މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)އިން އުފައްދާ މަސްދަޅުގެ އަގު އަންގާރަ ދުވަހުން ފެށިގެން ބޮޑުވާނެކަމަށް ބައެއް ނޫސްތަކުގައި ރިޕޯޓްކުރުމާގުޅިގެން ރާއްޖެއެމްވީއަށް މައުލޫމާތު ދެއްވަމުން އެ ކުންފުނީގެ ސީއީއޯ އިސްމާއީލް ފައުޒީ ވިދާޅުވީ, މަސްދަޅުގެ އަގު ބޮޑުކުރަން އަދި ނިންމާފައިނުވާކަމަށެވެ.
ފައުޒީ ވިދާޅުވީ ރޯދަ މަހަށް މަސްދަޅުގެ އަގު ބޮޑުކުރަން ނިންމާފައިނުވާކަމަށެވެ. އެހެންނަމަވެސް ދުނިޔޭގެ ތެލުގެ ބާޒާރަށް މިހާރު އަންނަމުންދާ ބަދަލުތަކާ ގުޅިގެން ޚަރަދުތައް ބޮޑުވަމުން އަންނަކަމަށެވެ. އެހެންކަމުން މަސްދަޅުގެ އަގު ބޮޑުކުރުމުގެ މަޝްވަރާތައް ކުރިއަށްދާ ކަމަށާއި, އެހެންނަމަވެސް ވަކި ގޮތެއް ނިންމާފައިނުވާ ކަމަށެވެ. ފައުޒީ ވިދާޅުވީ ކުރިއަށް އޮތީ ރޯދަމަސް ކަމަށްވުމުން އެފަދަ ބަދަލެއް ގެންނައިރު ކުންފުނިން ރައްޔިތުންނާމެދު ވިސްނާނެކަމަށެވެ.
ފައުޒީ އިތުރަށް ވިދާޅުވީ, އަންގާރަ ދުވަހުން ފެށިގެން މަސްވެރިންގެ އަތުން މަސް ގަންނަ އަގަށް ބަދަލު އަންނާނެކަމަށެވެ.
މިގޮތަށް އަޑު ފެތުރިފައިވާއިރު, ރޯދަ ޕްރޮމޯޝަން އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަމުން ފައުޒީ ވިދާޅުވީ, ދުނިޔޭގެ މަސްރަހުގައި ތެލުގެ އަގާއި އުފެއްދުމުގެ އަގުތައް ބަދަލުވަމުންދާ ދަނޑިވަޅުގައި މިފްކޯގެ އުފެއްދުންތަކުގެ އަގުތަކަށް ބަދަލު އައުމަކީ އެކަށީގެންވާކަމެއްކަމަށެވެ. ނަމަވެސް މިފްކޯއިން އަބަދުވެސް މަސައްކަތް ކުރަމުން ދަނީ ކަސްޓަމަރުންނަށް ލުއިފަސޭހަކޮށްދިނުމުގެ ގޮތުން އަގުތައް އެއް މިންގަޑެއްގައި ހިފެހެއްޓުމަށްކަމަށްވެސް ފައުޒީ ވިދާޅުވިއެވެ.
