އިސްލާމިކް މިނިސްޓްރީން އެދޭގޮތަށް ކަން ކުރެވޭނީ ސޯމިލް ހުސްކުރުމުން: މޭޔަރ މުއިއްޒު
8 އެޕްރީލު 2022 | ހުކުރު 12:17އެތަން ހުސްކޮށްދިނުމަށް ސަރުކާރުގައި އެދެމުންދާތާ 4 މަސްވެއްޖެ
މާލެސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު
އިސްލާމިކް މިނިސްޓްރީން އެދޭގޮތަށް ކަންކުރެވޭނީ ސޯމިލް ހުސްކުރުމުން ކަމަށް މާލެސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ސަލްމާން މިސްކިތުގެ ވަށައިގެން އޮތް ޕާކިންގ ޒޯންތައް ހުސްކޮށް ދިނުމަށް އެދި އިސްލާމިކް މިނިސްޓްރީން ވަނީ މާލެސިޓީ ކައުންސިލަށް ސިޓީއެއް ފޮނުވާފައެވެ. މިކަމާގުޅިގެން ރާއްޖެއެމްވީއަށް މައުލޫމާތު ދެއްވަމުން މުއިއްޒު ވިދާޅުވީ, ސޯމިލްގައި ހުރި އެކޮމަންޑޭޝަން ބްލޮކާއި ޕަބްލިކް ވޯރކްސްގެ ވެހިކަލްތައް ހުސްކުރުމުން ސަލްމާން މިސްކިތުގެ ވަށައިގެން އޮތް ޕާކިންގ ޒޯންތަކުގައި ހުރި ވެހިކަލްތަކަށް އެތަނުން ޖާގަ ދެވޭނެ ކަމަށެވެ.
އެތަން ހުސްކޮށްދިނުމަށް ސަރުކާރުގައި އެދެމުންދާތާ 4 މަސްވެއްޖެ ކަމަށާއި, އެތަނަކީ 500 ސައިކަލު ޕާކް ކުރެވޭނެ ޖާގަ އޮތް ތަނެއް ކަމަށް ވެސް މުއިއްޒު ވިދާޅުވިއެވެ. އަދި ސޯމިލް ހުސްކުރުމުން އެތަނުގައި ކުރަން ހުރި މަސައްކަތްތައް ވެސް ކައުންސިލްގެ މުވައްޒަފުން ކުރާނެ ކަމަށާއި, އިސްލާމިކް މިނިސްޓްރީން ފޮނުވި ސިޓީއަށް މިގޮތަށް ޖަވާބުދެއްވަން ނިންމާފައިވާ ކަމަށް މުއިއްޒު ވިދާޅުވިއެވެ.
ޑރ. މުއިއްޒު މިހެން ވިދާޅުވުމުން މިކަމަށް ރައްދު ދެއްވައި ރާއްޖެއެމްވީއަށް އިސްލާމިކް މިނިސްޓަރ ޑރ. އަހްމަދު ޒާހިރު އަލީ ވިދާޅުވީ, އެހެންތަނެއް ނުލިބުން އެއީ ސަލްމާން މިސްކިތް ވަށައިގެން އޮތް ޕާކިންގ ޒޯންތައް ހުސްކޮށްދޭންނުޖެހޭ ސަބަބެއް ނޫންކަމަށެވެ.
ރަމަޟާން މަހުގެ ކުރިން އައި ހުކުރު ދުވަހު ސަލްމާން މިސްކިތުގެ ނަމާދު ކުރާ ބައި ހުޅުވައި ނަމާދު ކުރަން ފަށާފައިވާއިރު، އެ ސަރަހައްދުގައި ޕާކް ކުރެވޭނެ އިންތިޒާމެއް ހަމަޖެހިފައި ނެތުމުން މިސްކިތަށް އަރާ މީހުންނަށް ވަނީ ބޮޑެތި ދަތިތަކަކާ ކުރިމަތިލާން ޖެހިފައެވެ. ސަލްމާން މިސްކިތުގެ ދެ ފަރާތުގައި ދެ ޕާކިންގ ޒޯން ގާއިމްކޮށްފައިވީނަމަވެސް, ދާއިމީކޮށް ކާރުޕާކު ކުރުމަށް އެ ދެ ޕާކިންގ ޒޯނުން ވެސް ގިނަ ސްލޮޓުތަކެއް މާލެ ސިޓީ ކައުންސިލުން ވަނީ ކުއްޔަށް ދޫކޮށްފައެވެ. އެހެން ކަމުން ސައިކަލް ޕާކް ކުރާނެ ޖާގަ ވަނީ ވަރަށް ބޮޑަށް މަދުވެފައެވެ.
މިސްކިތް ކައިރީގައި ޕާކުކުރާނެ ޖާގަ ނެތުމުން މިސްކިތަށް އަރާ މީހުންނަށް ވަރަށް ދަތިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މި ދެ ޕާކިންގ ޒޯނަކީ މީގެ ކުރިންވެސް ސަލްމާން މިސްކިތަށް އަރާ މީހުން ޕާކު ކުރުމަށް ހަަޖައްސާފައިވާ ތަން ކަމަށެވެ. އެތަނުގައި ކާރު ޕާކުކުރުމަށް 6 މަސް ދުވަހަށް ކުއްޔަށް ދިނީ މީގެ ކުރީ ސިޓީ ކައުންސިލުން ކަމަށާއި، މިހާރު އޮތް ކައުންސިލުން އެ މުއްދަތު އިތުރުކޮށްދިނީކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ މި ޕާކިން ޒޯންތައް ހުސްކުރެވުމުން ޕާކިންގ މައްސަލައަށް ހައްލެއް އައިސް, މިސްކިތަށް އަރާ މީހުންނަށް ވަރަށް ބޮޑު ފަސޭހައެއް ވެގެންދާނެ ކަމަށެވެ.
