ނެދަލޭންޑްސްގެ ޤައުމީ ކޯޗު ކެންސަރަށް ފަރުވާ ހޯދަނީ
4 އެޕްރީލު 2022 | ހޯމަ 08:37ވަރލްޑްކަޕްގައި ނެދަލެންޑްސްއަށް އިރުޝާދުދޭނީ ވެން ހާލް
ވެން ހާލް ދަނީ ކެންސަރަށް ފަރުވާ ހޯދަމުން: ފޮޓޯ-ނެދަލެންޑްސް އެފްއޭ
ނެދަލެންޑްސްގެ ޤައުމީ ފުޓްބޯޅަ ޓީމްގެ ކޯޗު ލުއި ވެން ހާލް ކެންސަރަށް ފަރުވާ ހޯދަމުންދާކަން ހާމަކޮށްފިއެވެ. ފަރުވާ ހޯދަމުންދާތާ ދުވަސްތަކެއް ފަހުން ވެން ހާލް ބުނެފައވަނީ އޭނާއަށް ޕްރޮސްޓޭޓް ކެންސަރު ޖެހި ފަރުވާ ހޯދަމުންދާކަމަށެވެ.
ނެދަލެންޑްސްގެ ކޯޗު އެކަން އިއުލާންކުރީ އެޤައުމުގެ ޓީވީ ޕްރޮގްރާމެއްގައެވެ. ކުރިން މެންޗެސްޓަރ ޔުނައިޓެޑާއި, ބަޔާން މިއުނިކަށްވެސް އިރުޝާދުދިން ކޯޗު ބުނީ މިދިޔަ އިންޓަރނޭޝަނަލް ބްރޭކްގައިވެސް އޭނާ ދިޔައީ ބައްޔަށް ފަރުވާ ކުރަމުން ކަމަށާއި, އެކަމަކު އެކަން ކުޅުންތެރިންނަށް ސިއްރުކުރިކަމަށެވެ.
ވެން ހާލް ބުނީ ޤައުމީ ޓީމްގެ ކޭމްޕްގެ ތެރެއިންވެސް އޭނާ ކުޅުންތެރިންނަށް ނޭންގި ފަރުވާއަށް ދިޔަކަމަސެވެ. އެކަން އޭނާ އިއުލާންކުރުމާއި ހަމައަށް އޭނާ ހުރީ ފުރިހަމަ ޞިއްހަތުގައިކަމަށް ކުޅުންތެރިންނަށް ހީވެފައި އޮންނާނެކަމަށް ވެން ހާލްއާއި ހަވާލާދީ މީޑިޔާތަކުން ވަނީ ރިޕޯރޓްކޮށްފައެވެ.
ވެން ހާލް ނެދަލެންޑްސްގެ ޤައުމީ ކޯޗުކަމާ ހަވާލުވެހުރީ ތިންވަނަ ފަހަރަށެވެ. އޭނާ ވަނީ މީގެކުރިން ނެދަލެންޑްސް ގޮވައިގެން 2014 ވަނަ އަހަރު ވަރލްޑްކަޕްގެ ތިންވަނަ ހޯދައިދީފައެވެ. އަދި މިއަހަރު ޤަތަރުގައި އޮންނަ ވަރލްޑްކަޕްގައިވެސް ނެދަލެންޑްސްއަށް އިރުޝާދުދޭނީ ވެން ހާލްއެވެ. ކެންސަރަށް ފަރުވާ ހޯދަމުންވެސް އޭނާ ޤައުމީ ޓީމަށް އިރުޝާދުދޭނެއެވެ.
ވެން ހާލް ކެންސަރާ ހަނގުރާމަކުރަމުންދާކަން އިއުލާންކުރުމުން އޭނާ ކުރިން އިރުޝާދުދިން ކްލަބްތައް ހިމެނޭ ގޮތަށް ދުނިޔޭގެ ފުޓްބޯޅަ އާއިލާއިން ދަނީ އަވަސް ޝިފާއަކަަށް އެދެމުންނެވެ.
