565 މިލިއަން ރުފިޔާގެ މަޝްރޫއުތައް އިފްތިތާހުކޮށްދެއްވުމަށް ރައީސް އައްޑޫ ސިޓީއަށް ވަޑައިގެންފި

މި ސަރުކާރުން އައްޑޫ ސިޓީގައި ކުރިއަށް ގެންދިޔަ 565 މިލިއަން ރުފިޔާގެ ތަރައްގީގެ މަޝްރޫއުތައް އިފްތިތާހުކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އައްޑޫ ސިޓީއަށް ވަޑައިގެންފިއެވެ.

އެމަނިކުފާނު އައްޑޫ ސިޓީއަށް ވަޑައިގެންނެވީ ހޮނިހިރު ދުވަހުގެ ހަވީރުއެވެ. އެމަނިކުފާނަށް މަރުހަބާ ދެންނެވުމަށް ގައުމީ ދިދައާއި އެމްޑީޕީގެ ދިދަ ހިފައިގެން ގިނަ އަދަދެއްގެ މީހުން ގަން އިންޓަރނޭޝަނަލް އެއަރޕޯޓަށް ގޮސްފައިވެއެވެ.

ރައީސްގެ މި ދަތުރުފުޅުގެ ތެރެއިން އައްޑޫ ސިޓީ ކައުންސިލް މެމްބަރުންނާއި އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެމްބަރުންނާއި ބައްދަލުކުރެއްވުމަށް ވަނީ ހަމަޖެހިފައެވެ. މީގެ އިތުރުން އައްޑޫ ސިޓީގެ ގުޅިފައިވާ ރަށްތަކުގެ އިތުރުން ހުޅުމީދޫ އަށް ވެސް އެމަނިކުފާނު ވަޑައިގަންނަވާނެއެވެ.

ރައީސްގެ މި ދަތުރުފުޅުގެ ތެރެއިން އިންޑިއާގެ ހިލޭ އެހީގެ ދަށުން އައްޑޫ ސިޓީގައި ގާއިމްކުރި ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ރަސްމީކޮށް ހުޅުވައިދެއްވައި، އައްޑޫ ސިޓީގެ ބިން ހިއްކުމުގެ މަޝްރޫއުގެ އެއްބަސްވުމުގައި ސޮއިކުރައްވާ މަގުތައް ޒަމާނީ ފެންވަރަކަށް ހެދުމުގެ މަސައްކަތް ރަސްމީކޮށް ފައްޓަވައި ދެއްވާނެއެވެ. މި މަޝްރޫއުތަކަކީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނާއި ހިލޭ އެހީއާއެކު ކުރިއަށް ގެންދާ މަޝްރޫއުތަކެކެވެ.

އައްޑޫ ސިޓީ ޑިވެލޮޕްމަންޓް ޕްރޮޖެކްޓްގެ ދަށުން ޑޮމެސްޓިކް ބަޖެޓުން މިއަހަރު 9 މިލިއަން ރުފިޔާ ހަރަދުކުރުމަށް ހަމަޖެހިފައިވާ އިރު، އައްޑޫ ސިޓީގެ 4 ރަށެއްގެ މަގުތައް ހެދުމަށް ޑޮމެސްޓިކް ބަޖެޓުން 11.2 މިލިއަން ރުފިޔާ އަދި އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ތެރެއިން ހަރަދުކުރުމަށް ވަނީ މި މަސައްކަތުގެ ތެރޭގައި ހިމަނާފައެވެ. އަދި އައްޑޫ ސިޓީގެ ހުޅުމީދޫގެ މަގު ހެދުމަށް 2.25 މިލިއަން ރުފިޔާ އަދި މަގު ހެދުމުގެ މަސައްކަތުގެ ދެވަނަ ފޭސް މިހާރު އޮތީ ޕްރީ ޓެންޑަރިންގެ މަރުހަލާގައެވެ.

އައްޑޫގެ ބިން ހިއްކުމުގެ މަސައްކަތުގެ އެއްބަސްވުމުގައި ރައީސްގެ މި ދަތުރުފުޅުގެ ތެރެއިން ސޮއެކުރެވިގެންދާ އިރު، އެކަމަށް ޑޮމެސްޓިކް ބަޖެޓުން 6.69 މިލިއަން ރުފިޔާ އަދި އިންޑިއާ އެޒްޒިމް ބޭންކުގެ ލައިން އޮފް ކްރެޑިޓްގެ ދަށުން ހަރަދު ކުރުމަށް ވަނީ ހިމަނާފައެވެ.

އައްޑޫ ސިޓީގެ ހިތަދޫން 90 ހެކްޓަރުގެ ބިން ހިއްކުމަށް ހަމަޖެހިފައިވާ އިރު، މަރަދޫ އަދި މަރަދޫ ފޭދޫ އިން 74 ހެކްޓަރުގެ ބިމާއި، ހުޅުމީދޫން 38 ހެކްޓަރު އަދި ޓުއަރިޒަމަށް ހާއްސަކޮށްގެން 25 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.

އައްޑޫ ސިޓީއަށް މިއަހަރުގެ ބަޖެޓުގައި އެކަނި ވެސް 284 މިލިއަން ރުފިޔާ ވަނީ ހިމަނާފައެވެ.