މާލެ ސިޓީ މަގުމަތި ރީތިކަން ދެމެހެއްޓުމަށް ކުރިއަށް ގެންދެވޭ މަޝްރޫއުގެ މަސައްކަތްތައް ފުޅާކޮށްފި
އެކި ސަރަހައްދުތަކުގައި ލެޑް ބޯޑާއި، ސައިން ބޯޑު ބަހައްޓަން ނިންމާނަން
މާލެ ސިޓީ މަގުމަތި ރީތިކަން ދެމެހެއްޓުމަށް ކުރިއަށް ގެންދެވޭ މަޝްރޫއުގެ މަސައްކަތްތައް ފުޅާކޮށްފި
މާލެ ސިޓީ މަގުމަތި ރީތިކަން ދެމެހެއްޓުމަށް ކުރިއަށް ގެންދެވޭ މަޝްރޫއުގެ މަސައްކަތްތައް ފުޅާކޮށް، އެކި ސަރަހައްދުތަކުގައި ލެޑް ބޯޑާއި، ސައިން ބޯޑު ބަހައްޓަން ނިންމައި މަގުތަކުގެ ނަން ސާފުކޮށް އެނގޭނެ ގޮތް ހެދުމަށް ނިންމައިފިއެވެ.
މިއީ މާލެ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭނުގެ 3.8 ގައި ހިމެނިފައިވާ ''މާލޭގެ އެކި ސަރަޙައްދުތަކުގައި ލެޑް ބިލްބޯޑް/ސައިން ބޯޑު ބެހެއްޓޭނެ ތަންތަން ކަނޑައަޅައި، ބަހައްޓައި ހިންގުމުގެ'' ދަށުން ކުރިއަށް ގެންދިއުމަށް ނިންމާފައިވާ ކަމެކެވެ. އަދި މަގުތަކަށް ކިޔާނަން ސާފުކޮށް އެނގޭނެހެން މަގުތަކުގައި ނަން ޖެހުމަށް ނިންމާފައިވަނީ ސްޓްރެޓެޖިކް އެކްޝަން ޕްލޭނުގެ 3.14 ގައިވާ ''މާލޭގެ މަގުތަކަށް ކިޔާނަން ސާފުކޮށް އެނގޭނެހެން މަގުތަކުގައި ނަން ޖެހުން'' މި ޕްލޭންއަށް އަމަލީ ސިފަ ގެނައުމުގެ ގޮތުންނެވެ. މި ނިންމުންތައް ނިންމާފައިވަނީ ކައުންސިލުގެ 4 ވަނަ ދައުރުގެ 41 ވަނަ ޖަލްސާގައެވެ.
މި މަސައްކަތް ކުރިއަށް ގެންދިއުމަށް ރާވާފައިވަނީ ކައުންސިލަށް ވީހާވެސް ޚަރަދު ކުޑަވާނެ ނިޒާމެއްގެ ތެރެއިންކަން ފާހަގަކޮށް ކައުންސިލުން ބުނީ މި މަސައްކަތް ކުރިއަށް ގެންދިއުމަށް ފާސްކޮށްފައިވަނީ ސައިން ބޯޑް އަދި ލެޑް ބޯޑް ބަހައްޓާއިރު މީހުންނަށް އުނދަގޫ ނުވާ ގޮތަށް ބަހައްޓައި، ބޯޑުތަކުގެ ލައިޓާއި ސައުންޑް ބެލުމާއި، ވިޔަފާރި އުސޫލުން އަމިއްލައަށް ބޭނުންކުރާ ލެޑް ބޯޑުތައް އުސލެއްގެ ތެރެއިން ތަރުތީބުވެގެންދާ ގޮތަށް ކުރިއަށް ގެންދިއުމަށް ކަމަށެވެ. އަދި މިކަމަށް އެކަށީގެންވާ ސަރަހައްދުތައް ކަނޑައެޅުމަށް ހަމަޖެހިފައިވަނީ ފަންނީ މީހުންގެ އިރުޝާދާއި ލަފާގެ މަތިން ކަމަށް ކައުންސިލުން ބުނެއެވެ.
މާލެ ސިޓީ ކައުންސިލްގެ އަމާޒަކީ ދުނިޔޭގެ ތަހުޒީބު ގައުމުތަކެކޭ އެއްފަދައިން ކުރިއަށް އޮތް ތަނުގައި މި ސައިން ބޯޑުތައް މެދުވެރިކޮށް ޓްރެފިކް ލައިވް އަޕްޑޭޓް ދެނެގަތުމާއި މަގުބަންދާ ބެހޭ ލައިވް އަޕްޑޭޓް ފަދަ ޚާއްސަ މެސެޖުތައް ދެވޭނެ ނިޒާމް ޓްރެފިކް ޕޮލިހާއި ކަމާ ގުޅޭ އެހެން ފަރާތްތަކާއި ގުޅިގެން ގާއިމްކުރުމެވެ. މާލެ ސިޓީގެ މަގުތަކުގައި ހިނގާ ބިނގާވެ އުޅޭ އެކި އުމުރުފުރާގެ މީހުންނާ ގުޅުން ހުރި އިރުޝާދުތައް ހިމެނޭ ގޮތަށް ބޯޑުތަކެއް ބެހެއްޓުމަށް ވެސް ސިޓީ ކައުންސިލުގެ މި ޖަލްސާގައި ވަނީ ނިންމާފައެވެ. މިއީ މާލެ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގެ 2.7 ގައިވާ ކަމެކެވެ.
ކައުންސިލުން ބުނީ މި މަސައްކަތް ކުރާއިރު ރަގަޅު ސަރވޭއެއް ކުރުމަށް ވަނީ ހަމަޖެހިފައިވާ ކަމަށެވެ. އެހެންކަމުން ރިވެތި އިރުޝާދު ދޭ ބޯޑު ހަރުކުރުމަށް ލިސްޓް ތައްޔާރު ކުރާއިރު އަންހެނުންނާއި ފިރިހެނުންނާއި އަދި އިސްރަށްވެހިންނާއި ކުޑަކުދިން ހިމެނޭނެހެން އެކި އުމުރު ފުރާތަކަށް ޚާއްސަ މެސެޖުތައް ހިމެނުމަށް ހަމަޖެހިފައިވާ ކަމަށެވެ. މީގެ އިތުރުން މާލެ ސިޓީގެ މަގުމަތީގެ ރީތިކަން ދެމެހެއްޓުމަށް ކުރިއަށް ގެންދެވޭ މަޝްރޫއުގެ ދަށުން މަގުތަކަށް ކިޔާ ނަންތައް ޖަހާނެ ގޮތް ފަރުމާކުރުމަށް ރާވާފައިވަނީ މިކަމާއި ގުޅޭ ފަންނީ މީހުން މެދުވެރިކޮށް އެމީހުންގެ ޚިޔާލާއި މަޝްވަރާގެ މަތިން ކަމަށް ކައުންސިލުން ބުނެއެވެ.
ރިވެތި އިރުޝާދު ދޭ ބޯޑުތައް މާލެ ސިޓީގެ މަގުތަކުގައި ހަރުކުރުމަށް ކައުންސިލުން ނިންމާފައިވަނީ މުޖްތަމައުގައި ނެތެމުންދާ ރިވެތި އާދަތައް ހަރުދަނާ ގޮތެއްގައި ދެމެހެއްޓުމުގެ ގޮތުންނާއި، މާލެ ސިޓީގެ މަގުމަތީގެ ރީތިކަމަށް ސަމާލުކަންދީ ތަރުތީބު ކުރުމުގެ ގޮތުންނެވެ.
