ފަތުރުވެރިން ރާއްޖެއިން ފުރުމުގެ ކުރިން ޕީސީއާރް ޓެސްޓް ހަދަން ނުޖެހޭ ގޮތަށް އުސޫލަށް ބަދަލު ގެނެސްފި
4 މާރިޗު 2022 | ހުކުރު 17:35ރާއްޖެ އަންނަ މީހުންގެ ތެރެއިން ކޮވިޑް ވެކްސިން ފުރިހަމަކޮށް 14 ދުވަސްވެފައިވާ ނަމަ، ވެސް ޕީސީއާރު ޓެސްޓް ހަދާކަށް ނުޖެހޭނެ
ޕީސީއާރް ޓެސްޓް ކުރާ ޓީމެއްގެ މެމްބަރުން
ރާއްޖޭގެ ގެސްޓްހައުސްތަކަށް އަންނަ ފަތުރުވެރިން ރާއްޖެއިން ފުރުމުގެ ކުރިން ޕީސީއާރް ޓެސްޓް ހަދަން ނުޖެހޭ ގޮތަށް އުސޫލަށް ބަދަލު ގެނެސްފިއެވެ.
ޑިރެކްޓަރ ޖެނެރަލް މައިމޫނާ އަބޫބަކުރު ސޮއިކުރައްވައި ނެރުއްވި އިއުލާނުގައި ބުނީ ހޮނިހިރު ދުވަހުން ފެށިގެން ރާއްޖެ އަންނަ މީހުންގެ ތެރެއިން ކޮވިޑް ވެކްސިން ފުރިހަމަކޮށް 14 ދުވަސްވެފައިވާ ނަމަ، ޕީސީއާރު ޓެސްޓް ހަދަން ނުޖެހޭނެ ކަމަށެވެ. އަދި އެ ލުއި ލިބޭނީ ދުނިޔޭގެ ސިއްހަތު ޖަމިއްޔާގެ އިމަރޖެންސީ ޔޫސް ލިސްޓުގައި ހިމެނޭ ނުވަތަ ރާއްޖޭގެ ފުޑް އެންޑް ޑްރަގް އޮތޯރިޓީން ހުއްދަ ދީފައިވާ ކޮވިޑް ވެކްސިނެއް ޖަހާފައިވާ ނަމަ ކަމަށް ވެސް އިއުލާނުގައިވެއެވެ.
އެޗްޕީއޭ އިން ވަނީ ދާދިފަހުން މާލެއިން އެހެން ރަށްރަށަށް ދަތުރުކުރާއިރު، ކޮވިޑަށް ޓެސްޓްކުރުމަށް ހައްދާ ޕީސީއާރު ޓެސްޓް ހައްދަންޖެހޭގޮތަށް އޮތް ގޮތުން ވެސް އުވާލާފައެވެ.
މާލެއިން ރަށްރަށަށް ދަތުރުކުރާއިރު، ޕީސީއާރު ޓެސްޓް ހެއްދުން މަޖުބޫރުކޮށްފައި އޮތް އޮތުން އުވާލުމުގެ އިތުރުން ކޮވިޑާގުޅިގެން މާލެ ސަރަހައްދުގައި އަޅާފައިވާ އެހެން ދެ ފިޔަވަޅަކަށްވެސް ނިމުމެއް އަންނާނެއެވެ. އެއީ މީހުން އެއްވެ އުޅުމާއި ހަފުލާތަކާއި އިވެންޓްތަކުގައި އެއްފަހަރާ ބައިވެރިވެވޭނެ މީހުންގެ ލިމިޓް އުވާލުމާއި ކުޅިވަރު މުބާރާތްތަކަށް މީހުންނަށް ނުވަދެވޭ ގޮތަށް އޮތް އޮތުން އުވާލުމެވެ.
ރަށްރަށަށް ފުރުމުގެ ކުރިން ކޮވިޑް ޓެސްޓް ހެދުން އެޗްޕީއޭއިން މިހާތަނަށް ލާޒިމު ކޮށްފައި އޮތްނަމަވެސް، މިފަހަކަށް އައިސް ކޮވިޑްގެ އަދަދުތައް ދަށަށްދާން ފެށުމުން މީހުން އެކަމަށް ސަމާލުކަންދޭ މިންވަރު ވަނީ ވަރަށް ބޮޑަށް ކުޑަވެފައެވެ. އަދި އެކަން ކަމާބެހޭ ފަރާތްތަކުން އެހާ ބޮޑަށް ބަލަމުންނެއްވެސް ނުދެއެވެ. އެހެންކަމުން ފާއިތުވި ދުވަސްތަކުގައި ގިނަ ބަޔަކު ވަނީ ޕީސީއާރު ޓެސްޓް ނުހައްދައި ރަށްރަށަށް ދަތުރުކޮށްފައެވެ.
