އިބްރާހިމް ރަޝީދުގެ ހުކުމުން 20 ދުވަސް މާފުކޮށްދެއްވައިފި
10 މާރިޗު 2022 | ބުރާސްފަތި 18:323 ދުވަސް ގޭބަންދުގައި ހުންނަން ޖެހޭ
އިބްރާހިމް ރަޝީދު
ޅ. ނައިފަރަށް ނިސްބަތްވާ އިބްރާހިމް ރަޝީދުގެ މައްޗަށް ކޮށްފައިވާ ހުކުމަކުން ތަންފީޒު ނުވެ އޮތް 23 ދުވަހުގެ ޖަލު ހުކުމުން 20 ދުވަސް މާފުކޮށްދެއްވައިފިއެވެ.
ރާއްޖެއެމްވީއަށް އިބްރާހިމް ރަޝީދު ބުނީ ބުރާސްފަތި ދުވަހު ރައީސް އިބްރާހިމް މުހައްމަދު ސޯލިހު އަދަބު ލުއިކޮށްދެއްވާފައި ވާކަން މޯލްޑިވްސް ކަރެކްޝަނަލް ސަރވިސްއިން އަންގާފައިވާ ކަމަށެވެ. 20 ދުވަސް މައާފުކޮށްދީފައިވާއިރު، 3 ދުވަސް ގޭބަންދުގައި ހުންނަ ގޮތަށެވެ. ނަމަވެސް ގާނޫނު އޮންނަ ގޮތުން ކުށުގެ ރިކޯޑު ސާފުނުވާ ކަމަށާއި، ކުށުގެ ރިކޯޑު ސާފުވާނީ ހުކުމް ތަންފީޒުކޮށް ނިމޭތާ 5 އަހަރު ފަހުން ކަމަށް ކަރެކްޝަންސްއިން އަންގާފައިވާ ކަމަށެވެ.
އިބްރާހިމް ރަޝީދު ބުނިގޮތުގައި ކުށުގެ ރިކޯޑު ސާފުނުވުމަކީ ވަރަށް ބޮޑު ކަންބޮޑުވުމެއް ކަމަށާއި، ވަޒީފާ ހޯދުމަށް ދަތިވާ ކަމަށެވެ. އަދި ކުށުގެ ރިކޯޑު ސާފުނުވާނަމަ ސިވިލް ސަރވިސް ވަޒީފާއެއް ނުލިބޭނެކަން އޭނާ ފާހަގަކުރިއެވެ.
އިބްރާހިމް ރަޝީދުގެ މައްސަލައަށް ސަމާލުކަން ލިބުނީ އޭނާ މިނިވަންކުރިތާ 7 އަހަރު ފަހުން ވައްކަމުގެ މައްސަލައެއްގެ ހުކުމް ތަންފީޒު ނުކޮށް 23 ދުވަސް އޮތްކަން ހާމަވި ހިސާބުންނެވެ. މިކަން ހާމަވިއިރު، އިބްރާހިމް ރަޝީދު އައީ ނައިފަރު މިސްކިތެއްގެ މަސައްކަތު މީހެއްގެ ވަގުތީ ވަޒީފާ އަދާކުރަމުންނެވެ. ނަމަވެސް އެ މަގާމަށް ދާއިމީ މީހަކު ހޯދަން އިއުލާނު ކުރުމުން އިބްރާހިމް ރަޝީދުގެ ކުށުގެ ރެކޯޑް ސާފުކުރުމުގެ ތެރޭގައި 23 ދުވަހުގެ ޖަލު ހުކުމެއް އޮތްކަން ހާމަވިއެވެ. އަރަބި ޓީޗިން ހަދަމުންދާއިރު، އޭނާގެ އުޅުމަށް މިހާރު ވަނީ ހެޔޮ ބޮޑެތި ބަދަލުތަކެއް އައިސްފައެވެ.
