ބާރަށު ނެރު ފުންކުރުމާއި ކުރީގެ ބަނދަރު ފުންކުރުމުގެ މަޝްރޫއުގެ އަމަލީ މަސައްކަތް ފެށުމަށް ތައްޔާރުވެއްޖެ
މިއީ 12.17 މިލިޔަން ރުފިޔާގެ މަޝްރޫއެއް
ބާރަށު ނެރާއި ކުރީގެ ބަނދަރު އަލުން ފުންކުރުމުގެ މަސައްކަތް
ހއ. ބާރަށު ނެރު ފުންކުރުމާއި ކުރީގެ ބަނދަރު އަލުން ފުންކުރުމުގެ މަޝްރޫއުގެ އަމަލީ މަސައްކަތް ފެށުމަށް ތައްޔާރުވެފައިވާކަމަށް, މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ(އެމްޓިސީސީ)ން މައުލޫމާތު ދީފިއެވެ.
އެމްޓީސީސީން ބުނި ގޮތުގައި މި މަޝްރޫއުގެ އަމަލީ މަސައްކަތް ފެށުމަށްޓަކައި ޕްރޮޖެކްޓް ސައިޓް ވަނީ މާރޗް 12ވީ ހޮނިހިރު ދުވަހު މޮބިލައިޒް ކުރެވިފައިއެވެ.
އެމްޓީސީސީން ބުނި ގޮތުގައި މި މަޝްރޫއުގެ ދަށުން ކޮނެވޭ ނެރުގެ ދިގު މިނަކީ 755 މީޓަރެވެ. އަދި ފުޅާ މިނަކީ 34 މީޓަރެވެ. މީގެ އިތުރުން ނެރު ކޮނުމަށް ހަމަޖެހިފައިވަނީ 8 މީޓަރުގެ ފުންމިނަށެވެ. މި މަޝްރޫއުގެ ދަށުން މިހާރު ބޭނުންކުރަމުންދާ ބަނދަރު 3.5 މީޓަރަށް ފުންކުރުމުގެ މަސައްކަތް ކުރުމަށްވެސް ވަނީ ހަމަޖެހިފައިއެވެ.
ބާރަށު ނެރު ފުންކުރުމާއި ކުރީގެ ބަނދަރު އަލުން ފުންކުރުމުގެ މަޝްރޫއަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށް ގެންދާ މަޝްރޫއެކެވެ. މިއީ 12.17 މިލިޔަން ރުފިޔާގެ މަޝްރޫއެކެވެ.
