އީދު ފެށެން އެއް ދުވަހަށް ވެފައިވަނިކޮށް މޯލްޑިވިއަން އެއާލައިނުން ދަތުރުތަކުގެ އަގު ބޮޑުކޮށްފިއެވެ.

އެ އެއާލައިނުން ގެނައި ބަދަލާއެކު މިހާރު ރާއްޖޭގެ އެތެރޭގެ މަންޒިލްތަކުން 180 ރުފިޔާ ވަނީ ބޮޑުކޮށްފައެވެ. އެ ބަދަލު ގެނެސްފައިވަނީ މިއަދުން ފެށިގެންނެވެ.

މޯލްޑިވިއަން އޮޕަރޭތް ކުރަމުން އަންނަ އައިލެންޑް އޭވިއޭޝަންގެ އޮފިޝަލަކު "ރާއްޖެ އެމްވީ" އަށް މައުލޫމާތު ދެއްވަމުން ވިދާޅުވީ ޓިކެޓުތަކުގެ އަގު ބޮޑުކުރުމާ އީދާ އެއްވެސް ގުޅުމެއް ނެތް ކަމަށެވެ. އަގު ބޮޑު ކުރީ ދުނިޔޭގެ ބާޒާރުގައި ތެލުގެ އަގު އުފުލިފައިވާތީ ކަމަށާއި އެގޮތުން، މިދިޔަ މާޗު މަސް ނިމުނުއިރު އެ ކުންފުންޏަށް ޖެޓު ފިޔުލް ލިބެމުން އައި އަގު 40 އިންސައްތައަށް އިތުރުވެފައިވާ ކަމަށް ވެސް އޭނާ ވިދާޅުވިއެވެ.

ދުނިޔޭގެ ބާޒާރުގައި ތެލުގެ އަގު އުފުލިފައިވަނީ ރަޝިއާ އާއި ޔޫކްރޭނާ ދެމެދު މިހާރު ކުރިއަށްދާ ހަނގުރާމައާ ގުޅިގެންނެވެ. އޭގެ އަސަރު އެންމެ ބޮޑަށް ކޮށްފައިވަނީ ތެލުގެ ވިޔަފާރިއަށެވެ.

މާޗު މަހުން ފެށިގެން ޖެޓް ފިޔުލްގެ އަގު ބޮޑުވި ނަމަވެސް ޓިކެޓް އަގު ބޮޑު ނުކޮށް ވޭތޯ ބަލާފައިވާނެ ކަމަށް އައިލެންޑް އޭވިއޭޝަނުން ބުނެއެވެ. ނަމަވެސް އިތުރު ގޮތެއް ނެތުމުން ޓިކެޓުގައި ހިމެނޭ ފިޔުލް ސަބްޗާޖުގެ ތެރެއަށް އިތުރު އަގެއް ލާން ޖެހުނީ ކަމަށް ވެސް އެ ކުންފުނިން ބުނެއެވެ.

އެ އެއާލައިނުގެ ވެބްސައިޓާއި މޯބައިލް އެޕްލިކޭޝަނުން ދައްކާ ގޮތުގައި މިދިޔަ ހަފުތާ ނިމުނުއިރު 1،333 ރުފިޔާއަށް ހުރި ޓިކެޓުގެ އަގު މިއަދު ހުރީ 1،513 ރުފިޔާއަށް ބޮޑުކޮށްފައެވެ. އަދި 1،222 ރުފިޔާ އަށް ހުރި ޓިކެޓުތަކުގެ އަގުތައް 1402 ރުފިޔާއަށް، 1113 ރުފިޔާއަށް ހުރި ޓިކެޓުތަކުގެ އަގު 1294 ރުފިޔާއަށް ވަނީ ބޮޑުކޮށްފައެވެ.

އެތެރޭގެ ދަތުރުތަކުގެ އަގު ބޮޑުކޮށްފައިވާއިރު ބައިނަލްއަގުވާމީ ދަތުރުތައް ވެސް އަގުބޮޑުވާނެ ކަމަށް އައިލެންޑް އޭވިއޭޝަނުން ބުނެއެވެ. ނަމަވެސް އެ ޓިކެޓުތަކުން ބޮޑުކޮށްފައިވާ އަދަދެއް ހާމައެއް ނުކުރެއެވެ.

ކުއްލިއަކަށް މޯލްޑިވިއަނުން ޓިކެޓް އަގުބޮޑުކުރުމާ ގުޅިގެން ގިނަ ބަޔަކު އަންނަނީ އެ އެއާލައިނަށް ފާޑު ކިޔަމުންނެވެ.