"ގައުމު ހިންގުމުގައި އަންހެނުންގެ ބަސް އޮތުން މުހިއްމު"
ގަރާރު ދިރާސާކުރުމުގައި، އަންހެނުންނަށް ކުރިއެރުން ގެނެސްދިނުމުގެ ނަޒަރުންނާއި ލާމަރުކަޒީ ނިޒާމުގެ ނަޒަރުން ބެއްލެވުމަށް އެދިވަޑައިގަންނަވާ
ގަރާރު ހުށައެޅުއްވީ ގަލޮޅު އުތުރު ދާއިރާގެ މެމްބަރު އީވާ އަބްދުﷲ
އަންހެން ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުންގެ މަސްއޫލިއްޔަތު އަދާކުރުމުގައި ދިމާވާ ދަތިތަކަށް ހައްލެއް ގެނައުމަށް ގޮވާލައި ރައްޔިތުންގެ މަޖިލީހަށް ހުށައެޅި ގަރާރުގެ ބަހުސް ފަށައިފިއެވެ.
މި ގަރާރު މަޖިލީހަށް ހުށައެޅުއްވީ ގަލޮޅު އުތުރު ދާއިރާގެ މެމްބަރު އީވާ އަބްދުﷲއެވެ. އީވާ ވިދާޅުވީ ގަރާރު ހުށައެޅުއްވުމުގެ ބޭނުމަކީ، ގާނޫނުން އަންހެން ކައުންސިލަރުންނާއި ޑަބްލިއުޑީސީއަށް ދީފައިވާ ބާރުތައް ފުރިހަމަ ގޮތުގައި ލިބެމުންދޭތޯ ބެލުމާއި، އަހަރެއް ވެގެންދާއިރު ރަނގަޅު ކުރަންޖެހޭ ކަންކަން ބަލައި އެކަންކަން ރަނގަޅުކުރުމަށް ކަމަށެވެ.
އީވާ ވިދާޅުވީ، އަންހެނުންނަށް ޚާއްސަކޮށްގެން ކައުންސިލްގެ ވަކި އިންސައްތައެއް އޮންނަން ޖެހޭ ކަމަށް ގާނޫނުގައި ލިޔުނީ، ރަށު ފެންވަރުގައާއި އަތޮޅު ފެންވަރުގައި ބަސްބުނެ ކަންކަން ނިންމުމުގައި އަންހެނުންގެ ބަސް އޮންނަން ޖެހޭކަމަށް ގަބޫލްކޮށްގެން ކަމަށެވެ. އަދި ގައުމު ހިންގުމުގައި އަންހެނުންގެ ބަސް އޮތުން މުހިންމު ކަމަށް އީވާ ވިދާޅުވިއެވެ.
އީވާ ވިދާޅުވީ ކައުންސިލްތަކުގައި ތިބޭ އަންހެން މެމްބަރުންނާއި ޑަބްލިއުޑީސީ މެމްބަރުންނާ ވާހަކަދައްކާލުމުން, މައްސަލަތަކެއް ފާހަގަކުރައްވާ ކަމަށާއި، ބައެއް މެމްބަރުންނަށް މަސައްކަތުގައި އެއްވެސް ދައުރެއް ނޯންނަކަން ވިދާޅުވާކަމަށެވެ.
މުޅި ލާމަރުކަޒީ ނިޒާމު އަދިވެސް އައު ކަމަށެވެ. އެހެންކަމުން ބޭނުކީ މި ކަން ރަނގަޅަށް ދިރާސާކޮށް ބެލުުން ކަމަށެވެ.
ލާމަރުކަޒީ ނިޒާމަށް ޖާގަދޭންޖެހޭކަމަށާއި، މުޅިގައުމުގެ ތަރައްގީ ފުރިހަމަ ގޮތުގައި އިންސާފުވެރިކަމާއެކު ގެނެވޭނީ ރަށްރަށާއި އަތޮޅުތައް ބާރުވެރިކުރުވައިގެންކަން އެމްޑީޕީން ގަބޫލުކުރާކަމަށް އީވާ ވިދާޅުވިއެވެ.
އިވާ ވިދާޅުވީ, ގަރާރު ދިރާސާކުރުމުގައި އަންހެނުންނަށް ކުރިއެރުން ގެނެސްދިނުމުގެ ނަޒަރުންނާއި، ލާމަރުކަޒީ ނިޒާމުގެ ނަޒަރުން ބެއްލުވުމަށް އެދިވަޑައިގަންނަވާކަމަށެވެ.
އިވާ ހުށައެޅުއްވި ގަރާރުގައި ބުނެފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުން, ރަށްރަށާއި ސިޓީތައް ހިނގަނީ އަންހެނުންގެ ހައްގުތައް ރައްކާތެރިކުރެވި އަންހެނުންގެ ބައިވެރިވުމާ އެކުގައިކަން ކަށަވަރުކުރުމަށްޓަކައި, ކައުންސިލުތަކުގައި އަންހެނުންގެ ދައުރެއް ކަނޑައެޅިފައި އޮންނަންވާނެކަމަށް ބަޔާންކޮށްފައިވާކަމަށެވެ.
ރަށު ކައުންސިލުތަކާއި ސިޓީ ކައުންސިލުތަކަށް އިންތިޚާބުކުރެވޭ މެންބަރުންގެ ތެރެއިން %33, އަންހެނުންނަށް ޚާއްސަކުރެވިގެން ގާނޫނު އިސްލާހު ކޮށްފައިވީއިރު، ގާނޫނުގެ މަގުސަދާ އެއްގޮތަށް އަންހެން ކައުންސިލަރުން ކައުންސިލުގެ މަސްއޫލިއްޔަތު އަދާކުރުމުގައި ނުވަތަ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުން ކޮމިޓީގެ މަސްއޫލިއްޔަތު އަދާކުރުމުގައި އެ ގާނޫނު ސިފަކުރިގޮތަށް، އެ ގާނޫނުގެ ރޫހުގައި މަސައްކަތްކުރެވޭތޯ ކަށަވަރުކުރަންޖެހޭކަމަށެވެ.
އަންހެން ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުންގެ މަސްއޫލިއްޔަތު އަދާކުރުމުގައި ދިމާވާ ހުރަސްތަކާއި ގޮންޖެހުންތަކާއި މަސައްކަތްކުރުމުގައި ދިމާވާ ދަތިތައް ފާހަގަކޮށްދެއްވައި ރައްޔިތުންގެ މަޖިލީހުގެ ކަމާގުޅޭ ކޮމިޓީން އެސެސްމަންޓެއް ހައްދަވައިދެއްވުމަށް ގަރާރުގައި ވަނީ ގޮވާލާފައެވެ.
