މިދިޔަ އަހަރު ނިންމި، ކުޑަކުދިންނަށް ޖިންސީ ގޯނާ ކުރުމާއި ގުޅޭ ހުރިހާ ދައުވާއެއް ދައުލަތަށް ސާބިތުކޮށްދެވުނު
10 މާރިޗު 2022 | ބުރާސްފަތި 08:222021 ވަނަ އަހަރު 110 މީހެއްގެ މައްޗަށް ކުޑަކުދިންނަށް ޖިންސީ ގޯނާ ކުރުމާއި ގުޅޭ ދައުވާތައް ކުރެވިފައިވޭ
ޕްރޮސެކިއުޓަރ ޖެނެރަލް ހުސައިން ޝަމީމް- ވަށާޖެހޭ ނިޒާމެއް ޤާއިމުކޮށް، ޖިނާއީ ޢަދުލުގެ ނިޒާމު ފުރިހަމަ ގޮތުގައި ހިންގުމުގައި ގޮންޖެހުންތަކެއް ހުރިކަމަށް ޝަމީމް ވަނީ ވިދާޅުވެފައި
މިދިޔަ އަހަރު ނިންމި, ކުޑަކުދިންނަށް ޖިންސީ ގޯނާ ކުރުމާއި ގުޅޭ ހުރިހާ ދައުވާއެއް ދައުލަތަށް ސާބިތުކޮށްދެވުނުކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.
ޕީޖީ އޮފީހުން އެ އޮފީހުގެ 2021 ވަނަ އަހަރުގެ އަހަރީ ރިޕޯޓު ނެރެފައިވާއިރު، 2021 ވަނަ އަހަރު 110 މީހެއްގެ މައްޗަށް ކުޑަކުދިންނަށް ޖިންސީ ގޯނާ ކުރުމާއި ގުޅޭ ދައުވާތައް ކުރެވިފައިވާކަން ރިޕޯޓުގައި ފާހަގަކޮށްފައިވެއެވެ. އަދި އެ އަހަރު އެބާވަތުގެ 10 މައްސަލައެއް ކޯޓު މަރުޙަލާއިން ނިމިފައިވާއިރު، އެ ހުރިހާ މައްސަލައެއްގައިވެސް ވަނީ ކުށް ސާބިތު ކޮށްދެވިފައެވެ.
އަހަރީ ރިޕޯޓުގައި ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެފައިވަނީ، 2020 ވަނަ އަހަރުން ފެށިގެން އެންމެ އިސްކަމެއް ދެއްވައިގެން ކުރައްވަމުން ގެންދަވާ އެއް މަސައްކަތަކީ ކުޑަކުދިންނަށް ރައްކާތެރި މާޙައުލެއް ޤާއިމުކޮށްދިނުން ކަމަށެވެ. ވަކިން ޚާއްޞަކޮށް، ކުޑަކުދިންނަށް ޖިންސީ ގޯނާ ކުރާ މީހުންގެ މައްސަލަތަކުގެ ތަޙްޤީޤުތަކުގެ ފެންވަރު ރަނގަޅުކޮށް، ރައްޔިތުންގެ އިތުބާރު ހޯދުމަށް ކުރަންޖެހޭ ކަންކަން ދެނެގަނެ، އެމަސައްކަތް ކުރުންކަން ޝަމީމް ފާހަގަކުރެއްވިއެވެ.
ޝަމީމް ވިދާޅުވީ، އެމަސައްކަތުގައި ވޭތުވެދިޔަ ދެ އަހަރު ބޮޑެތި ކާމިޔާބީތަކެއް ޙާސިލު ކުރެވިފައިވާކަމަށެވެ. އެގޮތުން، 2019 ވަނަ އަހަރު އެބާވަތުގެ މައްސަލަތަކުގައި ދައުވާ ކުރެވިފައި އޮތީ 53 މީހެއްގެ މައްޗަށް ކަމަށް އަހަރީ ރިޕޯޓުގައި ބަޔާންކޮށްފައިވެއެވެ.
އޭގެ އިތުރުން، 2020 ވަނަ އަހަރު އެ ޢަދަދު 164 އަށް އިތުރު ކުރެވިފައިވާކަން ފާހަގަކޮށްފައިވެއެވެ. ތަފާސްހިސާބުތައް ދައްކާގޮތުން، އެވްރެޖްކޮށް މަހަކު 19 މައްސަލަ ކޯޓަށް އެ އަހަރު ހުށަހެޅިފައިވެއެވެ. އެއީ އޭގެކުރީ އަހަރު ކަމަށްވާ 2019 ވަނަ އަހަރާއި އަޅާބަލާއިރު، އެވްރެޖްކޮށް ކޮންމެ މަހަކު ހުށަހެޅުނު މައްސަލަތަކުގެ އަދަދަށްވުރެ 6 މައްސަލަ އިތުރުވުމެކެވެ.
ޕީޖީ ޝަމީމު ވިދާޅުވެފައިވާގޮތުގައި، 2019 ވަނަ އަހަރާއި އަޅާ ބަލާއިރު، 2020 ވަނަ އަހަރު ދަޢުވާ ކުރެވުނު މީހުންގެ ޢަދަދު 65 ޕަސެންޓު އިތުރުވުމުގެ މާނައަކީ، ރައްޔިތުންގެ އިތުބާރު މިނިޒާމަށް އިތުރުވުމެވެ. މިފަދަ މައްސަލަތައް ރިޕޯޓު ކުރަން މީހުން ޖެހިލުން ނުވާކަމުގެ ހެއްކެއް ކަމަށެވެ.
އަދި މިފަދަ މައްސަލަތަކުގައި ދައުލަތުން ކޮންމެވެސް ކަމެއް ކުރާނެކަމުގެ ޔަޤީންކަމެއް ރައްޔިތުންނަށް ލިބިގެން ގޮސްފައިވާ ކަމަށެވެ. އަދި ތަޙްޤީޤުތައް ވެސް ރަނގަޅު ކުރެވިފައިވާ ކަމަށާއި ދަޢުވާ ކުރެވޭ ވަރަށް ހެކިވެސް ހޯދެމުންދާކަމަށް ވެސް ޕީޖީ ޝަމީމު ވިދާޅުވިއެވެ.
އެހެންނަމަވެސް، އެ ބާވަތުގެ ގިނަ މައްސަލަތަކެއް އަދިވެސް ކޯޓުގައި ނުނިމި އޮތުމުން، ވަށާޖެހޭ ނިޒާމެއް ޤާއިމުކޮށް، ޖިނާއީ ޢަދުލުގެ ނިޒާމު ފުރިހަމަ ގޮތުގައި ހިންގުމުގައި ގޮންޖެހުންތަކެއް ހުރިކަމަށް ޝަމީމް ވަނީ ވިދާޅުވެފައެވެ.
