޑީޕީގެ ރައީސް، މުހައްމަދު ނަޝީދު ވިދާޅުވީ މިނިސްޓަރު ޝައުނާގެ އަމިއްލަފުޅު ވަޒީފާގެ އެދުމަށް ފަހިކުރައްވާ، އެމްޑީޕީއަކީ ކޮބައިކަން ބަޔާން ކުރައްވަން ނޫޅުއްވުމަށެވެ. އަދި އެމްޑީޕީގެ އާންމު މެންބަރުންނަށް އެމްޑީޕީއަކީ ކޮބައިކަން ވަރަށް ސާފުވާނެ ކަމަށެވެ.
