މޯލްޑިވްސް ކަރެކްޝަނަލް ސަރވިސް (އެމްސީއެސް) އިން ބައިނަލްއަޤްވާމީ އަންހެނުންގެ ދުވަސް ފާހަގަކުރުމުގެ ގޮތުން ޖިންސީ ފުރައްސާރަކުރުމާއި ގޯނާ ކުރުން ހުއްޓުވުމުގެ ޤާނޫނަށް ހޭލުންތެރިކުރުމުގެ ސެޝަންތަކެއް ފަށައިފިއެވެ.
މާފުށީ ޖަލުގައި ބޭއްވި ރަސްމިއްޔާތުގައި ޖިންސީ ފުރައްސާރަކުރުމާއި ގޯނާ ކުރުން ހުއްޓުވުމުގެ ޤާނޫނަށް ޚާއްސަ ޕޯސްޓަރާއެކު މި ސެޝަންތައް އިފްތިތާޙްކޮށްދެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުއެވެ.
މި ސެޝަންތަކުގެ މަޤްޞަދަކީ މި ޤާނޫނުގެ ދަށުން މަތިކުރާ މަސްޢޫލިޔަތްތަކަށް އޮފިސަރުންނާއި މުވައްޒަފުން ހޭލުންތެރިކުރުމެވެ. މި ސެޝަންތަކުގައި ޖިންސީ ފުރައްސާރަކުރުމާއި ގޯނާ ކުރުން ހުއްޓުވުމުގެ ޤާނޫނުގައި ބަޔާންކޮށްފައިވާ ޖިންސީ ފުރައްސާރައިގެ ޢަމަލުތަކަކީ ކޮބައިކަމާއި މިފަދަ މައްސަލަތައް ކޮމިޓީއަށް ހުށަހެޅޭނެ ގޮތްތަކާއި މައްސަލަތައް ކޮމިޓީން ބަލޭނެ ގޮތްތަކާއި މިފަދަ ޢަމަލުތައް ކުރާ ފަރާތްތަކާމެދު ޤާނޫނީ ގޮތުން އެޅޭނެ ފިޔަވަޅުތައް އޮފިސަރުންނާއި މުވައްޒަފުންނަށް ކިޔާދެވޭނެކަމަށް ކަރެކްޝަނުން ބުނެއެވެ.
ޖިންސީ ފުރައްސާރަ ކުރުމާއި ގޯނާ ކުރުމުގެ ޢަމަލުތަކަކީ ކަރެކްޝަނުން ޒީރޯ ޓޮލަރެންސް ދީގެން ބަލާނެ މައްސަލަތަކެއް ކަމުގައި ޖިންސީ ފުރައްސާރަކުރުމާއި ގޯނާ ކުރުން ހުއްޓުވުމާއި ބެހޭ ކޮމިޓީން ވަނީ ބަޔާންކޮށްފައެވެ.
