ޔާމީންގެ މައްސަލައިގައި ހައްޔަރު ކުރި މީހުންނަށް އަނިޔާކުރާކަމަށް ކުރި ތުޙުމަތު ފުލުހުން ދޮގުކޮށްފި
4 ޖޫން 2017 | އާދީއްތަ 17:46ޤައިދީން ބައިތިއްބާފައި ތިބީ ޤަވާއިދާ ޚިލާފު ތަނެއްގައި ކަމަށް ވަނީ ތުޙުމަތު ކޮށްފަ
ޔާމިންއަށް ހަމަލާ ދިންކަމަށް ޤަބޫލުކުރެވޭ ދެމީހުން. މި ދެމީހުން ހައްޔަރުކުރެވިފައިވާ ކަމަށް ޤަބޫލުކުރެވޭ ކަމަށް ފުލުހުން ބުނޭ
ނިމިގެންދިޔަ އޭޕްރީލް މަހު އަނިޔާވެރި ގޮތަކަށް ސޯޝަލް މީޑިއާ އެކްޓިވިސްޓް އަދި ބްލޮގަރ، ޔާމީން ރަޝީދު މަރާލި މައްސަލައިގައި ހައްޔަރުކޮށްފައިވާ މީހުން، ޤަވާއިދާއި ޚިލާފަށް ސިއްރު ތަނެއްގައި ބައިތިއްބައި، އެކި ޙައްޤުތަކުން މަހުރޫމް ކޮށްފައިވާކަމަށް މޯލްޑިވިއަން ޑިމޮކްރަސީ ނެޓްވަރކް (އެމްޑީއެން) އިން ކުރި ތުޙުމަތު ފުލުހުން ދޮގުކޮށްފިއެވެ.
އެމްޑީއެންއިން އާދީއްތަ ދުވަހު ކުރި ޓްވީޓްތަކެއްގައި ބުނެފައިވަނީ، ޔާމީންގެ މައްސަލައިގައި ހައްޔަރުކޮށްފައިވާ މީހުން ބައިތިއްބާފައި ތިބީ ޤަވާއިދާއި ޚިލާފު ތަނެއްގައި ކަމާއި، އެމީހުންނަށް ވަކީލެއްގެ އެހީ ހޯދުމުގެ ފުރުޞަތު ދީފައި ނުވާކަމުގެ މައުލޫމާތު ލިބިފައިވާ ކަމަށެވެ. އަދި ހަމައެއާއިއެކު، އެމީހުންނަށް އަނިޔާކޮށް، އެމީހުންނާއި މެދު ލާއިންސާނީ އަމަލު ހިންގަމުންދާ ކަމުގެ މައުލޫމާތު ލިބިފައިވާ ކަމަށްވެސް އެމްޑީއެންއިން ވަނީ ބުނެފައެވެ.
އެ ޖަމިއްޔާއިން ބުނީ، މިފަދައިން ކަން ހިނގުމަކީ، އިންސާފު ލިބުމާއި، އިތުބާރު ހުރި ހެކި ހުށަހެޅުމަށް ހުރަސް އެޅޭނެ ކަމެއް ކަމަށެވެ.
އެމްޑީއެންގެ ވާހަކަތަކަށް ރައްދުދެއްވާ ރާއްޖެއެމްވީ އާއި ވާހަކަ ދައްކަވަމުން، ފުލުހުންގެ ތަރުޖަމާނު އަޙުމަދު ޝިފާން ވަނީ އެމްޑީއެންއިން ކޮށްފައިވާ ތުޙުމަތުތައް ދޮގު ކުރައްވާފައެވެ.
ޝިފާން ވިދާޅުވީ، ޤަވާއިދާއި ޚިލާފަށް އެއްވެސް ޤައިދީއަކު ހައްޔަރުކޮށްފައި ނުވާނެ ކަމަށާ، ޔާމީންގެ މައްސަލައިގައިވެސް ކަން އޮތީ އެހެން ކަމަށެވެ. ޝިފާން އިތުރަށް ވިދާޅުވީ، ވަކި މައްސަލައެއް ތަފާތު ކުރުމެއް ނެތި، ހުރިހާ މައްސަލައެއްގައި ބަންދުކުރެވިފައިވާ މީހުންނާއި މެދުވެސް އަމަލުކުރެވެމުންދަނީ، ޤައިދީންނަށް ލިބިދޭންޖެހޭ ޙައްޤުތަކުގެ މިންގަނޑުގެ ތެރެއިން ކަމަށެވެ. އަދި އެއްވެސް ޤައިދީއަށް އަނިޔާ ނުކުރާ ކަމަށްވެސް ޝިފާން ވިދާޅުވިއެވެ.
ޔާމީންގެ މައްސަލައިގައި މިހާތަނަށް 7 މީހަކު ހައްޔަރުކޮށްފައިވާކަން ފުލުހުން ހާމަކޮށްފައިވާއިރު، ފުލުހުންގެ ހާމަކޮށްފައިވާ މަޢުލޫމާތުތަކަށް ބަލާއިރު މި މައްސަލައިގައި ހައްޔަރުކުރި މީހުންގެ ތެރެއިން މިވަގުތު ފުލުހުންގެ ބެލުމުގެ ދަށުގައި ތިބީ 6 މީހުންނެވެ. މި މައްސަލައިގައި ހައްޔަރު ކުރި ބައެއް މީހުންނަށް ޤާނޫނީ ލަފާދެނިކޮށް، ތަހުގީގަށް ހުރަސްއަޅާކަމަށް ތުހުމަތުކޮށް ހައްޔަރުކުރި ޤާނޫނީ ވަކީލު މިހާރު ވަނީ ގޭބަންދަށް ބަދަލުކޮށްފައެވެ.
