ކުށުގެ ވެށިން ކުޑަކުދިން ސަލާމަތްކުރުމަށް މިހާރަށް ވުރެ ބޮޑަށް މުއައްސަސާތައް ގުޅިގެން މަސައްކަތް ކުރަން ޖެހޭ ކަމަށް މިނިސްޓަރ އޮފް ސްޓޭޓް ފޯ ހޯމް އެފެއަރޒް އަލީ ނަޒީރު ވިދާޅުވެއްޖެއެވެ.

އަލީ ނަޒީރު މިހެން ވިދާޅުވީ މިނިސްޓްރީ އޮފް ހޯމް އެފެއަރޒްގެ އިސްނެންގެވުމުގެ ދަށުން، ޑިޕަރޓްމަންޓް އޮފް ޖުވެނައިލް ޖަސްޓިސްއާއި މޯލްޑިވްސް ކަރެކްޝަނަލް ސަރވިސް ގުޅިގެން ''ޖުވެނައިލް ޖަސްޓިސް ޓްރޭނިންގ'' ފުރިހަމަކުރި ފަރާތްތަކަށް ސެޓްފިކެޓް ހަވާލުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

އަލީ ނަޒީރު ވިދާޅުވީ ދުނިޔޭގެ ފެންވަރަށް ފަރުމާކުރެވިފައިވާ ކުޑަކުދިންގެ އަދުލުގެ ގާނޫނު ތަންފީޒު ކުރުމަށް އެންމެ މުހިންމުކަމެއް ކަމަށް ދެކިވަޑައިގަންނަވަނީ ކުޑަކުދިންގެ އަދުލުގެ ނިޒާމުގެ ތެރޭގައި މަސައްކަތްކުރާ ހުރިހާ މުވައްސަސާއެއްގެ ފަރާތްތަކުގެ ވިސްނުމާއި ފިކުރު އަދި ބުއްދި ގާނޫނާ އެއްވަރަށް ތަރައްގީކުރުމަށް ކަމަށެވެ.

ކުއްޖަކު ކުށަށް ހުށަހެޅުމުގެ ކުރިން، ގުޅުންހުރި މުވައްސަސާތަކުން އެއްބާރުލުންދީގެން އަޅާ ފިޔަވަޅުތަކުގެ ސަބަބުން އެ ކުއްޖާ ކުށުގެ ވެއްޓަށް ވަނުމުގެ ފުރުސަތު ކުޑަވެގެންދާ ކަމަށާއި އެކަންކަން ކުރެވޭނީ މިހާރަށްވުރެ ބޮޑަށް ގުޅުންހުރި މުއައްސަސާތަކުން އެއްބާރުލުންދީ، ގުޅިގެން މަސައްކަތް ކުރުމުން ކަމަށް އަލީ ނަޒީރު ވިދާޅުވިއެވެ. އަލީ ނަޒީރު ވިދާޅުވީ މިފަދަ ޖޮއިންޓް ތަމްރީން ޕްރޮގްރާމްތައް އިތުރަށް ހިންގުމަކީ މުހިންމު ކަމެއް ކަމަށެވެ. އަދި ވިދާޅުވީ އެކި މުއައްސަސާތަކުގައި މަސައްކަތްކުރާ ފަރާތްތަކުގެ ނަޒަރިއްޔާތުން އަދުލުގެ ނިޒާމާ ގުޅުންހުރި ކަންތައްތައް ބައިވެރިންނާ ޚިއްސާކުރެވުނު ކަމަށާއި، އަސާސީ ތަމްރީނެއްގެ ގޮތުން މި ތަމްރީން ޕްރޮގްރާމް ހިންގުމަށް ފެނިވަޑައިގަންނަވާކަމަށެވެ.

މީގެ އިތުރުން ޑިޕަރޓްމަންޓް އޮފް ޖުވެނައިލް ޖަސްޓިސްގެ ޑިރެކްޓަރ ޖެނެރަލް ހުނާނާ ލަޠީފް ވިދާޅުވީ ގާނޫނާ ޚިލާފު އަމަލުތަކަށް ހުށަހެޅުމުގެ ނުރައްކަލުގައި ތިބި ކުދިންނަކީ މި މުޖްތަމައުގައި ދިރިއުޅެމުންދާ ވަރަށް ނާޒުކު ފައްތަރެއްގައި ތިބި ކުދިންކަމަށާއި އެކުދިންގެ ހަޔާތުގައި ތަހައްމަލް ކުރަންޖެހޭ ހިތްދަތި އަދި އަނިޔާވެރި ތަޖުރިބާތަކުގެ ސަބަބުން އެކުދިންގެ ވިސްނުމާއި އަހުލާގަށް ނޭދެވޭ އަސަރުތަކެއް ކުރާކަމަށެވެ. އަދި މިފަދަ ކުދިންގެ ތެރެއިން ކުޑަކުދިންގެ ޢަދުލުގެ ނިޒާމުގެ ތެރެއަށް ވަންނަމުންދާ ކުދިން ގިނަ ވަމުންދާ ކަމަށާއި، މި ނިޒާމުގެ ތެރެއިން ދެވޭ އަޅާލުމާއި ހޯދައި ދެވޭ ފުރުސަތުތަކާއި ފޯރުކޮށްދެވޭ އެހީތެރިކަމަކީ އެ ކުދިން ކާމިޔާބުކަމާއެކީގައި މުޖްތަމައުއަށް ބިނާކުރަނިވި ފަރުދުންގެ ގޮތުގައި ނިކުތުމަށް މަގުފަހިކޮށްދެވޭ ކަމެއް ކަމަށެވެ.

20 މާރޗު 2022ން ފެށިގެން ފަސް ދުވަހަށް ހިންގުނު މި ތަމްރީމް ޕްރޮގްރާމް އަކީ ކުޑަކުދިންގެ އަދުލުގެ ގާނޫނުގެ 26 ވަނަ މާއްދާގައި ބަޔާންކޮށްފައިވާ ގޮތުގެ މަތިން، އެކި ހައިސިއްޔަތުން ކުޑަކުދިންނާ މުއާމަލާތްކޮށް، އެ ކުދިންގެ މައްޗަށް ފިޔަވަޅު އެޅުމުގައި މަސައްކަތްކުރާ ފަރާތްތަކަކީ ކުޑަކުދިންނާއެކު މަސައްކަތްކުރުމަށް ޚާއްސަ ތަމްރީނާއި ހުނަރާއި އިރުޝާދު ލިބިފައިވާ ފަރާތްތަކެއްކަން ކަށަވަރުކުރުމަށް ހިންގުނު ޕްރޮގްރާމް އެކެވެ. މި ޓްރޭނިންގެ މަގުސަދަކީ ކުޑަކުދިންނާއެކު މަސައްކަތްކުރާ ފަރާތްތައް ކުޑަކުދިންގެ އަދުލުގެ ނިޒާމަށް ހޭލުންތެރިކުރުމާއި، އެ ނިޒާމުގެ ތެރެއިން އެ ކުދިންނަށް ލިބިދޭ ހައްގުތަކާއި ރައްކާތެރިކަމަށް ހޭލުންތެރިކުރުމެވެ.

އެގޮތުން މި ތަމްރީން ޕްރޮގްރާމްގައި މޯލްޑިވްސް ކަރެކްޝަނަލް ސަރވިސްގެ އިތުރުން މިނިސްޓްރީ އޮފް ހޯމް އެފެއަރޒް އާއި މޯލްޑިވްސް ޕޮލިސް ސަރވިސްއާއި ޕްރޮސެކިއުޓަރ ޖެނެރަލްގެ އޮފިސްއާއި ޑިޕަރޓްމަންޓް އޮފް ޖުވެނައިލް ޖަސްޓިސްގެ ފަރާތްތައް ހިމެނޭގޮތަށް ޖުމްލަ 30 ބައިވެރިން ހިމެނެއެވެ. 

މި ތަމްރީން ޕްރޮގްރާމްގައި މަލްޓި-ސެކްޓޯރިއަލް ކޯޑިނޭޝަން އެންޑް ކޯޕަރޭޝަން، ކީ ޕްރިންސިޕަލްސް އޮފް ޖުވެނައިލް ޖަސްޓިސް ސިސްޓަމް، ޑައިވަރޝަން އަދި ރެސްޓޮރޭޓިވް ޖަސްޓިސްއާ ގުޅޭގޮތުން ބައިވެރިންނަށް މައުލޫމާތު ފޯރުކޮށްދީފައިވެއެވެ.