އަމީންއަށް ކުރާ ދައުވާ އެހެން ދުވަހަކަށް ރީޝެޑިއުލް ކުރަނީ

ޓެރަރިސްޓް ޖަމާއަތްތަކަށް މީހުން ރެކްރޫޓް ކުރާކަމުގެ ތުހުމަތުގައި ހައްޔަރު ކުރި މުހައްމަދު އަމީނުގެ މައްޗަށް ކުރާ ދައުވާގެ އަޑުއެހުން އެހެން ދުވަހަކަށް ރީޝެޑިއުލް ކުރުމަށް ނިންމައިފިއެވެ.

މި މައްސަލައިގެ އަޑުއެހުން ތާވަލުކޮށްފައި އޮތީ އާދިއްތަ ދުވަހުގެ ހެނދުނު 09:30 އަށެވެ. އެގޮތުން އަޑުއެހުން ކުރިއަށް ގެންދިއުމަށް ހަމަޖެހިފައި އޮތީ ވީޑިއޯ ކޮންފަރެންސްކޮށެވެ. އެހެންނަމަވެސް، ދިފާއުން ވަނީ ކޯޓަށް ހާޒިރުވެގެން ޝަރީއަތް ކުރިއަށް ގެންދަން ބޭނުންވާކަން ފާހަގަކޮށްފައެވެ. ވުމާއެކު، މައްސަލަ ބައްލަވާ ގާޒީވެސް ނިންމެވީ މިމައްސަލަ ކޯޓަށް ހާޒިރުވެގެން ކުރިއަށް ގެންދިއުމަށް މައްސަލަ އެހެން ދުވަހަކަށް ރީ ޝެޑިއުލް ކުރެއްވުމަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ އިސްގާޒީ އަހުމަދު ޝަކީލެވެ.

އަމީންގެ މައްޗަށް ކުރާ ދައުވާގެ އަޑުއެހުންތައް ކުރިއަށް މިގެންދަނީ އޭނާގެ ދައުވާތައް ހައިކޯޓުން ބާތިލުކުރީ ރަނގަޅަށް ނޫންކަމަށާއި، އެ މައްސަލަ ކްރިމިނަލް ކޯޓުގައި ބަލަމުންދިޔަ ހިސާބުން ކުރިއަށް ގެންދިއުމަށް ދިވެހިރާއްޖޭގެ ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާގުން ޙުކުމް ކުރެއްވުމާއި ގުޅިގެންނެވެ.

އަމީނަކީ ޖިނާއީ އިޖުރާއަތުގެ ޤާނޫނުގެ ދަށުން ބަންދުކޮށްފައިވާ މީހެއްކަމަށްވާތީ އޭނާގެ މައްޗަށް ދައުވާކުރަން ޖެހޭ މުއްދަތުގައި ދައުވާކޮށްފައި ނުވާކަމަށް ބުނެ އަމީންގެ ފަރާތުން ދައުވާތައް ބާތިލުކޮށްދިނުމަށް އެދި ކްރިމިނަލް ކޯޓަށް ހުށައެޅިއެވެ. ހަމައެއާއެކު، ދެ ދައުވާއަކީވެސް އެއް ވާގިއާތަކެއްގެ މައްޗަށް އުފުލާފައިވާ ދައުވާތަކެއްކަމަށް ބުނެ އަމީންގެ ފަރާތުން ވަނީ ދައުވާތައް ބާތިލުކޮށްދިނުން އެދި ކްރިމިނަލް ކޯޓަށް ހުށައަޅާފައެވެ.

ނަމަވެސް އެ ހުށައެޅުން ޤަބޫލު ނުކުރުމުން އަމީންގެ ފަރާތުން އެ ނިންމުން ހައިކޯޓުގައި އިސްތިއުނާފުކޮށް، ހައިކޯޓުން މި މައްސަލަ ނިމުނީ އަމީންއާއި އެއްކޮޅަށެވެ.

ހައިކޯޓުގެ ނިންމުމުގައި ބުނެފައިވަނީ އަމީން ބަންދުކޮށްފައިވަނީ ޓެރަރިޒަމްގެ ގާނޫނުގެ ބަދަލުގައި ޖިނާއީ އިޖުރާއަތުގެ ގާނޫނުގެ ދަށުން ނަމަވެސް, ދައުވާ ކުރުމަށް މުއްދަތު ގުނާފައިވަނީ ޓެރަރިޒަމްގެ ގާނޫނުގެ ދަށުން ކަމަށެވެ.

އަމީނުގެ ދައުވާތައް ބާތިލުކުރުމަށް ހައިކޯޓުން ނިންމާފައިވާގޮތާމެދު ޕްރޮސެކިއުޓަރ ޖެނެރަލްގެ އޮފީހުން ހިތްހަމަ ނުޖެހޭތީ އެ ގަޒިއްޔާ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކޮށްގެން، އެ ދައުވާތައް ބާތިލުކުރީ ރަނގަޅަށް ނޫންކަމަށް ދިވެހިރާއްޖޭގެ ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާގުން ވަނީ ހުކުމްކޮށްފައެވެ.

އަދި އަމީންގެ މައްސަލަ ކްރިމިނަލް ކޯޓުގައި އޭރު ބަލަމުން ދިޔަ ހިސާބުން ކުރިއަށް ގެންދިއުމަށް ވެސް ހުކުމުގައި ބަޔާން ކޮށްފައިވެއެވެ. އެއާއެކު މި މައްސަލައިގެ އަޑުއެހުންތައް އައު ގަޒިއްޔާ ނަންބަރަކާއެކު އަނެއްކާވެސް ކޯޓުގައި މިވަނީ ފަށާފައެވެ.