އެގްރޯނެޓާއެކު ދަނޑުވެރިކަމުގެ ކުރިމަގު އުޖާލާވެއްޖެ

ދިވެހި ދަނޑުވެރިކަން ކުރިއަރުވައި، ފަސޭހަކަމާއެކު ދަނޑުވެރިކަން ކުރެވޭނެ މަގުފަހިކުރުމަށްޓަކައި، މިދިޔަ އަހަރުގެ އޭޕްރީލް މަހުގެ 21ވަނަ ދުވަހު ވުޖޫދަށް ގެނެވުނު އެގްރޯނެޓުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އަލަށް ދަނޑުވެރިކަން ފަށައިގަންނަށް ބޭނުންވާ ފަރާތްތަކަށާއި ދަނޑުވެރިކަން މިހާރު ކުރަމުންދާ ފަރާތްތަކަށް ބޭނުންވާ ފަންނީ އެހީތެރިކަމާއި އެކަމަށް ބޭނުންވާ ސާމާނު އެގްރޯނެޓުން ދަނީ ފޯރުކޮށްދެމުންނެވެ.

އެގްރޯނެޓާއެކު މަސައްކަތްކުރުމުގެ ޝައުގުވެރިކަން 1500ށް ވުރެ ގިނަ ދަނޑުވެރިން ފާޅުކޮށްފައިވާއިރު، ކުންފުނިން ދަނީ އެކަމަށް ޝަރުތުހަމަވާ ފަރާތްތަކާއެކު އެއްބަސްވުން އެކުލަވާލައި އަމަލީ މަސައްކަތްތައް ކުރަމުންނެެވެ. މިރޯދަ މަހުވެސް ދަނޑުވެރިންގެ އުފެއްދުންތައް އެގްރޯނެޓުން މާކެޓަށް ނެރެފައިވާއިރު، އޭގެ ތެރޭގައި ރާއްޖޭގެ ރިސޯޓްތައްވެސް ހިމެނެއެވެ. އެގްރޯނެޓުގެ މިމަސައްކަތްތަކާއެކު ދިވެހި ދަނޑުވެރިންގެ އުންމީދު މިވަނީ އައު ވެފައެވެ.

އެގްރޯނެޓާއެކު މަސައްކަތްކުރަން ބޭނުންވާ ފަރާތްތަކުން ދަނޑުވެރިކަން ކުރާ ބިމަކީ އެރަށެއްގެ ކައުންސިލްގެ ހުއްދައާއެކު ދަނޑުވެރިކަން ކުރާ ބިމަކަށް ވާންވާނެއެވެ. އެގްރޯނެޓް ކުންފުނިން ދަނޑުވެރިންނާ ގުޅިގެން ހައްދަން ސަރުކާރުން ހަވާލުކޮށްފައިވަނީ 17 ބާވަތެކެވެ. މި 17 ބާވަތުގެ ތެރެއިން ކޮންމެ ދަނޑުވެރިޔަކަށްވެސް ކޮންމެވެސް ދެ ބާވަތެއް ނެގުމުގެ ފުރުސަތު ލިބެއެވެ.  

ދަނޑުވެރިޔާ ޚިޔާރުކުރާ ދެ ބާވަތް ހެއްދުމަށް ބޭނުންވާ މުޑުވައް އެގްރޯނެޓުން ފޯރުކޮށްދޭއިރު، ބާވަތްތައް ހައްދާނެ ގޮތުގެ ޝެޑިއުލެއް އެކުލަވާލައި، އެޝެޑިއުލާ އެއްގޮތަށް ގަސް އިންދައި ހެއްދުމުގެ ކަންތައްތައް ކުރަންޖެހެއެވެ. ބާވާތްތައް އެންމެ ރަނގަޅު ގޮތުގައި ހެއްދުމަށް ބޭނުންވާ އިތުރު ވަސީލަތްތަކާއި ގަސް ހައްދަން ބޭނުންވާ ގަސްކާނާ ކުންފުނިން ދަނޑުވެރިންނަށް ފޯރުކޮށްދެއެވެ.

އަލަށް ދަނޑުވެރިކަން ކުރަން ފަށަން ބޭނުންވާ މީހުންނަށް އެގްރޯނެޓުން ސްޓާޓަރ ޕެކްތައް ފޯރުކޮށްދެމުން އަންނަ އިރު، މިހާރުވެސް 50ށް ވުރެ ގިނަ ފަރާތަށް މި ޕެކްތައް ވަނީ ފޯރުކޮށްދީފައެވެ.

އެގްރޯ ނޭޝަނަލް ކޯޕަރޭޝަންގެ މަސައްކަތްތައް ރާއްޖޭގެ އެކި ސަރަހައްދުތަކުގައި ކުރިއަށްދާއިރު، މިދާއިރާއަށް އަލަށް ނުކުންނަ ފަރާތްތަކަށް ބޭނުންވާ ހުރިހާ އެހީތެރިކަމެއް ފޯރުކޮށްދިނުމަށް އެގްރޯނެޓުން އޮތީ ތައްޔާރަށެވެ.

އެގްރޯނެޓަކީ ރާއްޖޭގައި ދަނޑުވެރިކަމުގެ ޞިނާޢަތް ކުރިއެރުވުމުގައި މަގުސަދުގައި ސަރުކާރުން އުފައްދާފައިވާ ކުންފުންޏެކެވެ. ރާއްޖޭގެ ދަނޑުވެރިކަމުގެ އުފެއްދުންތައް ހަމަ އަގުގައި ގަނެ އެތަކެތި މާކެޓްކޮށް ވިއްކުމާއި، ސަޕްލައި ޗެއިން ތަރައްގީ ކުރަން މަސައްކަތްކުރުމަކީ ކުންފުނީގެ މަގްސަދުތަކުގެ ތެރޭގައި ހިމެނޭ ކަންކަމެވެ. ދަނޑުވެރިންނަށް ހުރި އެންމެބޮޑު ގޮންޖެހުމަކީ އުފައްދާ ތަކެތި މާކެޓް ނުކުރެވުމާއި މަސައްކަތް އިތުރަށް ތަރައްގީ ކުރުމަށް ބޭނުންވާ ވަސީލަތްތައް ނުލިބުން ކަމަށް ދަނޑުވެރިން ބުނާއިރު، އެގްރޯނެޓާއެކު އެމައްސަލަތައް މިހާރު މިވަނީ ހައްލުވާން ފަށާފައެވެ.

ދަނޑުވެރިން ހައްދާ ތަކެތިން ބޮޑު މާކެޓެއް އުފައްދައި ދެއަހަރު ތެރޭގައި ރައްޔިތުންނަށް އޭގެ މަންފާ ވަރަށް ބޮޑަށް ލިބިގެންދާނެކަމަށް އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވެފައިވާއިރު، ހަމަގައިމުވެސް މިހާރު ދަނޑުވެރިން ގޮތް ހުސްވެ މާޔޫސްވާކަށް ނުޖެހޭނެއެވެ. ރާއްޖޭގެ ދަނޑުވެރިކަމުގެ ކުރިމަގު ފެންނަނީ ވަރަށް އުޖާލާކޮށެވެ.