ހޯމްސްޓޭ އަޔަސް މިގައުމުގައި ތިބޭނީ މުސްލިމް ދިވެހިންނެވެ.

މިފެށުނު ދެހާސް ބާވީސްވަނަ އަހަރަކީ ދިވެހިރާއްޖޭގެ އިގްތިސާދުގެ ރަންބިސްއަޅާ ކުކުޅަށް ފަންސާސް އަހަރު ފުރޭ އަހަރެވެ. ދިވެހި އިގްތިސާދުގެ ރަންބިސްއަޅާ ކުކުޅަކީ ޓޫރިޒަމެވެ. ފަތުރުވެރިކަމުގެ ސިނާއަތެވެ. އެ ކުކުޅުގެ އުމުރުންވެސް ޒުވާންކަމުގެ ދުވަސްތައް ފަހަނަޅައިގޮސް ދޮށީ އުމުރުގެ ދުވަސްތައް ގުނެން ފެށީއެވެ. ފާއިތުވީ އަހަރުތަކުގައި ދިވެހި އިގްތިސާދުގެ އެންމެ ފަލަ ލޭނާރުކަމުގައި މި ކުކުޅު ވަނީ ހިމެނިފައެވެ. މަސްވެރިކަމާއި ދަނޑުވެރިކަމާއި ޝިިޕިންގ ފަދަ ދާއިރާތައް ވަނީ މާބޮޑަށްވެސް ފަހަތަށް ސޮއްސާލައިގެން ގޮސްފައެވެ. އެހައިވެސް ކުކުޅުގެ ދުވެލި ބާރެވެ. ދެކުނު އޭޝިއާގެ އެންމެހައި ގައުމުތަކުގެ ތެރެއިން އުފެއްދުންތެރިކަމާއި ބޮލަކަށް ޖެހޭ ނިސްބަތް އެންމެ މަތީގައިވާ ގައުމަކީ ދިވެހިރާއްޖެއެވެ. ފަތުރުވެރިކަން މީގެ ފަންސާސް އަހަރު ކުރިން ދިވެހިރާއްޖެއަށް ތައާރަފުވެގެން އައިއިރު މިސަރަހައްދުގައި އާބާދީގެ ނިސްބަތުން ބޮލަކަށް ޖެހޭ މިންވަރު އެންމެ ކުޑަ ގައުމަކީ ދިވެހިރާއްޖެއެވެ.

ހުރިހައި ގޮތަކުން ދިވެހިރާއްޖެ ބަދަލުކޮށްލި އެއްޗަކީ ފަތުރުވެރިކަމުގެ ސިނާއަތް ކަމުގައިވާއިރު މި ސިނާއަތް މިގައުމަށް ތައާރަފު ކުރުމުގެ ޝުކުރު ހައްގުވަނީ ކާކަށް ބާވައެވެ. އޭރުގެ ސަރުކާރަށް ބާވައެވެ. ނުވަތަ ވިސްނުމާއި ހިކުމަތްތެރިކަމާއެކު މިކަމަށް ކުރިމަތިލި ދިވެހި ތިން ހަތަރު ޒުވާނުންނަށް ބާވައެވެ. ޔަގީންވާ ކަމަކީ ފަތުރުވެރިކަން ތައާރަފުވެފައި އޮތީ އޭރުގެ ރައީސް ނާސިރުގެ މާސްޓަރ ޕްލޭނެއްގެ ދަށުން ނޫންކަމެވެ. އެކަމަކު ރައީސް ނާސިރު ގެންގުޅުއްވީ ފަތުރުވެރިކަމަށް ފަހި ސިޔާސަތެކެވެ. އެކަމަށް ހިތްވަރު ދެއްވައި ސަރުކާރުގެ ފަރާތުން ދެވެން އޮތް އެންމެހައި ހިތްވަރަކާއި އެހީތެރިކަމެއް ނާސިރު ދެއްވިއެވެ. އެހެންވީމާ ފަތުރުވެރިކަން ދިވެހިރާއްޖޭގެ ގޮނޑުދޮށްތަކާ ހަމަޔަށް ގެނައުމުގެ ރީތިނަމާއި ޝުކުރު ހައްގުވަނީ އަޅުގަނޑުގެ ނަޒަރުގައި އެކަމަށް އިސްވެ ގުރުބާނީތަކެއް ވެފައިވާ ދިވެހި ތިން ހަތަރު ޒުވާނުންނަށެވެ. އޭގެ ތެރެއިން ވަކި މީހަކަށް ނޫނެވެ. ކެރަފާ އަހުމަދު ނަސީމާއި ކޮލި މުހައްމަދު އުމަރު މަނިކާއި ޗަމްޕާ ހުސައިން އަފީފު ޝާމިލްވާގޮތުންނެވެ.

މީގެ ފަންސާސް އަހަރު ކުރިން ދިވެހިރާއްޖެއަށް ފަތުރުވެރިކަން ތައާރަފުކުރި ޒަމާނުގައި އެކަމާ ދެކޮޅު ހެދި ބަޔަކުވެސް އުޅުނެވެ. އެއީ ކުރަން ހެޔޮނުވާނޭ ކަމެކޭ ބުނެ ވާހަކަ ދެއްކި މީހުންވެސް އުޅުނެވެ. ދޮން ފަރަންޖީން އައިސް ނިވާކަންކުޑަ ފޭރާމުގައި އުޅޭ މަންޒަރު ނުބަލާންވެގެން ރާއްޖެ ދޫކޮށް އެހެން ތަންތަނަށް ހިޖުރަކުރުންވެސް ހެވޭ ބުނި މީހުން އުޅުނެވެ. އެކަމަކު އެއަޑުތައް މަޑުމަޑުން ހިނދެމުން ހިނދެމުންގޮސް އެންމެފަހުން ނިވުނީއެވެ. ދިވެހިރާއްޖެއަށް ފަތުރުވެރިކަން ތައާރަފުވީ ވަން އައިލެންޑް ވަން ރިސޯޓު ފިކުރަށް ފައްތައިގެންނެވެ. އާއްމުންނާއި ފަތުރުވެރިން ވަކިކޮށް ބައިތިއްބައިގެންނެވެ. އެކަމަކު އެޒަމާން މިހާރު ފާއިތުވެގެން ހިނގާއްޖެއެވެ. ފަތުރުވެރިކަމަކީ މިހާރު މަސްގަނޑެކެވެ. އެމަސްގަނޑު ބޭނުންކޮށްގެން އެކި ނަންނަމުގައި މިހާރު ހެދިކާ އެބަ އުފައްދައެވެ. ސަފާރީ ވައްތަރަކާއި ގެސްޓަހައުސް ވައްތަރަކާއި ހޯމްސްޓޭ ވައްތަރަކާއި މިހެންގޮސް އަދިވެސް ކިތަންމެ ވައްތަރެއް އެބަފެނެއެވެ.

ފަތުރުވެރިކަމުގެ މަސްގަނޑުން އެންމެ ފަހުން އަލަށް އުފެއްދި ހެދިކާގެ ބާވަތަކީ ހޯމްސްޓޭއެވެ. މީގެ ސިފަޔާއި ބައްޓަމަށް ބަލައިފައި އޭގެ ރަހަ ނުބަލާން ގަދައަޅާ ބަޔަކުވެސް މިހާރު އެބަފެނެއެވެ. ބުނާތީ އިވެއެވެ. ތިޔަ އެއްޗެއްގެ ރަހަ ބެލުމަށްވުރެ ރަނގަޅުވާނީ ނުބެލުމެވެ. ދިވެހީންގެ ދީނާއި ދިވެހީންގެ ސަގާފަތު ތިޔައެއްޗެއްގެ ސަބަބުން ވީދި ހަލާކުވެ ނެތިގެން ހިނގައިދާނެއެވެ. މި އަޑުއަޑަށް ވިސްނައިލީމާ ހަނދާނަށް އަންނަނީ މީގެ ފަންސާސް އަހަރު ކުރީންވެސް ބަޔަކު ދެއްކި ވާހަކަތަކެވެ. އޭރުވެސް ބުނީ ހަމަ މިހެންނެވެ. ދިވެހިރާއްޖެވާ ސަލާމަތެއް ނުވާނެއެވެ. ދިވެހިވަންތަކަން އޮޔާގޮސް ނިމިދާނެއެވެ. އެކަމަކު މި ސިނާއަތަށް ފަންސާސް އަހަރު ފުރިގެން އެކަމުގެ އިހުތިފާލުތައް މިއަދު ފާހަގަކުރަމުންދާއިރު މިގައުމުގައި އަދިވެސް މިތިބީ ދިވެހީންނެވެ. ދިވެހީންނަކީ މުސްލިމުންނެވެ. އެ ހަގީގަތް ބަދަލެއް ނުވެއެވެ. އެހެންވީމާ އަޅުގަނޑު ގަބޫލުކުރާ ގޮތުގައި ހޯމްސްޓޭގެ އިގްތިސާދީ މަންފާ ފެންނާން ފެށީމާ މިއަޑުއަޑުވެސް މަޑުމަޑުން ހިނދިގެން ހިނގައިދާނެއެވެ.

އައު ކޮންމެ ކަމަކީ މިޒާތުގެ ކަމެކެވެ. އައު ކަންކަމަށް ބިރުގަތުމަކީ ބައެއް މީހުންގެ ކިބައިގައި ހުންނަ ސިފައެކެވެ. އައު ކަންކަން ތަޖުރިބާކުރަން ޖެހިލުންވުމަކީ އޮންނަ ކަމެކެވެ. ވަން އައިލެންޑް ވަން ރިސޯޓް ފިކުރަށް ފައްތައިގެން ދިވެހިރާއްޖޭގައި ފަތުރުވެރިކަން ފުޅާކުރަމުން އައި ދުވަސްވަރު ވެސް ބައެއް މީހުންނަށް ގަބޫލު ކުރެވުނީ މި ސިނާއަތުގެ މުގުލުގައި ތިބެންވާނީ ވަކި ބަޔަކު ކަމުގައެވެ. މިކަން ކުރުމުގެ ވިސްނުމާއި ކެރިކުޅަދާނަކަން ލިބިގެންވަނީ ހަމައެކަނި ވަކި ބަޔަކަށް ކަމުގައެވެ. މި ސިނާއަތުގެ ބައެއް މުއައްސިސުންވެސް މި ވިސްނުން އެއްދުވަސްވަރެއްގައި ގެންގުޅުއްވިއެވެ. އެހެންވީމަތާއެވެ. ހިކިކިރާއި ތެލުގެ ވިޔަފާރި ކުރެއްވި ބޭފުޅަކު މާލެއަތޮޅު ދެކުނު ބިތުން ބޮޑުފިނޮޅޭ ކިޔުނު ރަށެއް ރިސޯޓެއްގެ ގޮތުގައި ތަރައްގީ ކުރައްވާ ވާހަކަ ދެކެވުނު ތަނެއްގައި ހުންނަވައިފައި ކޮންމެވެސް މުއައްސިސަކު ވިދާޅުވި ކަމަށްވެއެވެ. އޭނާވެސް ރިސޯޓު ހަދަނީ ހެއްޔެވެ. ތިޔައީ އަދި ތިޔަހެން ކުރެވޭ ކަންކަމެއް ނޫނެވެ.

ކޮންމެއަކަސް އެއީ އޭރުގެ ވިސްނުމެވެ. މިދެންނެވި ވިޔަފާރިވެރިޔާ ރިސޯޓެއް ތަރައްގީ ކުރައްވައި އޭގެ ފަހުން އެ ސިލްސިލާޔަށް އިތުރު ބޮޅުތަކެއްވެސް ގަތައިލައްވައި މި ސިނާއަތަށް އައު ކަންކަން ތައާރަފު ކުރެއްވީމާ މިއަދު އެންމެންވެސް މިތިބީ އެކަން ބަލައިގެންނެވެ. މުގުރިހަޔާއި ރަތްހަނޑުލުގެ ބަތާއި ބަންކުބެޑު ނޫން އެހެން އެއްޗަކަށް ފަރިތަވެފައި ނެތް ރިސޯޓު މުވައްޒަފުންނަށް ފިނިކުރި ކޮޓަރިޔާއި ގެރި ރިހަޔާއި ކުކުޅު ރިހަޔާއި ސަޓަންޏާއި ލިބުނީ މިދެންނެވި ވިޔަފާރިވެރިޔާ އެކަންކަން ތައާރަފު ކުރެއްވުމުންނެވެ. މިކަމުން އެނގެނީ މި ސިނާއަތަށް އަލަށް ނިކުންނަ މީހުންގެ ފަރާތުންވެސް ސިނާއަތަށް ލިބިފައިވަނީ އިތުރު ދިރުމާއި ކުރިއެރުންކަމެވެ. ސިނާއަތަށް ގިނަ މީހުން ނިކުމެ ކުރާ ޚިދުމަތުގެ ފައިދާއޮތީ ޖުމްލަ ގޮތެއްގައި މުޅި ގައުމަށް ކަމެވެ. އަޅުގަނޑު ޔަގީންކުރާ ގޮތުގައި ހޯމްސްޓޭގެ ސަބަބުންވެސް ލިބޭނީ މިކަހަލަ ކުރިއެރުމެވެ. ފަތުރުވެރިކަމަށް އަންނާނީ އިތުރު ދިރުމެވެ. އަޅުގަނޑުމެންނަށް އޮތީ އެކަމަށް ފުރުސަތުދީގެން ތިބުމެވެ.