ރެގިއުލަރައިޒޭޝަން ޕްރޮގްރާމްގެ ދަށުން ޤަވާއިދަށް ފައްތާ ބިދޭސީންވެސް ފިލާތީ ވިޔަފާރިވެރިންގެ ކަންބޮޑުވުން
ރެގިއުލަރައިޒޭޝަން ޕްރޮގްރާމްގައި 42،000 ބިދޭސީން ރަޖިސްޓަރ ވެފައިވޭ
ރަސްމީ ލިޔެކިޔުން ނެތް ބިދޭސީ މަސައްކަތްތެރިންގެ މައްސަލަ އާއި ގުޅޭގޮތުން، ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ކަމާއި ގުޅުންހުރި އިދާރާތަކާއި ބައްދަލުކުރެއްވުން
ރެގިއުލަރައިޒޭޝަން ޕްރޮގްރާމްގެ ދަށުން ޤަވާއިދަށް ފައްތާ ބިދޭސީންވެސް ބައެއް ފަހަރު ފިލާތީ އެމީހުން ގެންނަ ފަރާތްތަކުގެ ބޮޑު ކަންބޮޑުވުމެއް އޮންނަކަމަށް އިކޮނޮމިކް މިނިސްޓްރީން ބުނެފިއެވެ.
ރަސްމީ ލިޔެކިޔުން ނެތް ބިދޭސީ މަސައްކަތްތެރިންގެ މައްސަލަ އާއި ގުޅޭގޮތުން، ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ބުދަ ދުވަހު ވަނީ މިނިސްޓްރީ އޮފް ފޮރިން އެފެއާޒް، މޯލްޑިވްސް އިމިގްރޭޝަން އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ބޭފުޅުންނާ ބައްދަލު ކުރައްވާފައެވެ.
އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު މަރިޔަމް ނާޒިމާ ވިދާޅުވީ، ޚާއްސަ ހުއްދައެއް ނެތި އުޅޭ ބިދޭސީންނަށް އަމާޒުކޮށް ހިންގި ރެގިއުލަރައިޒޭޝަން ޕްރޮގްރާމްގައި 42،000 ބިދޭސީން ރަޖިސްޓަރު ވެފައިވާ ކަމަށެވެ. އެމީހުން ޤަވާއިދަށް ފެއްތުމުގެ މަސައްކަތް މިނިސްޓްރީން ކުރަމުން ދަނިކޮށް، ކޮވިޑުގެ ޙާލަތާއި ގުޅިގެން އެކަމަށް މަޑުޖެހުމެއް އައިކަން އޭނާ ފާހަގަކުރެއްވިއެވެ. ސަބަބަކީ އެމީހުންގެ ފިންގަރ ޕްރިންޓް ވެރިފިކޭޝަނަށް އެމީހުން ހާޒިރުކޮށްގެން މަސައްކަތް ކުރިއަށް ގެންދަން ޖެހުމެވެ.
ނާޒިމާ ވިދާޅުވީ، މި އަހަރު އަނެއްކާވެސް ރެގިއުލަރައިޒޭޝަން ޕްރޮގްރާމް ކުރިއަށްދާ ކަމަށެވެ. އެގޮތުން 42،000 މީހުންގެ ތެރެއިން 10،000 މީހުން ޤަވާއިދުގެ ތެރެއަށް ގެނެވިފައިވާކަމަށް އޭނާ ވިދާޅުވިއެވެ. އަދި 9000 މީހުން އަނބުރާ ފޮނުވާލެވިފައިވާއިރު، މިހާރުވެސް ޕްރޮގްރާމްގައި ބައިވެރިވުމަށް އެދި 6000 ހުށައެޅުން ލިބިފައިވާކަމަށް ވިދާޅުވިއެވެ.
މީގެއިތުރުން، އަތޮޅު ތެރޭގައިވެސް ގޮންޖެހުންތަކާއެކު މި މަސައްކަތް ކުރިއަށްދާކަމަށް އޭނާ ވިދާޅުވިއެވެ. އެގޮތުން ޤަވާއިދަށް ފައްތާ ފަހުންވެސް މީހުން ފިލައިގެން ދިއުމުގެ މައްސަލަތައް ފެންމަތިވާތީ، ބިދޭސީން ގެންނަ މީހުންގެވެސް ކަންބޮޑުވުންތައް ފާހަގަވެފައިވާކަމަށް ވިދާޅުވިއެވެ.
ޤަވައިދާ ހިލާފަށް އުޅޭ ބިދޭސީން ގެންގުޅޭ ކުންފުންޏެއް ނަމަ، އަލުން ރަޖިސްޓްރީކުރަން އެކުންފުނި ނުވަތަ ބިދޭސީ މީހާ ރާއްޖެ އެތެރެކުރި ފަރާތް މެދުވެރިކޮށް އޮންލައިންކޮށް ވެސް ހުށަހެޅެއެވެ. މިހާރުވެސް ރާއްޖޭގައި ވާރކް ޕާމިޓްގައި އުޅޭ ބަންގްލަދޭޝްގެ އެއްލައްކަ ތިރީސް ހާހެއްހާ މީހުން އުޅެމުންދާކަމަށް ކަމާބެހޭ ފަރާތްތަކުން ބުނެއެވެ. އަދި މީގެތެރެއިން ފަސްދޮޅަސް ތިންހާސް މީހުންނަކީ ޤަވާޢިދުތަކަށް ނުފެތޭ މީހުންކަމަށް ވެސް ސަރުކާރުން ވަނީ ހާމަކޮށްފައެވެ.
މި ބައްދަލުކުރެއްވުމުގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން އިކޮނޮމިކް މިނިސްޓްރީން ބުނީ، މިނިސްޓްރީގެ ޓީމުތައް އަތޮޅު ތެރޭގައި ޙަރަކާތްތެރިވާއިރު، މިމަސައްކަތް ނިޒާމެއްގެ ތެރެއިން ކުރެވޭނެ ގޮތް ހެދުމަށް ކައުންސިލުތަކާއި ލޯކަލް ގަވަރމަންޓް އޮތޯރިޓީއާވެސް މަޝްވަރާ ކުރެވިފައިވާ ކަމަށެވެ. މިނިސްޓްރީގެ ވިސްނުމަކީވެސް ވީހާވެސް ކައުންސިލުތަކުގެ ބައިވެރިވުން އިތުރުކޮށްގެން މި ޕޮރޮގްރާމްތައް ހިންގުންކަމަށްވެސް ވިދާޅުވިއެވެ.
