އެމްސީއެސްގެ ބެލުމުގެ ދަށުގައި ކުޑަކުދިން އެބަތިބި، ދާދި އަވަހަށް ލޯންގްޓަރމް ސެކިއަރ ފެސިލިޓީ ގާއިމްކުރާނެ: ކޮމިޝަނަރ އޮފް ޕްރިޒަންސް
24 މާރިޗު 2022 | ބުރާސްފަތި 13:05ބޮޑެތިމީހުންނަށް ކަންކުރާ އުސޫލުން ކަންތައްކުރުމުން ކުދިންނަށް އެކަމުގެ ނޭދެވޭ އަސަރު ކުރޭ
ޖުވެނައިލް ޖަސްޓިސް ޓްރޭނިންގ ނިންމުމުގެ ރަސްމިއްޔާތުގައި ކޮމިޝަނަރ އޮފް ޕްރިޒަންސް އަހްމަދު މުހައްމަދުފުޅު ވާހަކަދައްކަވަނީ
މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ބެލުމުގެ ދަށުގައި ކުޑަކުދިން އެބަތިބި ކަމަށާއި، ދާދި އަވަހަށް ލޯންގްޓަރމް ސެކިއަރ ފެސިލިޓީ ގާއިމްކުރާނެ ކަމަށް ކޮމިޝަނަރ އޮފް ޕްރިޒަންސް އަހްމަދު މުހައްމަދުފުޅު ވިދާޅުވެއްޖެއެވެ.
މިނިސްޓްރީ އޮފް ހޯމް އެފެއަރޒްގެ އިސްނެންގެވުމުގެ ދަށުން، ޑިޕާރޓްމަންޓް އޮފް ޖުވެނައިލް ޖަސްޓިސްއާއި މޯލްޑިވްސް ކަރެކްޝަނަލް ސަރވިސް ގުޅިގެން ބޭއްވި ޖުވެނައިލް ޖަސްޓިސް ޓްރޭނިންގ ނިމުމުގެ ރަސްމިއްޔާތުގައި ވާހަކަދައްކަވަމުން ކޮމިޝަނަރ ވިދާޅުވީ, ކުރިއަށް ގެންދެވުނު ޖުވެނައިލް ޖަސްޓިސް ޓްރޭނިންގއިން ބައިވެރިންނަށް ލިބެންޖެހޭ, ގާނޫނުން ތަސައްވަރުކުރާ މިންވަރަށް މުހިއްމު މައުލޫމާތައް ލިބިފައިވާ ކަމަށް ގަބޫލުކުރައްވާ ކަމަށެވެ. އަދި ކުޑަކުދިންގެ އަދުލުގެ ނިޒާމަށް ވިސްނާއިރު، ބޮޑެތި މީހުންނަށް ކަންކުރާ އުސޫލުން ކަންތައް ކުރުމުން ކުޑަކުދިންނަށް އެކަމުގެ ނޭދެވޭ އަސަރުކުރާކަމަށް ފާހަގަ ކުރެވިފައިވާކަމަށް ކޮމިޝަނަރ ވިދާޅުވިއެވެ.
ކުދިން އަލުން އަނބުރާ މުޖުތަމައަށް ގެނައުމުގައި ބޮޑެތި ގޮންޖެހުންތައް ދިމާވާކަން ފާހަގަކުރައްވައި ކޮމިޝަނަރ ވިދާޅުވީ, ކުޑަކުދިންގެ އަދުލުގެ ގާނޫނު ވުޖޫދުކުރެވުނުއިރު މިކަންކަމަށް ރިޔާއަތްކުރެވިފައިވާކަމަށާއި, މިއީ ދައުލަތުގެ އިދާރާތަކުން އަމަލުކުރަންޖެހޭ އިޖުރާއަތުތައް ބަޔާންކުރެވި، ކުޑަކުދިންނަކީ އެކުދިންނަށް ޚާއްސަ ރައްކާތެރިކަމެއް ލިބިގެންވާ ކުދިންތަކެއް ކަމަށް ދެކިގެން ތައްޔާރުކުރެވިފައިވާ ގާނޫނެއް ކަމަށެވެ. އަދި މިގާނޫނުގެ ދަށުން މޯލްޑިވްސް ކަރެކްޝަނަލް ސަރވިސްގެ މައްޗަށް ލާޒިމްކުރާ ޒިންމާތަކަކީ މުޖްތަމައުގައި ކޮންމެހެން ނުގެންގުޅެވިދާނެ ހާލަތަކަށް ކުއްޖާ ދާހިނދު، އެންމެ ފަހު މަރުހަލާއަކަށް ގެންދަންޖެހޭ ތަނަކީ ކަރެކްޝަނަލް ސަރވިސްގެ ބެލުމުގެ ދަށުގައި ހުންނަ ޖުވެނައިލް ޑިޓެންޝަން ސެންޓަރާއި ލޯންގްޓަރމް ސެކިއަރ ފެސިލިޓީއަށް ކަމަށް ކޮމިޝަނަރ ވިދާޅުވިއެވެ. އަދި ވިދާޅުވީ މިވަގުތު ލޯންގްޓަރމް ސެކިއަރ ފެސިލިޓީ ގާއިމުކުރެވިފައިނުވާ ކަމަށާއި، ނަމަވެސް ދާދި އަވަހަށް މި ފެސިލިޓީ ގާއިމުކުރެވޭނެ ކަމަށެވެ.
މީގެ އިތުރުން ކޮމިޝަނަރ ވިދާޅުވީ ގާނޫނު ލާޒިމްކުރާ ބައެއް ގަވާއިދުތައް ހެދުމުގެ މަސައްކަތް ކުރިއަށްދާ ކަމަށާއި، މިހާރުވެސް އެމްސީއެސްގެ ބެލުމުގެ ދަށުގައި ކުޑަކުދިން އެބަ ތިބި ކަމަށެވެ. އަދި މަސައްކަތްތައް ބެކްލޮގްއަކުން ފަށައިގަންނަންޖެހޭއިރު، އެމްސީއެސްގެ މައްޗަށް ގާނޫނުން ލާޒިމްކުރާ ޒިންމާތަކަށް ބިނާކޮށް ޚާއްސަ ތަމްރީން ޕްރޮގްރާމެއް ތައްޔާރުކޮށް، މުވައްޒަފުން އަހުލުވެރިކުރުމުގެ މަސައްކަތް ކުރިއަށްގެންދާ ކަމަށް ވިދާޅުވިއެވެ. އަދި ކުދިން ތަރުބިއްޔަތުކުރުމުގައާއި ރިހެބިލިޓޭޓްކުރުމުގައި އެންމެ މުހިންމު ސިފައަކީ ރަނގަޅު އާދަކާދައާއި އިސްލާމީ ރިވެތި އަޚުލާގަށް އަހުލުވެރިވެ ރީތި ނަމޫނާއެއް ދެއްކުންކަމަށާއި, އޭގެ ސަބަބުން މި ކުރާ މަސައްކަތަށް އިތުރު ކާމިޔާބީ ލިބޭނެކަމަށް ކޮމިޝަނަރ ވިދާޅުވިއެވެ.
