ރަށްރަށަށް ދަތުރުކުރާއިރު ޕީސީއާރު ޓެސްޓް ހައްދާކަށް ދެން ނުޖެހޭނެ

މާލެއިން އެހެން ރަށްރަށަށް ދަތުރުކުރާއިރު، ކޮވިޑަށް ޓެސްޓްކުރުމަށް ހައްދާ ޕީސީއާރު ޓެސްޓް ހައްދަންޖެހޭގޮތަށް އޮތް ގޮތުން ހެލްތު ޕްރޮޓެކްޝަން އެޖެންސީ(އެޗްޕީއޭ)ން އުވާލައިފިއެވެ.

ޑިރެކްޓަރ ޖެނެރަލް މައިމޫނާ އަބޫބަކުރު ސޮއިކުރައްވައި ނެރުއްވި އިއުލާނުގައިވަނީ, މާލެއިން ރާއްޖޭގެ އެހެން ރަށްރަށަށް ދަތުރުކުރުމުގައި 22 ފެބްރުއަރީން ފެށިގެން ޕީސީއާރު ޓެސްޓް ހައްދަން ނުޖެހޭނެކަމަށެވެ.

މާލެއިން ރަށްރަށަށް ދަތުރުކުރާއިރު، ޕީސީއާރު ހެއްދުން މަޖުބޫރުކޮށްފައި އޮތް އޮތުން އުވައިލުމުގެ އިތުރުން ކޮވިޑާގުޅިގެން މާލެ ސަރަހައްދުގައި އަޅާފައިވާ އެހެން ދެ ފިޔަވަޅަކަށްވެސް ނިމުމެއް އަންނާނެއެވެ. އެއީ މީހުން އެއްވެ އުޅުމާއި ހަފުލާތަކާއި އިވެންޓްތަކުގައި އެއްފަހަރާ ބައިވެރިވެވޭނެ މީހުންގެ ލިމިޓް އުވައިލުމާއި ކުޅިވަރު މުބާރާތްތަކަށް މީހުންނަށް ނުވަދެވޭ ގޮތަށް އޮތް އޮތުން އުވައިލުމެވެ.

ރަށްރަށަށް ފުރުމުގެ ކުރިން ކޮވިޑް ޓެސްޓް ހެދުން އެޗްޕީއޭއިން މިހާތަނަށް ލާޒިމު ކޮށްފައި އޮތްނަމަވެސް، މިފަހަކަށް އައިސް ކޮވިޑްގެ އަދަދުތައް ދަށަށްދާން ފެށުމުން އެކަމަށް މީހުން ސަމާލުކަންދޭ މިންވަރު ވަނީ ވަރަށް ބޮޑަށް ކުޑަވެފައެވެ. އަދި އެކަން ކަމާބެހޭ ފަރާތްތަކުން އެހާ ބޮޑަށް ބަލަމުންނެއްވެސް ނުދެއެވެ. އެހެންކަމުން ފާއިތުވި ދުވަސްތަކުގައި ގިނަ ބަޔަކު ވަނީ ޕީސީއާރު ޓެސްޓް ނުހައްދައި ރަށްރަށަށް ދަތުރުކޮށްފައެވެ.

ރާއްޖޭގައި ކޮވިޑް-19 ޖެހޭ މީހުންގެ އަދަދު ޖެނުއަރީ މަހު, ދުވާލަކު 2500ން މަތީގައި ހުރުމަށްފަހު ފެބްރުއަރީ މަހު އަންނަނީ ކޭސްތައް ފެންނަ މިންވަރު ދަށްވަމުންނެވެ. އެގޮތުން މިހާރު ރިޕޯޓްކުރާ ކޭސްތަކުގެ އަދަދު އުޅެނީ ހާހަކުން ދަށުގައެވެ.