ފެބްރުއަރީ މަހު 181 ވަރި، 253 ކައިވެނި

ފެބްރުއަރީ މަހު ފެމިލީ ކޯޓުން 181 ވަރިއާއި، 253 ކައިވެނި ކޮށްދީފިއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ވަނީ ފެބްރުއަރީ މަހު ފެމިލީ ކޯޓުން ކޮށްފައިވާ މަސައްކަތްތަކުގެ ތަފާސްހިސާބު ހިއްސާ ކޮށްފައެވެ.

Advertisement

ފެބްރުއަރީ މަހު 253 ކައިވެނިކޮށް 181 ވަރި ކޮށްދީފައިވާއިރު، ވަރިއާއި ގުޅޭ ޖުމުލަ 229 މައްސަލައެއް ނިންމާފައިވެސް ވެއެވެ. އޭގެ ތެރޭގައި ވަރިވުމަށް އެދި ހުށައަޅާފައިވާ މައްސަލަތަކާއި، ވަރި ކުރުމަށް ހުށައަޅާފައިވާ މައްސަލަތަކުގެ އިތުރުން، ވަރި ސާބިތު ކުރުމާގުޅޭ މައްސަލަތަކާއި، ވަރިއާއި މެދު ޝައްކު ކުރެވިގެން ހުށައަޅާފައިވާ މައްސަލަތަކެއްވެސް ހިމެނެއެވެ.

މި އަހަރުގެ ހުރިހާ ދުވަހެއްގައިވެސް ކައިވެނިކޮށްދޭން ފެމިލީ ކޯޓުން ނިންމާފައިވާއިރު, ކޯޓުން ބުނެފައިވަނީ، ކޯޓާއި ކޯޓުން ބޭރުގައިވެސް މިއަހަރުގެ ކޮންމެ ދުވަހަކުވެސް ކައިވެނިކޮށްދޭނެ ކަމަށެވެ.

ކޯޓުގައި ކައިވެނިކޮށްދޭނީ ހެނދުނު 9:00އިން ފެށިގެން މެންދުރު 11:30އަށެވެ. އަދި މެންދުރު 1:00އިން 2:00އަށެވެ. ކޯޓުން ބޭރުގައި ކައިވެނި ކުރާނަމަ ހަވީރު 4:00އިން ފެށިގެން ރޭގަނޑު 9:30އާ ހަމައަށް ކައިވެނިކޮށްދޭނެ ކަމަށް ފެމިލީ ކޯޓުން ބުނެއެވެ. ކޯޓުން ބުނެފައިވަނީ، ރަމަޟާން މަހު ކައިވެނިކޮށް ދޭނެ ގަޑިތައް ފަހުން އިއުލާން ކުރާނެ ކަމަށެވެ.

މީގެކުރިން ބައެއް ބަންދު ދުވަސްތަކުގައި ކައިވެނި ކޮށެއް ނުދެއެވެ. އަދި އަހަރުގެ ބައެއް ރީތި ތާރީޚުތަކުގައި ވެސް ކައިވެނިކޮށެއް ނުދެއެވެ. އަހަރުގެ ހުރިހާ ދުވަހެއްގައި ވެސް ކައިވެނިކޮށްދޭ ގޮތަށް ހަމަޖެއްސީ މި އަހަރުން ފެށިގެންނެވެ.

އޭގެ އިތުރުން، ފެބްރުއަރީ މަހު ކުޑަކުދިންނާ ގުޅުންހުރި 7 މައްސަލައެއްވެސް ފެމިލީ ކޯޓުން ނިންމާފައިވެއެވެ. އޭގެ ތެރޭގައި ހަޟާނާތާއި ގުޅޭ މައްސަލަތަކާއި، ކުޑަކުދިންގެ ޙައްޤުތައް ރައްކާތެރި ކުރުމުގެ އަމުރުތަކާއި ގުޅޭ މައްސަލަތައްވެސް ހިމެނެއެވެ.

ފެމިލީ ކޯޓުން ފެބްރުއަރީ މަހު ވަނީ ޚަރަދުތަކާއި ގުޅޭ 12 މައްސަލައެއްވެސް ނިންމާފައެވެ. އޭގެ ތެރޭގައި ދަރިންނަށް ޚަރަދު ދިނުމާއި ގުޅޭ މައްސަލަތަކާއި އަނބިމީހާއަށް ޚަރަދު ކުރުމާގުޅޭ މައްސަލަތަކެއްވެސް ހިމެނެއެވެ.

ހަމައެއާއެކު، އާއިލީ އެހެނިހެން މައްސަލަތަކުގެ ގޮތުގައިވެސް 45 މައްސަލައެއް މި މުއްދަތުގެ ތެރޭގައި ފެމިލީ ކޯޓުން ވަނީ ނިންމާފައެވެ. އޭގެ ތެރޭގައި ވަލީ ހޯދުމާއި ގުޅޭ މައްސަލަތަކާއި، މަރު ސާބިތު ކުރުމާ ގުޅޭ މައްސަލަތަކާއި، ޙުކުމް ތަންފީޒު ކުރުމާގުޅޭ މައްސަލަތައްވެސް ހިމެނެއެވެ.