މޯލްޑިވްސް ހައިޑްރޯގްރަފިކް ސަރވިސް ޑިފެންސް މިނިސްޓްރީގެ ދަށުން ހިންގުމަށް މަޖިލީހުން ފާސްކޮށްފި

ރާއްޖޭގެ ކަނޑުގެ އަޑީގެ ސަރަހައްދު ދެނެގަތުމަށް ކުރާ މަސައްކަތް މޯލްޑިވްސް ޑިފެންސް ފޯސް، އެމްއެންޑީއެފްގެ ބެލުމުގެ ދަށުން ކުރިއަށް ގެންދިޔުމަށް ރައްޔިތުންގެ މަޖިލީހުން ފާސްކޮށްފިއެވެ. ހައިޑްރޯގްރަފީގެ މަސައްކަތް ޑިފެންސް ދަށުގައި ބޭއްވުމަށް ފާސްކުރީ 52 މެމްބަރުންގެ ވޯޓުންނެވެ.

"މޯލްޑިވްސް ހައިޑްރޯގްރަފިކް ސަރވިސް" ގެ ނަމުގައި އިދާރާއެއް ރައީސުލްޖުމްހޫރިއްޔާ އުފެއްދެވީ ޖެނުއަރީ މަހުގެ 19 ވަނަ ދުވަހުއެވެ. މިއީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން އުފެއްދެވި އިދާރާއެކެވެ.

މޯލްޑިވްސް ހައިޑްރޯގްރަފިކް ސަރވިސްގެ މަސައްކަތް ޑިފެންސް މިނިސްޓްރީގެ ދަށުން ބެލެހެއްޓުމުގެ މައްސަލަ ދިރާސާކޮށްފައިވަނީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީންނެވެ.

ރައީސް ނަޝީދު ވިދާޅުވީ ރާއްޖޭގެ ކަނޑުތަކުގެ ޗާޓެއް ހެދިފައިވަނީ 1846 ގައިކަމަށެވެ. އެއަށްފަހު މިއަދާއި ހަމައަށް ބޭނުން ކުރަމުންދަނީ އެޗާޓްކަމަށް ނަޝީދު ވިދާޅުވިއެވެ. އޭގެ ފަހުން ބޭނުންކުރަމުންދަނީ ސެޓެލައިޓުން އިމޭޖު ބޭނުންކޮށްގެން ހަދާފައިވާ ޗާޓެއްކަމަށް ރައީސް ނަޝީދު ވިދާޅުވިއެވެ. ނަމަވެސް މިހާރުގެ ޓެކްނޮލޮޖީއާއި ގުދުރަތީ ގޮތުން އަންނަމުންދާ ބަދަލުތަކާއިއެކު، ކަނޑުގެ ސަރަހައްދުގެ މައުލޫމާތު ފުރިހަމަކުރުމަކީ މިއަދު ރާއްޖެއަށް ކޮންމެހެން ބޭނުންވެފައިވާ ކަމެއްކަމުގައި ނަޝީދު ވިދާޅުވިއެވެ.