ހިންނަވަރު ބަނދަރު ތަރައްގީކުރުމުގެ މަޝްރޫއު އޮކްޓޯބަރު މަހަށް ނިންމާލެވޭނެ: އެމްޓީސީސީ
16 ފެބުރުއަރީ 2022 | ބުދަ 17:32ޑިޒައިނަށް ބަދަލެއް ގެނައުމަށް ރައްޔިތުން އެދިފައިވާތީ، ސަރުކާރާ ކައުންސިލާ ދެމެދު މަޝްވަރާތައް ދަނީ ކުރިއަށް
ޅ. ހިންނަވަރު ބަނދަރު ތަރައްޤީ ކުރުމުގެ މަސައްކަތް ފެށުމަށްޓަކައި ޕްރޮޖެކްޓް ސައިޓް މޮބިލައިޒްކުރުން
ޅ. ހިންނަވަރު ބަނދަރު ތަރައްގީކުރުމުގެ މަޝްރޫއު އޮކްޓޫބަރު މަހަށް ނިންމާލެވޭނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.
އެމްޓީސީސީން ކުރިއަށް ގެންދާ ތަރައްގީގެ މަޝްރޫއުތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި އެމްޓީސީސީގެ ސީއީއޯ އާދަމް އާޒިމް ވިދާޅުވީ, ހިންނަވަރުގައި ތަރައްގީގެ ގިނަ މަޝްރޫއުތައް ކުރިއަށްދާއިރު، ބަނދަރުގެ މަސައްކަތްތައް ވެސް ކުރިއަށްދާ ކަމަށެވެ. އެގޮތުން މިހާރު އެންވަރަޔަމެންޓް އިމްޕެކްޓް އެސެސްމެންޓް (އީއައިއޭ)ގެ މަސައްކަތް ނިމިފައިވާކަމަށް އޭނާ ވިދާޅުވިއެވެ. އީއައިއޭގެ މަސައްކަތްތަކަށް އިޝާރަތް ކުރައްވައި އާޒިމް ވިދާޅުވީ, މަސައްކަތުގެ ސަބަބުން ތިމާވެއްޓަށް ކުރާނެ އަސަރާއި، އަދި މަޝްރޫއު ކުރިއަށް ގެންދިއުމުގައި އެންމެ ރަނގަޅު ގޮތް އަބަދުވެސް ބަލާ ކަމަށެވެ. އަދި މިއީ ވަރަށް ވަގުތު ނަގާ މަސައްކަތެއްގެ ގޮތުގައި އާޒިމް ސިފަކުރެއްވިއެވެ.
ހިންނަވަރުގެ ބަނދަރުގެ މަސައްކަތްތަކާބެހޭގޮތުން އާޒިމް ވިދާޅުވީ, ޑިޒައިނަށް ބަދަލެއް ގެނައުމަށް ރައްޔިތުން އެދިފައިވާތީ ސަރުކާރާއި ކައުންސިލާ ދެމެދު މަޝްވަރާތައް ކުރިއަށްދާކަމަށެވެ. އެ މަޝްވަރާތައް ކުރިއަށްދާތީ މަސައްކަތްތައް ކުރިއަށް ގެންދަން ބޭނުންވާ ސްޕީޑްގައި ކުރިއަށް ނުގެންދެވޭކަމަށް އާޒިމް ވިދާޅުވިއެވެ. އެހެންކަމުން ފުރަތަމަ ސްޓޭޖްގައި ބަނދަރު ޑިޒައިންކުރާއިރު، ބޭނުންވާ ހުރިހާ ކަމެއް ހުށަހެޅުމަށް ކައުންސިލްތަކަށް އާޒިމް ވަނީ އިލްތިމާސް ކުރައްވާފައެވެ. އާޒިމް ވިދާޅުވީ މިއަދު އެމްޓީސީސީން ތަރައްގީގެ ހުރިހާ މަޝްރޫއެއް ކުރިއަށް ގެންދަނީ ވަރަށް ބާރު ސްޕީޑްގައި ކަމަށާއި، އެރަށަކަށް މަސައްކަތް ކުރުމަށް ޓީމް ދަނީ މަސައްކަތް ކުރެވޭ ގޮތަށް ފުރިހަމައަށް ތައްޔާރުވެގެން ކަމަށެވެ.
މިހާރު މަސައްކަތްތައް ކުރިއަށްދާ ސްޕީޑަށް ބަލައި އާޒިމް ވިދާޅުވީ އޮކްޓޯބަރު މަހަށް ހިންނަވަރުގެ ބަނދަރުގެ މަސައްކަތް ނިންމާލެވޭނެ ކަމަށެވެ.
އެމްޓީސީސީއާ ހަވާލުކޮށްފާއިވާ މި މަޝްރޫއަކީ 99.52 މިލިއަން ރުފިޔާގެ މަޝްރޫއެކެވެ. މި މަޝްރޫއުގެ ދަށުން 3.2 ހެކްޓަރުގެ ބިން ހިއްކުމާއި، 65،170.76 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 421 މީޓަރުގެ ސަރަހައްދެއްގައި އެއްގަމުތޮށި ލުމާއި، 123.9 މީޓަރުގެ ސަރަހައްދެއްގައި ބޭރުތޮށި ލުމާއި، 170.55 މީޓަރުގެ ސަރަހައްދެއްގައި ރިވެޓްމެންޓް ޖެހުމުގެ މަސައްކަތް ހިމެނެއެވެ. މި މަޝްރޫއަކީ 350 ދުވަހުގެ ތެރޭގައި ނިންމުމަށް ހަމަޖެހިފައިވާ މަޝްރޫއެކެވެ. މި މަޝްރޫއު އެމްޓީސީސީއާ ހަވާލުކޮށްފައިވަނީ މިދިޔަ އަހަރުގެ ނޮވެމްބަރު މަހުގައެވެ. މި މަޝްރޫއަކީ ސީދާ ދައުލަތުގެ ބަޖެޓުން ޚަރަދުކޮށްގެން ހިންގާ މަޝްރޫއެކެވެ.
ހިންނަވަރަކީ 4873 މީހުންގެ އާބާދީއެއް ދިރިއުޅެމުން އަންނަ, މަސްވެރި ރަށެކެވެ.
