މަސް ކިރާ އަދަދު އިތުރުވެ، ދޯންޏަކުން ފަސް ޓަނު މަސް ގަންނަން މިފްކޯއިން ނިންމައިފި
7 އެޕްރީލު 2022 | ބުރާސްފަތި 07:09މިގޮތަށް ނިންމީ ދޯނިފަހަރު ކިޔުގައި ހޭދަކުރާ ވަގުތު މަދުކުރުމުގެ ގޮތުންނާއި ރަނގަޅު ކޮލިޓީގައި މަސް ގަނެ، ބަހައްޓަން ބޭނުންވާތީ
ޅ. ފެލިވަރު މަސް ކާރުޚާނާ
މަސް ކިރާ އަދަދު އިތުރުވެ، ދޯންޏަކުން ފަސް ޓަނު މަސް ގަންނަން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް(މިފްކޯ) އިން ނިންމައިފިއެވެ.
މިފްކޯ އިން ބުނީ މިދުވަސްވަރު ދެކުނުގެ މަސްވެރިކަން އާދަޔާއި ޚިލާފަށް ރަގަޅުވެ، އެއްފަހަރާ ގިނަ ދޯނިފަހަރުތަކެއް ދެކުނުގެ ސެންޓަރުތަކާއި ބޯޓުފަހަރަށް މަސްކިރުވުމަށް އަންނަމުންދާތީ، މިފްކޯގެ ފްރީޒިންގ ކެޕޭސިޓީއަށްވުރެ އިތުރަށް މަސް ލިބެމުން ދިއުމާއެކު މަސްކިރުވުމަށް ދަތިތަކެއް ދިމާވެފައިވާ ކަމަށެވެ.
އެގޮތުން 4 އޭޕްރީލް 2022 ގައި 770 ޓަނު މަސް އަދި 5 އޭޕްރީލް 2022 ގައި 620 ޓަނު މަސް ކިރުވުމަށް ސެންޓަރުތަކަށް އައިސްފައިވާ ކަމަށާއި އެވްރެޖްކޮށް ދޯންޏަކުން 12 ޓަނުގެ މަސް ބާނަމުން ދާއިރު ބޮޑެތި ދޯނިފަހަރުތަކުން 60 ޓަނާއި 25 ޓަނާއި ދޭތެރޭގެ ޢަދަދުތަކުން މަސްބާނަ ކަމަށެވެ.
4 އެޕްރީލްގައި ކިޔުއަށް އަރާފައިވާ ހުރިހާ ދޯންޏެއްގެ މަސް 5 އޭޕްރިލުގެ ނިޔަލަށް ކިރައި ނިންމާފައިވާކަން ފާހަގަކޮށް މިފްކޯ އިން ބުނީ އޭޕްރީލް 6 ވަނަ ދުވަސް ފެށުނުއިރު ކިއުގައި 510 ޓަނު މަސް އެބަހުރި ކަމަށެވެ. މިފްކޯގެ ދެކުނުގެ ފްރީޒިން ކެޕޭސިޓީ އަކީ ދުވާލަކު 420 ޓަނަށްވާއިރު ދެކުނުގެ މަސްގަންނަ ފްލީޓާއި ގުޅުމަށް ދުވާލަކު 100 ޓަނުގެ މަސްގަނެވޭ، ޖަޒީރާ-102 ދެކުނުން ގަނެގެން ގެންދިޔަ މަސް ފެލިވަރަށް ހުސްކުރުމަށްފަހު ފުރައިގެން 7 އޭޕްރީލް 2022 ގެ ހެނދުނު ކޫއްޑޫ ބަނދަރަށް ގޮސްފައިވާ ކަމަށެވެ.
މިފްކޯއިން ބުނީ މިހާލަތުގައި ދޯނިފަހަރު ކިޔުގައި ހޭދަކުރާ ވަގުތު މަދުކުރުމުގެ ގޮތުންނާއި ރަނގަޅު ކޮލިޓީގައި މަސް ގަނެ، ބަހައްޓަން ބޭނުންވާތީ، 5 އޭޕްރީލްގައި ކިޔުއަށް އަރާފައިވާ ދޯނިފަހަރުގެ މަސް ކިރުމުގެ މަސައްކަތް ކުރަމުންދާ ކަމަށެވެ. އަދި މިހާރު ކިޔުގައި ހުރި ދޯނިފަހަރުގެ މަސްކިރައި، ފްރީޒްކުރުމަށް ވަގުތު ބޭނުންވާތީ 6 އެޕްރީލް 2022 އިން ފެށިގެން ކިޔުގައި ހުރި ދޯނިފަހަރުގެ މަސް މެނޭޖް ކުރެވެންދެން ދޯންޏަކުން 5 ޓަނުގެ މަސް ކިރާ ގޮތަށް ނިންމާފައިވާ ކަމަށެވެ.
މިގޮތަށް ހަމަޖެއްސި ކަމުގައި ވީނަމަވެސް ކޫއްޑޫ ފިޝަރީޒް ކޮމްޕްލެކްސް އާއި އައްޑޫ ފިޝަރީޒް ކޮމްޕްލެކްސް ގައި މިހާރު ކިޔު ނަމްބަރު ދެވިފައި ހުރި ދޯނިފަހަރު މަސް ކިރައި ނިމެންދެން ކޮންޓްރޯލް ނެތި ކުރިޔަށް ގެންދެވޭނެ ކަމަށާއި އަދި ކޯލްޑް ސްޓޯރުތައް ފުރެމުންއަންނާތީ ޖާގަ ހެދުމުގެ ގޮތުން މެދުކެނޑުމެއް ނެތި ކެރިއަރ ބޯޓުތައް ގެނެސް ލޯޑުކޮށް އެކްސްޕޯޓް ކުރުމުގެ މަސައްކަތް ވެސް ކުރަމުންދާ ކަމުގައި މިފްކޯއިން ބުނެއެވެ.
މިފްކޯއިން އަބަދުވެސް މަސައްކަތްކުރަމުން ގެންދަނީ މަސްވެރިންނަށް ދެވޭ ޚިދުމަތުގެ ފެންވަރު ރަނގަޅުކުރުމަށާއި އަވަސް ޚިދުމަތް ފޯރުކޮށްދީ، މަސްވެރިންގެ ކަންބޮޑުވުންތައް ބަލައިގަނެ އެކުންފުނިން ދެވޭ ޚިދުމަތަކީ މަސްވެރިންނަށް ފަސޭހަ ޚިދުމަތަކަށް ހެދުމަށް ކަމަށް ވަނީ ބުނެފައެވެ.
