ބީއެމްއެލްގެ މުވައްޒަފުން އިސްނަގައިގެން މާލެ ސުވިމިންގ ޓްރެކް އަދި ހުޅުމާލެ ފޭސް 2 ބީޗް ސަރަހައްދު ސާފުކުރުމުގެ ހަރަކާތްތަކެއް ހުކުރު ދުވަހުގެ ހެނދުނު ބާއްވައިފިއެވެ.
މި ހަރަކާތަކީ ބީއެމްއެލްގެ މުވައްޒަފުން އިސްނަގައިގެން މާރިޗު މަހުގެ 20 ވަނަ ދުވަހު ދުނިޔޭގައި ފާހަގަ ކުރަމުން އަންނަ އިންޓަރނޭޝަނަލް ޑޭ އޮފް ހެޕިނަސް އާއި ގުޅުވައިގެން ކުރިޔަށް ގެންދިޔަ ހަރަކާތެއް ކަމަށް އެ ބޭންކުން ބުނެއެވެ.
މި ހަރަކާތް ކުރިއަށް ގެންގޮސްފައިވަނީ ހެނދުނު 6:00ން ފެށިގެން 9:00 އަށެވެ. މިއީ ސުވިމިންގ އެސޯސިއޭޝަން އޮފް މޯލްޑިވްސް، ޑައިވް ކްލަބް މޯލްޑިވްސް، ޑައިވް ޑެސްކް އަދި ޕާރލޭއާއި ގުޅިގެން ހިންގި ހަރަކާތެކެވެ.
އަޅުގަނޑުމެން މީގެ 3 އަހަރުކުރިންވެސް ސްވިމިންގް ޓްރެކް ސާފްކުރިން. އޭރާ އަޅާބަލާއިރު މިހާރު ސްވިމިންގ ޓްރެކް ސަރަހައްދު ސާފުކަމަށް ފާޙަގަކުރެވޭ. އެހެންނަމަވެސް އަދިވެސް ކޮންމެވެސް ވަރަކަށް ދަޅާއި ޕްލާސްޓިކް ފުޅި މޫދަށް އަޅާފައި ހުންނަތަން މި ފެންނަނީ. އަޅުގަނޑުމެންގެ އެދުމަކީ އެންމެހާ ބޭފުޅުންވެސް މިތާނގައި ހުންނަ ޑަސްބިން ބޭނުންކުރެއްވުން. އަދި މޫދަށް ކުނި ނޭޅުން. ޅުމާލެ ފޭސް 2 ގެ ސަރަހައްދަށް ބަލާއިރުވެސް އަތިރިމައްޗާއި ގޮނޑުދޮަށުގައި ގިނަ ޕްލާސްޓިކް ކޮތަޅާއި ފުޅި ހުރި. ހުޅުމާލެގެ ބީޗް ސަރަހައްދުގެ އެއްބައި މިއަދު ސާފުުކުރެވުނު އިރު 500 ކިލޯގެ ކުނި ނެގެނު. މި ހަރަކާތުގައި މުވައްޒަފުންގެ ބައިވެރިވުން ވަރަށް ފުރިހަމައަށް ލިބުނުބީއެމްއެލްގެ މެނޭޖަރ ޕަބްލިކް ރިލޭޝަންސް މުހައްމަދު ސައީދު
މި ދެސަރަހައްދުން 755 ކިލޯގެ ކުނި ނަގާފައިވެއެވެ. މީގެ ތެރެއިން 84 ކިލޯގެ ޕްލާސްޓިކް ވަނީ ރީސައިކަލް ކުރުމަށް ފާރލޭއާ ހަވާލުކޮށްފައެވެ.
މި ހަރަކާތުގައި ބީއެމްއެލްގެ 80 އަށްވުރެ ގިނަ މުވައްޒަފުން ވަނީ ބައިވެރިވެފައެވެ. މިދިޔަ އަހަރުވެސް އަތޮޅުތެރޭގައި މަސައްކަތް ކުރާ މުވައްޒަފުންވަނީ މިދުވަހާއި ގުޅުވައިގެން ވ. ފެލިދޫ، ލ. ފޮނަދޫ އަދި ހދ. ކުޅުދުއްފުށީގައި ހަރަކާތްތަކެއް ހިންގާފައެވެ.
