ޓީޗަރުންގެ އުންމީދުތަކަށް ފޮނި ނިމުމެއް

ޓީޗަރުންނަކީ ގައުމުގެ ކުރިމަގަށް ޒުވާނުން ބިނާކޮށް ތަމްރީނު ކުރުމުގެ ބުރަ މަސްއޫލިއްޔަތު ކޮނޑުގައި އަޅައިގެން މަސައްކަތްކުރާ މީހުންނެވެ. ގައުމު އާރާސްތުކުރުމުގައި ޓީޗަރުންގެ ދައުރަށްވުރެ މުހިއްމު އެހެން ދައުރެއް ނުވެސް އޮންނާނެއެވެ. ޓީޗަރުންނަކީ މި ގައުމުގެ ދިރުމެވެ.

ތައުލީމީ ދާއިރާގައި މަސައްކަތް ކުރާ ހުރިހާ އެންމެންގެ މުސާރަ ބޮޑުވެގެންދާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވަނީ ރިޔާސީ ބަޔާން އިއްވަވަމުން ވިދާޅުވެފައެވެ. ޓީޗަރުންގެ މުސާރަ ބޮޑުކުރުމަށް މިސަރުކާރުން ވެފައިވާ ވައުދުގެ ދަށުން, މެއި މަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރުމަށް ނިންމަވާފައިވާކަމަށް ރައީސް ވިދާޅުވިއެވެ.

މިބަދަލާއެކު، ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ, އިތުރުގަޑި ނުލާ 12,628 ރުފިޔާ އިން 19,740 ރުފިޔާއަށް ބޮޑުވެގެންދާނެ ކަމަށް ވެސް ރައީސް ވިދާޅުވިއެވެ. މިއީ 56 ޕަސެންޓްގެ ކުރިއެރުމެކެވެ.

ރައީސް މިހެން ވިދާޅުވުމާގުޅިގެން ތައުލީމީ ދާއިރާގައި މަސައްކަތް ކުރާ މުވައްޒަފުންގެ އުންމީދުތައް އާވެ، މި ދާއިރާގައި ދެމިތިބުމަށް އިތުރަށް ހިތްވަރު ލިބިގެންދިޔައެވެ. ރާއްޖެއެމްވީއާ ވާހަކަ ދެއްކި ބައެއް ޓީޗަރުން ބުނީ, ރައީސްގެ ރިޔާސީ ބަޔާނާއެކު ޓީޗަރުންނަށް އިތުރު އުފާވެރިކަމެއް ލިބިގެންދިޔަ ކަމަށެވެ. އަދި މިކަމުގެ މަޝްވަރާތައް ޓީޗަރުން މެދުގައި ކުރެވި މި ދާއިރާއަށް ހެޔޮ ބަދަލުތަކެއް އަންނާނެ ކަމަށް ވަނީ ވިދާޅުވެފައެވެ.

ގިނަ ފަހަރަށް މި ދާއިރާއަށް ފެންވަރު ރަނގަޅު ޓީޗަރުން ހޯދުމަށް ދަތިވަނީ ވެސް ކުރާ މަސައްކަތާއި އެއްވަރަށް އުޖޫރަ ނުލިބޭތީ ކަމަށް ވަރަށް ގިނަ މީހުން ވަނީ ފާހަގަކޮށްފައެވެ. އަދި ޓީޗަރުންގެ ގޮތުގައި އެތައް އަހަރެއްވަންދެން މަސައްކަތް ކޮށްފައިވާ މީހުން ވެސް ދާއިރާ ދޫކޮށް, ވަނީ އެހެން ދާއިރާތައް ޚިޔާރުކޮށްފައެވެ. ޓީޗަރުން އެތައް ދުވަހެއް ވަންދެން ދެކެމުން އައި ހުވަފެނުގެ ކުލަ ޖެހި، މި ނިންމުގެ ސަބަބުން އެމީހުންނަށް ވެސް ދާއިރާގައި ހިންދެމިލައިގެން ކުރިއަށް ދިޔުމަށް ލިބިގެން މި ދިޔައީ އިތުރު ހިތްވަރެކެވެ.

ދިވެހިރާއްޖޭގެ ތައުލީމީ ދާއިރާގެ ޚިދުމަތްތެރިންނަށް މިޒަމާނާ ގުޅޭ އެކަށީގެންވާ ހައްގު އުޖޫރައެއް ނުލިބޭކަމުގެ ޝަކުވާާއަކީ ގައުމުގެ ހުރިހާ ކަންކޮޅުތަކުންވެސް އިވެމުންދާ ޝަކުވާއެކެވެ. އެވާހަކަ ދައްކަނީ ހަމައެކަނި ތައުލީމީ ދާއިރާގައި މަސައްކަތްކުރާ މީހުން އެކަންޏެއް ނޫނެވެ. އެއީ އެހެން ދާއިރާތަކުގެ ވަރަށް ގިނަ ބަޔަކުވެސް ދައްކަމުން އަންނަ ވާހަކައެކެވެ. ކަންބޮޑުވުން ފާޅުކުރަމުން އަންނަ ކަމެކެވެ.

މި މައްސަލަޔަށް ހައްލެއް ނުލިބި އެތައް އަހަރުތަކެއް ފާއިތުވީފަހުން މި ސަރުކާރުން މި މައްސަލަޔަށް ހައްލު ހޯދައިދިނުމަށް އިސްވުމަކީ, ވައުދުތައް ފުއްދުމުގައި ހާލަތަކަށް ވަގުތަކަށް ނުބަލައި ކަންކަން ކޮށްދިނުމުގެ ރޫހު މިސަރުކާރުގައި ހުރިކަން ހާމަވެގެންދާ ކަމެކެވެ.

ޓީޗަރުންނަށް ހައްގު އުޖޫރައެއް ހަމަޖެހިގެން ދިޔުމަކީ ޓީޗަރުންގެ މަސައްކަތާއި ހިތްވަރަށް ލިބިގެންދިޔަ ދިރުމެކެވެ. އެކަމާ ދޭތެރޭ ބަހުސްކޮށް ޖަދަލު ކުރާކަށް އެއްވެސް ފުރުސަތެއް ނެތެވެ. ޓީޗަރުންނަށް ހެޔޮގޮތް ވުމަކީ ގައުމަށް ހެޔޮގޮތް ވުމެވެ. ރައީސް ސާލިހުގެ ސަރުކާރުން އެ ނިންމި ނިންމުމަކީ މުޅި ގައުމުވެސް މަރުހަބާކިޔާ ނިންމުމެކެވެ.