ޔޫރަޕްގެ ދެކުނު އިރުމައްޗަށް ފަތުރުވެރިކަން ޕްރޮމޯޓްކުރުމަށް ކުރަމުންދާ މަސައްކަތް: މޮއި މަލްދީވީގެ ފުރަތަމަ މެގަޒިން ނެރެފި

ޔޫރަޕްގެ ދެކުނު އިރުމައްޗަށް ރާއްޖޭގެ ފަތުރުވެރިކަން ޕްރޮމޯޓްކުރުމަށް ކުރަމުންދާ މަސައްކަތުގެ ދަށުން "މޮއި މަލްދީވީ"ގެ ފުރަތަމަ މެގަޒިން ނެރެފިއެވެ.

"މޮއި މަލްދީވީ"ގެ މެނޭޖިން ޑިރެކްޓަރު އައިޝަތު ނުޒުހާ ރާއްޖެއެމްވީއަށް ވިދާޅުވީ, ރާއްޖޭގެ ފަތުރުވެރިކަން ޕްރޮމޯޓް ކުރުމަކީ އަމާޒެއް ކަމަށާއި، އެ މަސައްކަތަށް އަބަދުވެސް ޝައުގުވެރިވާ ކަމަށެވެ. ސްލޮވޭނިޔާގައި ދިރިއުޅެމުން ގެންދާއިރު، އެސަހައްދުގެ މީހުންނަށް ރާއްޖެއަކީ ކޮންތަނެއްކަން ވެސް ނޭނގޭކަމަށް ނުޒުހާ ވިދާޅުވިއެވެ. އެހެންކަމުން މަސައްކަތް ކުރަމުންދަނީ މުޅި އެ ސަރަހައްދަށް ރާއްޖެ ޕްރޮމޯޓްކުރުމަށް ކަމަށް އޭނާ ވިދާޅުވިއެވެ.

މޮއި މަލްދީވީގެ ނަމުގައި ޓްރެވަލް އެޖެންސީއެއް ހިންގަމުންދާއިރު، ހޯމަ ދުވަހު ވަނީ ފުރަތަމަ މެގަޒިން ނެރެފައެވެ. މި މެގަޒިން ނެރެދެއްވީ ސްލޮވޭނިޔާގެ ކުރީގެ އެންވަޔަރަމެންޓް މިނިސްޓަރު ޖަނެޒް ޕޮޑޮބްނިކްއެވެ.

މި މެގަޒިންއަށް އިޝާރަތް ކުރައްވައި ނުޒްހާ ވިދާޅުވީ, މި މެގަޒިން އާއްމުކުރީ އެގައުމުގެ ބަހުރުވައިން ކަމަށާއި، ގިނަ ބަޔަކާ ހަމައަށް މެގަޒިން ފޯރާނެކަމަށެވެ. ޑިޖިޓަލް އަދި ޕްރިންޓްކޮށްފައިވާ މެގަޒިން އާއްމުކޮށްފައިވާއިރު، މިހާރު ވެސް ބޮޑު ތަރުހީބެއް ލިބެމުންދާކަމަށް އޭނާ ވިދާޅުވިއެވެ.

ނުޒުހާ ވިދާޅުވީ އާއްމުކުރި ފުރަތަމަ މެގަޒިންގައި ހުންނާނީ ރާއްޖެއާ ބެހޭ ގޮތުން ބޭސިކް މައުލޫމާތު ކަމަށެވެ. އެގޮތުން ރާއްޖެއަށް ދަތުރުކުރެވޭނެ ގޮތާއި، ރާއްޖެއިން ލިބޭ އެކިއެކި ވައްތަރުގެ ފަތުރުވެރިކަމާއި، ބަޖެޓް ޕްލޭން ކުރާނެ ގޮތް މި މެގަޒިނުން ސާފުވާނެ ކަމަށެވެ. އަދި ރާއްޖެއަށް ފަތުރުވެރިކަން ތައާރަފްވެގެން އައިސްފައިވާ ގޮތާއި، މި ދާއިރާގެ އިސްބޭފުޅުންގެ އިންޓަވިއުތައް ހިމަނާފައިވާކަމަށް ނުޒުހާ ވިދާޅުވިއެވެ. އަދި މެގަޒިންއެއްގެ ޒަރިއްޔާއިން މައުލޫމާތު ފޯރުކޮށްދިނުމުން ގިނަ ބައެއްގެ އިތުބާރު ލިބޭނެކަން އޭނާ ފާހަގަކުރެއްވިއެވެ.

އެއީ އިންޓަރނެޓްގެ ޒަރީއާއިން މައުލޫމާތު ހޯދައި، ބައެއް ފަހަރު ނުރަނގަޅު މައުލޫމާތާއެކު ރާއްޖެއަށް ދަތުރުކުރުމަށް ބައެއް ފަތުރުވެރިންނަށް އުދަނގޫތައް ކުރިމަތިވާތީއެވެ.

މީގެ އިތުރުން ނުޒުހާ ވިދާޅުވީ ޔޫރަޕްގެ ދެކުނު އިރުމައްޗަށް ރާއްޖޭގެ ފަތުރުވެރިކަން ޕްރޮމޯޓް ކުރުމަށް ކުރަމުންދާ މަސައްކަތް އިތުރަށްފުޅާ ކުރާނެ ކަމަށެވެ. އެގޮތުން އެކިއެކި ޓްރެވަލް އެޖެންސީތަކާއެކު މާކެޓިންގެ އެކިއެކި ހަރަކާތްތައް ކުރިއަށް ގެންދާނެ ކަމަށާއި، ވެބްނާތައް އާއްމުކުރަމުންދާނެ ކަމަށް ނުޒްހާ ވިދާޅުވިއެވެ.

މޮއި މަލްދީވީގެ ފަރާތުން ރާއްޖޭގެ ފަތުރުވެރިކަން އިޝްތިހާރު ކުރުމުގެ މަސައްކަތްތައް ކުރަމުންދާއިރު، ވެބްސައިޓުންނާއި، ސޯޝަލް މީޑިއާ ފްލެޓްފޯމްތައް މެދުވެރިކޮށް ވެސް ރާއްޖެއާ ގުޅުންހުރި ގިނަ މައުލޫމާތުތައް ދަނީ ފޯރުކޮށްދެމުންނެވެ.

ރާއްޖެ އިޝްތިހާރުކުރުމަށް ކުރަމުންދާ މަސައްކަތުގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)އާއި މޯލްޑިވްސް އިންޓެގްރޭޓަޑް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ގެ ފަރާތުން ވަރަށް ބޮޑު އެއްބާރުލުމެއް ލިބެމުންދާކަން ނުޒުހާ ފާހަގަކޮށްފައިވެއެވެ.