ޤައުމީ މި ދެބަތަލުން މަތިވެރިވި ދިވެހި ދެ އަޖުދާދުންނަށް މަތިމައްޗަށް ސާބަސް
އާކޯއްޓޭ ބުރުޒާއި މަތިގެ
އެއީ ދިވެހިރާއްޖޭގެ ރަސްކަމުގެ ވަލީ އަހުދުން (ކްރައުން ޕްރިންސުން)ނެވެ. ދުރުން އައި ބޭރު ބާޣީ ދުޝްމަނުން ރާއްޖެއަށް ދިން ޢުދުވާނީ ޙަމަލާތަކުގައި, ހިތާމަކުރުން ނޫން ގޮތެއް ނެތް ހާލަތުގައި، ގައުމަށްޓަކައި ވީހާލެއްވެވަޑައިގަތުމުގެ ގައުމީ ގުރުބާނީގައި އެތައް ވޭނެއް އަނިޔާއެއް ލިބިވަޑައިގެން ތުރާލާ ދުއްތުރާ ތަހައްމަލު ކުރައްވަންޖެހިވަޑައިގެންނެވި މަނިއްޕުޅުން ނުވަތަ ކަލަމިންޖާއިންނެވެ.
އުތުރުކަރައިގެ އެތަންމިތާނގައި އެންމެދަތި ހާލުކޮޅުގައި އުޅުއްވަންޖެހިވަޑައިގެންނެވި އަދި ސަލާމަތުން ގައުމަށް އެނބުރި ވަޑައިގެން އާދަޔާޚިލާފު ގިނަތަޖުރިބާއާއި އިތުރު އިލްމާއި އެތައް ހުނަރެއް ލިބިވަޑައިގެން ދިވެހި ސިންގާސަނާގައި ރެދަލިކުރެއްވި (ރާއްޖޭގެ ރަސްކަންކުރެއްވި) އެންމެ އަގުހުރި އެންމެ ވަރުގަދަ އަސްކަރީ ގައުމީ ޚިދުމަތްތައް ކުރެއްވި 2 މަހާރަދުންނެވެ.
ދިވެހިރާއްޖޭގެ ޝުޖާޢީ (އާރާއިބާރުގަދަ/ އަސްކަރީ ދިފާޢީ ޚިދުމަތްތައް ކުރެއްވި) މަހާރަދުން ކަމުގައިވި އައްސުލްޠާން މުޙައްމަދު ޢިމާދުއްދީން (އައްވަލު) ސިރީ ކުލަ ސުންދުރަ ކައްތިރި ބަވަނަ މަހާރަދުން (1621-1648) (ބޮޑު ރަސްގެފާނު) އެއީ، އަސްކަރީ ނުވަތަ ދިފާއީގޮތުން ދިވެހި ގަައުމަށް އެންމެ ވަރުގަދަ އެންމެ ގިނަގުނަ ޚިދުމަތްތަކެއް ކުރެއްވި އަދި ކަމުގެ އިލްމާއި ހުނަރާއި ތަޖުރިބާ ލިބިވަޑައިގެންފައިވާ މަހާރަދުންނެވެ.
ރާއްޖެއިން ބޭރުން، ރާއްޖޭގެ ދިފާއަށްޓަކައި އެޒަމާނަށް އެންމެ އެކަށޭނަ ބޮޑުބަޑިއާއި ހަތިޔާރު ހޯއްދެވުމާއި، ރާއްޖޭގެ ދިފާއަށްޓަކައި ވެރިރަށް ފުރަމާލޭގައި ދިފާއީ ބުރުޒުތައް ބިނާކުރެއްވުމާއި ފުރަމާލޭ ބޮޑުފާރަކީ އެރަދުންގެ ކޮމާންޑަރ އިން ޗީފް ކަމުގައި މުޅިން އަލަށް ކުރެވުނު ވަރަށް ބޮޑެތި ގައުމީ މަސައްކަތްތަކެކެވެ. އެހާތަނަށް މިރާއްޖޭގައި ކުރެވިފައި ނެތްވަރުގެ އެންމެ ވަރުގަދަ އަސްކަރީ އަދި ދިފާއީ ގައުމީ ޚިދުމަތްތަކެވެ.
އައްސުލްތާނުލް ޣާޒީ މުޙައްމަދު ޣިޔާޘުއްދީން ސިރީ ކުލަ ރަންމަނި މަހާރަދުން ( 1767 - 1773 ) ޙާޖީ ބަންޑާރައިން / ޝަހީދުކުޅަ ބަންޑާރައިންގެ އަގުހުރި ގައުމީ އަސްކަރީ ޚިދުމަތްތައް ތާރީޚުގައި ލިޔެވޭނީ ލިޔަންޖެހޭނީ ރަން އަކުރުންނެވެ.
އެއީ ރާއްޖޭގެ ދިފާއަށްޓަކައި ވެރިރަށް ފުރަމާލޭ އާކޯއްޓޭ ބުރުޒު ބިނާކުރެއްވި މަހާރަދުންނެވެ.
ބޭރުގެ އުދުވާނީ ހަމަލާތަކުން ދިވެހި ގައުމު ދިފާއު ކުރައްވައި، ދިވެހި ގައުމަށް ނަސްރާއި ނަސީބާއި ކާމިޔާބު ހޯއްދަވައިދެއްވި މަތިވެރިވި ދިވެހި މުޖާހިދެއް އަދި ގައުމީ ބަތަލެކެވެ.
ޤައުމީ މި ދެބަތަލުން މަތިވެރިވި ދިވެހި ދެ އަޖުދާދުންނަށް މަތިމައްޗަށް ސާބަހެވެ. ފަތިފައްޗަށް އަމުނައިގެން މަތިވެރި ޝުކުރާއި ވެދުން ބަރުތީލައެވެ. މި ޤައުމު ދެމިއޮތްހާ ޒަމާނެއްގައެވެ. އަބަދުގެ އަބަދަށެވެ.
މިކަންކަމުން ލިބޭ ގައުމީ ފިލާވަޅަކީ އަބަދަށް ގައުމަށް ނަސްރު ދިނުމުގެ ފިލާވަޅެވެ. ވަތަނިއްޔަތުގެ ދިފާއުގާ ޖާނު ދިނުމުގެ ފިލާވަޅެވެ.
