ނުކުޅެދުންތެރިކަން ހުންނަ މީހުންގެ ޙައްޤުތައް ހިމާޔަތްކުރާ ކައުންސިލަށް މަދަނީ ޖަމްޢިއްޔާތަކުން ޢައްޔަންކުރާ މެންބަރު އިންތިޚާބުކޮށްފި
25 ފެބުރުއަރީ 2022 | ހުކުރު 17:58މި މަޤާމަށް އިންތިޙާބުވީ ޑރ. އިސްމާޢީލް ޝަފީއު
ނުކުޅެދުންތެރިކަން ހުންނަ މީހުންގެ ޙައްޤުތައް ޙިމާޔަތްކުރާ ކައުންސިލްގެ އިންތިޚާބު
ނުކުޅެދުންތެރިކަން ހުންނަ މީހުންގެ ޙައްޤުތައް ޙިމާޔަތްކުރާ ކައުންސިލްގެ، ނުކުޅެދުންތެރިކަން ހުންނަ މީހުންގެ ޙައްޤުތައް ކުރިއެރުވުމަށް މަސައްކަތް ކުރާ މަދަނީ ޖަމްޢިއްޔާތަކުން ޢައްޔަންކުރާ މެންބަރު އިންތިޚާބު ކޮށްފިއެވެ.
މި މަޤާމަށް އިންތިޙާބުވެފައިވަނީ މޯލްޑިވްސް އޯޓިޒަމް އެސޯސިއޭޝަންގެ ޗީފް އެގްޒިކިއުޓިވް އޮފިސަރ ޑރ. އިސްމާޢީލް ޝަފީއުއެވެ. މި މަޤާމަށް ޑރ.އިސްމާޢީލް ޝަފީޢު އިންތިޚުބުވެފައިވަނީ 4 ވޯޓު ލިބިގެންނެވެ. މި މަޤާމަށް ދެން ކުރިމަތިލާފައިވާ މަރްޔަމް ސަހުދާއަށް 3 ވޯޓް ލިބިފައިވާއިރު އާމިނަތު ހައިފާ ނައީމަށް ލިބިފައިވަނީ 2 ވޯޓެވެ.
ނުކުޅެދުންތެރިކަން ހުންނަ މީހުންގެ ޙައްޤުތައް ކުރިއެރުވުމަށް މަސައްކަތް ކުރާ މަދަނީ ޖަމްޢިއްޔާތަކުން ޢައްޔަންކުރާ މެންބަރަކު އިންތިޚާބު ކޮށްފައިވާއިރު ނުކުޅެދުންތެރިކަން ހުންނަ މީހުންގެ ޙައްޤުތައް ޙިމާޔަތްކުރާ ކައުންސިލްގެ އިތުރު ދެ ދާއިރާއެއްގެ އިންތިޚާބު ވަނީ ފަސްކޮށްފައެވެ. އެއީ ނުކުޅެދުންތެރިކަން ހުންނަ މީހުންގެ ތެރެއިން އެމީހުން އިންތިޚާބު ކުރާ މެންބަރަކު ހޮވުމަށް ބާއްވާ އިންތިޚާބާއި، ނުކުޅެދުންތެރިކަން ހުންނަ މީހުންގެ ބެލެނިވެރިން ނުވަތަ ބަލަދުވެރިންގެ ތެރެއިން އެމީހުން އިންތިޚާބުކުރާ މެންބަރަކު ހޮވުމަށް ބާއްވާ އިންތިޚާބެވެ.
ނުކުޅެދުންތެރިކަން ހުންނަ މީހުންގެ ޙައްޤުތައް ޙިމާޔަތްކުރާ ކައުންސިލަށް މެމްބަރުން އައްޔަން ކުރުމުގެ މަސައްކަތް ކުރަމުންދާއިރު ނުކުޅެދުންތެރިކަން ހުންނަ މީހުން ބާރުވެރިކުރެވޭނެ ފަދަ ގޮތަކަށް ޕްރޮގްރާމްތައް ހިންގަންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ ދާދި ފަހުން ވިދާޅުވެފައެވެ.
ރައީސް މިހެން ވިދާޅުވީ، ރިވެލި އެވޯޑް ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސް ވިދާޅުވީ، ނުކުޅެދުންތެރިކަން ހުންނަ މީހުންނަށް ޚާއްސަ ކޮށްގެން ހިންގާ ޕްރޮގްރާމްތައް މިހާރު ހިންގާ ގޮތް ބަދަލުކުރަން ޖެހޭ ކަމަށާއި، އޭގެ ފުރިހަމަ ނަތީޖާ ލިބޭނީ އޭރުން ކަމަށެވެ. އެފަދަ ކުދިން ބާރުވެރި ކުރުވޭނެ ގޮތަށް ޕްރޮގްރާމްތައް ބައްޓަން ކުރަން ޖެހޭނެ ކަމަށެވެ.
ނުކުޅެދުންތެރިކަން ހުންނަ މީހުންގެ ހައްގުތައް ހިމާޔަތް ކުރުމަށް ސަރުކާރުން އިސްކަމެއްދޭ ކަމަށާއި، އެގޮތުން ކޮވިޑް-19 ޕެންޑެމިކްގެ ތެރޭގައި ވެސް ނުކުޅެދުންތެރިކަން ހުންނަ 25 މީހަކަށް ސަރުކާރުން ވަޒީފާގެ ފުރުސަތު ހޯދައިދީފައިވާ ކަމަށް ރައީސް ވިދާޅުވިއެވެ. ކޮވިޑްގެ ތެރޭގައި ޚަރަދު ކުޑަ ކުރުމުގެ ގޮތުން އެޅި ފިޔަވަޅުތަކުގެ ތެރޭގައި ވެސް އެފަދަ މީހުންނަށް ކުރަމުންދިޔަ ޚަރަދުތައް އުނި ކުރެވިފައި ނުވާކަމަށް ވިދާޅުވިއެވެ.
